1 KHORƐ́NTHI KHÚBHƐ́NƐ́N 15 - Ebrié New Testament 1996

Krisi chan khúnɔn mɛn fe

¹ Mɛn hɔnsɛ́nhɔn, Ábhwe Bhwábhwá lókɔn lócí mɛn tɔ se hɔ́n ye, thénthé mɛɛ́n nɛn mɛn tɛ́ lóbhwe odi hɔ́n mwanhɛ́n, lónɔn ali ábhwe lókɔn ɔ́n ye, lókhɛ́n ɔ́n mo hɔ́n mímíbhú khúnbrɛn tre lótho.

² Ábhwe Bhwábhwá lókɔn mɛɛ́n tɔ sé hɔ́n yé, kasé ɔ́n gɛlé ya lótho, Ábhwe lókɔn ábha swa hɔ́n. Lókhɛ́n kasé áleli lónɛn, hɔ́n mímíbhú ɔ́n pɛ, abha le tɛ́ yíɛkɛ sé hɔ́n.

³ Ábhwe wo tɔ se mɛn ye, lókhɛ́n mɛn lɔ mɛn mo se hɔ́n, ábhwe lókɔn áli ábhwe khóo, lónɔn ali salé Krisi khu lo ne hɛ́nthé, sa lósi wo khɔ lrɛ ha Yankan hrɔ́ hrómɛn a.

⁴ Wo bho-e ha, ló ńcíbhí bhwaliá, ńchan khúnɔn mɛn fe, sa lósi wo khɔ lrɛ ha Yankan hrɔ́ hrómɛn a.

⁵ Ńthándi se Piɛ wu, lómánji ńthándi se Krisi-mranchɛ́mán áwɔ́-mɔn wu.

⁶ Ló ńcu thandi se mɛ́n yíchwɛmán ya-mwannán wu ácí brɛ, – wo hromɛn néphan búdúbúdú bha mɛpɔ́ ntɔ́nyán, lókhɛ́n fe lɔ khu.

⁷ Lóka ńthándi se Jakhi wu, lómánji ńthándi se Krisi-mranchɛ́mán khúnbrɛn wu.

⁸ Lóka néphan khúnbrɛn wui phu, lómánji mɛn lɔ mɛn wui, lókhɛ́n lóka lókɔn, mɛn tɛsa yípɔ bhri bɛn wo chan lábhɛ.

⁹ Krisi-mranchɛ́mán hrómɛn, mɛn tɛ mri brɛn wo khúnbrɛn – áleyɔn salé óche mɛn Krisi-mranchɛ́wo, lósi akhɔ tɛ ɔn, mɛn ni lephan bɛn aphrɛ lri Yankan-gbemán gbre hɛ́nthé.

¹⁰ Lókhɛ́n Yankan phɔlíman hromɛn nɔn ncɛ́n mɛn ni lephan, ló áphɔlíman lókɔn Yankan bho se mɛn, átɛ yíbɛn se mɛn. Mímí nbrɛn, mɛn ni júmán brɛn Krisi-mranchɛ́mán khúnbrɛn – lókhɛ́n áleli mɛɛ́n nbrɛn sɛ́npɛ́ hrómɛn, áphɔlíman lókɔn Yankan se mɛn, lónɔn ali júmán se mɛn.

¹¹ Lóhɛ́nthé, ábhwe néphan lókɔn étɔ, kasé áchan mɛn yéne lɔ, kasé áchan wo yéne lɔ, ábhwe brɛ lókɔn khɛ́n mɛɛ́n tɔ sé hɔ́n yé, lóbhwe míbrɛ nɔn wo lɔ wo étɔ, ló ábhwe lókɔn, lónɔn hɔ́n lɔ ɔ́n mu mímí.

Lóka lo bhá chán khúnɔn mɛn fe

¹² Ló Yankan bhwe lókɔn lo étɔ sé hɔ́n yé, lónɔn ali salé Krisi chan khúnɔn mɛn fe, ló kalósi akhɔ tɛ khɛ́n néphan fe abha hɔ́n hrómɛn étɔlé, néphan akhu, wo bha le chán ákhúnɔn mɛn fe e?

¹³ Ló kasé wo bhwe lókɔn wo étɔ áli mímí, élie salé Krisi lɔ le chan khúnɔn mɛn fe.

¹⁴ Ló kasé mímí nbrɛn Krisi le chan khúnɔn mɛn fe, álepɛ Yankan bhwe lo bhá tɔ sé hɔ́n yé, ló hɔ́n lɔ, álepɛ ábhwe bɛn ɔ́n ma bhú mímí.

¹⁵ Lóthé nɔn ali salé, lo echí bhwe sé Yankan lóka lo étɔlé ńchɛ Krisi chan khúnɔn mɛn fe. Átɛsalé kasé néphan akhu, wo bhale chán khúnɔn mɛn fe, ló kasé áli nɛn, ló-ɛ áli mímí salé Yankan lɔ le chɛ Krisi chan khúnɔn mɛn fe.

¹⁶ Kasé mímí nbrɛn néphan khúnbrɛn akhu wo bha lé chán khúnɔn mɛn fe, lóyábhɛ brɛ ógɛ tɔlé Krisi lɔ le chan khúnɔn mɛn fe.

¹⁷ Ló kasé Krisi le chan khúnɔn mɛn fe, hɔ́n mímíbhú ɔ́n pɛ, abha le tɛ́ yíɛkɛ sé hɔ́n, ló ɔ́n ni néphan bɛn ɔ́n nia hɔ́n ne hrómɛn.

¹⁸ Ló ábhwe lókɔn ácu élie lo salé néphan khɛ́n abhu Krisi mímí lókhɛ́n akhu, néphan lókɔn wo li néphan bɛn alia.

¹⁹ Ló kasé lo mwasrui lókɔn lo bho tre Krisi tho, áli áthéji mɛpɔ́bhá brɛ hɛ́nthé, lókhɛ́n álepɛ ábhwe nankhɛ abha lómánji, lo li néphan bɛn lo phɔ etɛ́ nfɛkhu brɛn néphan nankhɛ khúnbrɛn abha théji.

²⁰ Lókhɛ́n áli ábhwe mímí salé Krisi chan khúnɔn mɛn fe, ló néphan khúnbrɛn khɛ́n akhu, wo hromɛn mɛ́n nɔn ńni lephan alili chan khúnɔn mɛn fe.

²¹ Lósi yábhɛ brɛ khɛ́n ákhú khɔ lephan míbrɛ phɔ ka áthéji, lóyábhɛ brɛ ákhúnɔn mɛn chánfe lɔ khɔ lephan míbrɛ phɔ bha áthéji.

²² Lósi yábhɛ brɛ khɛ́n néphan khúnbrɛn ekhú Ádan hɛ́nthé, lóyábhɛ brɛ, néphan khúnbrɛn bha chán khúnɔn mɛn fe, Krisi phɔ wo bha hɛ́nthé.

²³ Lókhɛ́n lephan brɛ, ápɛ lóka ábha dɔn hɛ: néphan khúnbrɛn hrómɛn, Krisi nɔn athwasi chan khúnɔn mɛn fe, lómánji ábha dɔn mɛ́n gbemán khúnbrɛn lóka ánman sáji má.

²⁴ Lóka lókɔn khɛ́n áthéji bha phú, lóka lókɔn Krisi bha kútha tranmán áthéji yí khúnbrɛn ali dubhlékhu sɛ́npɛ́ abha lóhrómɛn, áyí khúnbrɛn apɛ áthéji le lósɛ́npɛ́ abha lóhrómɛn, ló ánman mó Bhringbi Khúbhɛ́ sé Yankan ali Nthe.

²⁵ Áyɔn salé Krisi olí bhringbi kábrɛ kábrɛ odi lóka Yankan mɔ́n oká mɛ́n mɛsamán khúnbrɛn tho, ló ankhwɛ́n wo khúnbrɛn sé Krisi obhó nta tré wo tho.

²⁶ Mɛsawo khɛ́n wo bhá wɛ́n, lókhɛ́n átha bha phú, mɛ́n nɔn ńni ákhú.

²⁷ Mímí Yankan hrɔ́ étɔlé: “Yankan khwɛn áyí khúnbrɛn se, ló anmó mɛ́n nta tre lótho.” Ló kasé wó étɔlé “áyí khúnbrɛn”, lóthé nɔn ali salé áyí khúnbrɛn lókɔn wo étɔ lóbhwe, wo le kan Yankan nbrɛn ka lóhrómɛn, átɛsalé Yankan nɔn ali lephan akhwɛn áyí khúnbrɛn se Krisi obhó mɛ́n nta tré lótho.

²⁸ Lóka khɛ́n wo bhá bhó áyí khúnbrɛn há Krisi mɔ́n mɛn, ló Krisi lókɔn khɛ́n ali Yankan Mi, mɛ́n lɔ, ánman hɔ́n mɛɛ́n nbrɛn há Yankan mɔ́n mɛn, Yankan lókɔn ali lephan abho áyí khúnbrɛn ha Krisi mɔ́n mɛn, ló lóka lókɔn, Yankan mɔ́n bha tré áyí khúnbrɛn tho.

²⁹ Ápɛ néphan dɔnbɛn bháne ehá nduhɛ́n sé néphan akhu. Ló wo néphan lókɔn bítɛ khɛ́n wo etɛ́ áyí yábhɛ lókɔn? Kasé áli mímí salé néphan akhu, wo bha lé chán khúnɔn mɛn fe, ló bítɛ khɛ́n wo hɛ́nthé, néphan bháne ehá nduhɛ́n ɛ?

³⁰ Saji lo lɔ, ébítɛ khɛ́n ákakhúnbrɛn lo sa hɛ́nmɛn tre lo eló ákhú hrómɛn ɛ?

³¹ Mɛn hɔnsɛ́nhɔn, ácí khúnbrɛn mɛn ma ákhú hrómɛn mɛɛ́n no. Ló mímí nbrɛn Jezwi-Krisi ali lo Hwánthe hɛ́n hrómɛn, ɔ́n ni néphan bɛn mɛn mo hɔ́n hɛ́n pɛ mɛn fúmɛ́n ákakhúnbrɛn.

³² Kasé khɛ́n áli áthéji yíbɛn hɛ́nthé nɔn mɛn gɛ ńbranmán néne ɔ́nmɔn kútha krɛn Efɛ́zi khúbhɛ́, ébí yábhɛ ábha tɛ́ sé mɛn? Lókhɛ́n kasé áli mímí salé néphan akhu, wo bha lé chán khúnɔn mɛn fe, “Ló ógɛ tɔlé tɛmɛ olí nɛn, onán ndu, átɛsalé npi lo ebhá khú.”

³³ Áleyɔn sa ɔ́n khrɛ phɔ: “Kasé ɛbha ágbe phromɛn hromɛn, ágɛ lɔ hɛ yítɛ́ khúnbrɛn.”

³⁴ Tɛmɛ hɔ́n yítɛ́ opriman, ló ɔ́n ne cu tɛ́ ne npɔhɔ́n. Hɔ́n hrómɛn néphan fe le yɛn Yankan. Ló ábhwe lókɔn mɛɛ́n tɔ, tɛmɛ olí ábhwe bɛn otɛ́ hɔ́n hɛ́ndɛ.

Néphan achan khúnɔn mɛn fe, wo phɔ nánmí yábhɛ wo le

³⁵ “Ló, hɔ́n hrómɛn, lephan bɛn bha tɔlé: Néphan khɛ́n akhu, kalósi wo bhá khɔ́ chán khúnɔn mɛn fe e? Ló wo phɔ nánmí, kalósi ábha khɔ́ tɛ́ e?”

³⁶ Dɔdɔwo, wú ɛle yɛn salé ńyámí lókɔn ɛbho ha áyítathé, kasé ákhu, lónɔn ácu lé thándi.

³⁷ Ló ńyámí lókɔn ɛbho bɔn ha áyítathé, khɔ ble o, khɔ ńyámí nánkhɛ o, áleli lógbugbru brɛn nɔn ábha lé thándi,

³⁸ lókhɛ́n lóyámí brɛ lókɔn, Yankan chɛ́ ájrɛn áyí nánkhɛ. Ló ńyámí dɔndɔn khúnbrɛn, ápɛ wo si wo khɔ́ tɛ́.

³⁹ Áyí khúnbrɛn abha mɛpɔ́, wo nánmí wo le, áleli brɛ: néphanmiɔn lɔ pɛ wo nánmí, ńnán abha bithe lɔ pɛ wo nánmí, ńkɔ́cran áfe khɔ́ tho lɔ pɛ wo nánmí, lókhɛ́n ńcɔn abha ńdu hrómɛn lɔ pɛ wo nánmí.

⁴⁰ Áyí lókɔn wo ewú, ápɛ áyí abha átho lókhɛ́n saji ápɛ áyí abha áthéji. Áyí abha átho, lósi akhɔ efí lólɔ áka njɛ, lókhɛ́n áyí abha áthéji, lósi akhɔ efí ló lɔ áka njɛ.

⁴¹ Ácɛ́nmɛ lɔ, ápɛ mɛ́n si ankhɔ́ fí, lókhɛ́n pɛ lókɔn abha tho, mɛ́n lɔ ápɛ mɛ́n si ankhɔ́ fí. Pɛmwe khúnbrɛn lɔ, ápɛ wo si wo khɔ́ fí, lókhɛ́n pɛmwe brɛ brɛ lɔ, wo pɛ wo si wo khɔ́ fí.

⁴² Lóka mɔngumán bha chán khúnɔn mɛn fe, lóyí ábha tɛ́ nɔn ali lókɔn. Lóka wo mrwɛn lephan, mɛ́n phɔ nánmí lókɔn áli áyíbɛn akhu, lókhɛ́n lóka ánman chán khúnɔn mɛn fe, mɛ́n phɔ nánmí lókɔn áli áyíbɛn abha le cu khú npɔhɔ́n.

⁴³ Lóka khɛ́n wo mrwɛn lephan, mɛ́n phɔ nánmí lókɔn áli áyíléle bɛn áyan hɛ́nmɛn, áli áyíbɛn alepɛ sɛ́npɛ́, lókhɛ́n lóka ánman chán khúnɔn mɛn fe, ánman jrɛn lephan bhwábhwá, ánman jrɛn lephan apɛ sɛ́npɛ́.

⁴⁴ Lóka wo émrwɛn lephan, mɛ́n phɔ nánmí nɔn wo émrwɛn. Lókhɛ́n lóka ánman chán khúnɔn mɛn fe, mɛ́n phɔ nánmí lókɔn ábha jrɛn Nánnánmi. Mímí nbrɛn, kasé ápɛ áphɔ nánmí ali áthéji nánmí, áyɔn salé opɛ áphɔ nánmí bɛn olí Nánnánmi ékɛ.

⁴⁵ Lóhɛ́nthé Yankan hrɔ́ étɔlé: “Ádan lókɔn ali lephan athwasi, ńni lephan abha mɛpɔ́”; lókhɛ́n Ádan lójɔ ali lephan aphuji bha, mɛ́n nɔn ńni Nánnánmi asé lephan mɛpɔ́bhá.

⁴⁶ Áleli Nánnánmi nɔn athwasi bha, ńnánmí nɔn athwasi bha, lókhɛ́n ase Nánnánmi.

⁴⁷ Ádan khɛ́n ali lephan athwasi bha, áyí wo bho tɛ, lónɔn ali ńnúlu abha áyíta hromɛn, lókhɛ́n Ádan ali ńdɔn mɔn hrómɛn lephan, mɛ́n nɔn ńni lephan achan átho bha.

⁴⁸ Ló néphan khɛ́n ali áthéjinɛ́n, wo khɔ lephan lókɔn khɛ́n wo bho áyíta tɛ, lókhɛ́n néphan ali átho néphan, wo lɔ wo khɔ lephan lókɔn khɛ́n achan átho bha.

⁴⁹ Lósi yábhɛ brɛ khɛ́n lo khɔ lephan wo bho áyíta tɛ, lósi yábhɛ brɛ nɔn lo bhá khɔ́ lephan achan átho bha.

⁵⁰ Mɛn hɔnsɛ́nhɔn, mɛn bhwe mɛɛ́n nɛn mɛn kranmán hɔ́n, lónɔn ali salé, áyí khɛ́n wo bho ńnánmí le ńká ɔ́nmɔn tɛ, áli áyíbɛn abha le gɛ ló Yankan Bhringbi khúbhɛ́, ló saji áyí khɛ́n ali áyí ábha khú cíbɛn, áyí lókɔn ále gɛ pɛ ńmɛpɔ́bhá álephú.

⁵¹ Tɛmɛ ɔ́ndi njɛlé, ábhwe bɛn ahrɔman tre, mɛn mán hɔ́n phwan sé hɔ́n: lo khúnbrɛn lo bha lé khú phú, lókhɛ́n, lóka wo bhá mɔ́n mrakáta aphuji, lo khúnbrɛn lo bhá jrɛn,

⁵² ló ábha tɛ́ gbraa, ábha tɛ́sa lephan ébhuramɛ lópán ábha phú. Lóka khɛ́n ńsɛ́n bha dɛn, néphan khúnbrɛn akhu, wo bhá chán khúnɔn mɛn fe, ló wo bha lé cu khú npɔhɔ́n, lóka lókɔn lo khúnbrɛn lo bhá jrɛn.

⁵³ Átɛsalé áyí khɛ́n ábha bɔn, wo bhá hɔ́n jrɛn áyí abha lé bɔn, ló saji áyí khɛ́n ábha khú, wo bhá hɔ́n jrɛn áyí abha lé khú.

⁵⁴ Lóka khɛ́n áyí ábha bɔn, wo bhá hɔ́n jrɛn áyí abha lé bɔn, lókhɛ́n áyí ábha khú, wo bhá hɔ́n jrɛn áyí abha le khú, lóka lókɔn, Yankan hrɔ́ bhwe atɔ lóyí bha tɛ́: “Thénthé lo gɛ mɔ́ndípha, ló ákhú bhwe phu!”

⁵⁵ “Ákhú, ka hɛ mɔ́ndípha e? Ákhú, ka hɛ sɛ́npɛ́ ɛbhó wɛ́n néphan e?”

⁵⁶ Ákhú sɛ́npɛ́ abhó wɛ́n néphan, áchan néphan neyítɛ́ hrómɛn, ló saji ńne sɛ́npɛ́ agɛ, áchan ábidí hrómɛn.

⁵⁷ Lókhɛ́n lo Hwánthe Jezwi-Krisi nɔn achɛ lo gɛ mɔ́ndípha lókɔn ákhú tho. Ló ńmɔ́ndípha lókɔn Yankan nɔn abho se lo, ló áyɔn salé olá Yankan nansi.

⁵⁸ Lóhɛ́nthé mɛn hɔnsɛ́nhɔn mɛn pɔ, tɛmɛ ɔ́n hámwanhɛ́n, ló ɔ́n gɛlé ya. Ácí khúnbrɛn, tɛmɛ ɔ́n khɔnmán phɔ lí júmán sé lo Hwánthe. Tɛmɛ ɔ́n yɛ́n salé júmán lókɔn hɔ́n elí sé lo Hwánthe, lópɛnsɔ́n bha le ká nwrɛ́.