1 KHORƐ́NTHI KHÚBHƐ́NƐ́N 14 - Ebrié New Testament 1996

Áyí Nánnánmi Créncré esé néphan, áyí pɔ́-npɔ́ lo wu lóhrómɛn

¹ Tɛmɛ ápɔ́ bhwe olí hɔ́n bhwe khrákhrá. Tɛmɛ ɔ́n yɛ́n áyí dɔndɔn khɛ́n Nánnánmi ebhó sé néphan. Lókhɛ́n lóyí khúnbrɛn lókɔn hromɛn, áyí ɔ́n ma hámwanhɛ́n lóphɔ, lónɔn ali Yankan bhwe ɔ́n ma tɔ sé néphan yé Nánnánmi sɛ́npɛ́ hrómɛn.

² Lephan khɛ́n élɛ ncan yábhɛ yábhɛ óle gɛ yé, lephan lókɔn mɛ́n bhwe ántɔ, léli néphanmiɔn ántɔ se, lókhɛ́n Yankan nɔn ántɔ se, átɛsalé mɛ́n bhwe lókɔn ántɔ, álepɛ lephan eyé lóthé. Nánnánmi sɛ́npɛ́ hrómɛn, antɔ ábhwe mímí ahrɔman tre.

³ Lókhɛ́n lephan étɔ Yankan bhwe Nánnánmi sɛ́npɛ́ hrómɛn, lephan lókɔn ántɔ bhwe sé néphanmiɔn, ló wo gɛ mɔ́ndɔ́nman, ńsɛ́npɛ́ le ńthɛ́nkhwálé.

⁴ Lephan khɛ́n élɛ ncan yábhɛ yábhɛ, mɛ́n bhwe ántɔ, áli mɔ́ndɔ́nman se mɛ́n míbrɛ, lókhɛ́n lephan étɔ Yankan bhwe Nánnánmi sɛ́npɛ́ hrómɛn, lephan lókɔn mɛ́n bhwe ántɔ, áli mɔ́ndɔ́nman se Yankan-gbemán khúnbrɛn.

⁵ Mɛn pɔ salé hɔ́n khúnbrɛn ɔ́n nɛ ncan yábhɛ yábhɛ néphan le yé, lókhɛ́n ló ayɔn banban, mɛɛ́n nɛn salé hɔ́n khúnbrɛn hrómɛn, lephan khɛ́n étɔ Yankan bhwe Nánnánmi sɛ́npɛ́ hrómɛn, lephan lókɔn ńbanbrɛn lephan khɛ́n élɛ ncan yábhɛ yábhɛ néphan le yé. Átɛsalé lephan khɛ́n élɛ ncan yábhɛ yábhɛ, énɛn salé mɛ́n bhwe ántɔ, opɛ lephan brɛn olɛ lóthé, lókhɛ́n Yankan-gbemán khúnbrɛn bha gɛ yé mɛ́n bhwe ántɔ.

⁶ Ló mɛn hɔnsɛ́nhɔn, thénthé mɛn mán mi hɔ́n bhwe bɛn: lóka mɛn mán má hɔ́n yé, kasé mɛɛ́n nɛ ncan yábhɛ yábhɛ néphan le yé, ébí yábhɛ ábha tɛ́ sé hɔ́n ɛ? Kasé mɛn nɛn hɔn ábhwethé phwan se hɔ́n, kasé mɛn nɛn se hɔ́n ábhweyɛ́n, kasé mɛn nɛn tɔ Yankan bhwe se hɔ́n ye Nánnánmi sɛ́npɛ́ hrómɛn, kasé mɛn nɛn nie hɔ́n bhwe, lókhúnbrɛn lókɔn, abha le tɛ́ yíɛkɛ sé hɔ́n.

⁷ Ńsɛ́n lókɔn omɔ́n, khɛ́n óche haráphu le akete, kasé wo emɔ́n lókhɛ́n ále dɛn mwámwá, óle gɛ yɛ́n lónánmɛ yábhɛ wo bho ńsɛ́n wo emɔ́n.

⁸ Kasé wo emɔ́n mrakáta che néphan, lókhɛ́n mrakáta lókɔn ále dɛn mwámwá, álepɛ lephan ábha gɛ yé, lókhɛ́n ábha bhra tha.

⁹ Lóyábhɛ brɛ, kasé ɛ́lɛ ncan yábhɛ yábhɛ néphan le yé ló thé, kalósi wo bhá khɔ́ yé hɛ bhwe ɛ́tɔ e? Ɛli lephan bɛn étɔ bhwe khwábu.

¹⁰ Ápɛ ńcan yábhɛ yábhɛ búdúbúdú bha áthéji wo élɛ, lókhɛ́n álepɛ ńcan bɛn wo élɛ khɛ́n óle yé lóthé.

¹¹ Kasé lephan élɛ ncan bɛn mɛn nɛn yɛn, lephan lókɔn mɛn hɛ́nmɛn ńni thekhusɛ, saji mɛ́n hɛ́nmɛn mɛn lɔ mɛn ni thekhusɛ.

¹² Mɛn yɛn salé áyí khɛ́n hɔ́n thɛ́n khúnbrɛn tre lótho, lónɔn ali áyí Nánnánmi ebhó sé néphan, lókhɛ́n lóyí khúnbrɛn lókɔn hromɛn, áyí khɛ́n ayɔn salé ɔ́n hámwanhɛ́n lóphɔ, lónɔn ali áyí khɛ́n ábha chɛ́ Yankan-gbemán júmán nɛnsi ló hɛ́nmɛn mímíbhú hrómɛn.

¹³ Lephan khɛ́n élɛ ncan yábhɛ yábhɛ óle yé, tɛmɛ anna Yankan ose sɛ́npɛ́, ló mɛ́n bhwe ántɔ, angɛ nɛ lóthé sé néphan oyé.

¹⁴ Átɛsalé kasé mɛn khɔ ńcan yábhɛ yábhɛ óle yé hrómɛn mɛɛ́n na Yankan, mɛn nánnánmi-ɛ éla Yankan mímí nbrɛn, lókhɛ́n mɛn Yankan lókɔn mɛɛ́n na, ále chan mɛn thɛ́n hrómɛn.

¹⁵ Áyɔn sa mɛn na Yankan mɛn nánnánmi hromɛn, lókhɛ́n áyɔn sa mɛn khɔ́ ábhweyɛ́n hrómɛn lɔ na Yankan. Áyɔn sa mɛn khó nánmɛ mɛn nánnánmi hromɛn, lókhɛ́n áyɔn sa mɛn khɔ́ ábhweyɛ́n hrómɛn lɔ khó nánmɛ.

¹⁶ Kasé ɛkhɔ nánnánmi hromɛn ɛlá Yankan nansi, lephan khɛ́n agɛ hɛ ɔ́nmɔn ébhurɛhɛ́n, anman nɛ́n yé hɛ bhwe ɛ́tɔ lókhɛ́n lóka ɛla Yankan phu, ánman tɔlé “Amɛn”.

¹⁷ Lóyábhɛ nɛn, kasé hɛ Yankan nansilá áyɔn lɔ, abha lé tɛ́ yíɛkɛ sé hɛ jɔ mɛ́n mímíbhú hrómɛn.

¹⁸ Mɛn ná Yankan nansi salé, mɛɛ́n gɛ nɛ ncan yábhɛ yábhɛ óle yé brɛn hɔ́n khúnbrɛn.

¹⁹ Lókhɛ́n lóka Yankan-gbemán bhurɛhɛ́n éla Yankan, áyɔn salé mɛn tɔ ábhwe mwannán ali ábhwe néphan bha gɛ yé lóthé, ló mɛn khɔ́ lóphɔ nie wo bhwe, lókɔn yábhɛ, áyɔn brɛn ábhwe akpɛn akpɛn mɛn mán tɔ, lóka mɛɛ́n nɛ ncan yábhɛ yábhɛ óle yé.

²⁰ Mɛn hɔnsɛ́nhɔn, áleyɔn sa ɔ́n mú hɛ́nphe sa ńmiɔ́ chɛ́-nchɛ́, lókhɛ́n kasé elí áyíléletɛ́ hrómɛn, tɛmɛ ɔ́n hɔ́n hɔ́n bɛn nbrɛn jrɛn ńmiɔ́ chɛ́-nchɛ́, lókhɛ́n hɔ́n hɛ́nphebhú hrómɛn, tɛmɛ ɔ́n tɛ́ yí sa néphan gbóngbo.

²¹ Ló Yankan hrɔ́ bhwe étɔ nɔn ali salé: “Hwánthe étɔlé, néphan khɛ́n élɛ ncan nankhɛ wo phɔ nɔn mɛn mán khɔ́ tɔ bhwe sé aféchwe lókɔn oyé. Mɛn mán mó ńthekhunɛ́n mɛ́n tɔ bhwe sé wo yé. Lótɛ khɛ́n wo bha le dɛn yé mɛn bhwe mɛɛ́n tɔ.”

²² Lóhɛ́nthé ńcan yábhɛ yábhɛ lókɔn wo élɛ, áli áyí khóo bɛn se néphan ále bhú Yankan mímí, lókhɛ́n néphan abhu Yankan mímí, áleli áyí khóo bɛn se wo. Lóyábhɛ brɛ, Yankan bhwe lókɔn ótɔ Nánnánmi sɛ́npɛ́ hrómɛn, áli áyí khóo bɛn se néphan abhu Yankan mímí, lókhɛ́n néphan ále bhú Yankan mímí, wo-ɛ áleli áyí khóo bɛn se wo.

²³ Kasé lóka Yankan-gbemán khúnbrɛn ébhurɛhɛ́n, lókhɛ́n néphan khúnbrɛn ya hɔ́n hrómɛn élɛ ncan yábhɛ yábhɛ óle yé, lókhɛ́n lóka lókɔn lephan bɛn aleli hɔ́n gbe hrómɛn lephan, lephan bɛn ale bhu Yankan mímí, mɛ́n lɔ mán ka hɔ́n hrómɛn, wú anman nɛ́n tɔlé ńfan etɛ́ hɔ́n?

²⁴ Lókhɛ́n kasé néphan khúnbrɛn étɔ Yankan bhwe Nánnánmi sɛ́npɛ́ hrómɛn, lókhɛ́n lephan bɛn ale bhu Yankan mímí, lephan bɛn aleli hɔ́n gbe hrómɛn lephan, bha ka hɔ́n thethé, lephan lókɔn ábhwe anyé hɛ́nthé, ánman yɛ́n salé mɛ́n ni newo. Ló ábhwe khúnbrɛn wo étɔ, ábha lí ákwabhɔ́ se mɛ́n thɛ́n hrómɛn,

²⁵ ló ábhwe khúnbrɛn abha mɛ́n thɛ́n hrómɛn, ábha phwan haphá kálé, ló ánman hɔ́n mɛ́n hɛ́nmɛn dɔlé áyítathé, ánman na Yankan, ló ánman tɔlé: “Mímí nbrɛn Yankan bha hɔ́n thethé!”

Lósi yábhɛ okhɔ́ la Yankan, Yankan-gbemán hrómɛn

²⁶ Ló mɛn hɔnsɛ́nhɔn, mɛn bhwe mɛɛ́n nɛn mɛn tɔ, lónɔn ali lókɔn. Lóka hɔ́n ébhurɛhɛ́n la Yankan, hɔ́n hrómɛn lephan bɛn bha khó nánmɛ, lephan lójɔ bha lie néphan yí, lephan nankhɛ bha tɔ Yankan bhwe Nánnánmi sɛ́npɛ́ hrómɛn, lephan lójɔ bha lɛ ncan yábhɛ yábhɛ óle yé, saji ábhwe wo phrɛ tɔ, lephan bɛn bha lɛ lóthé sé néphan yé: áyí khúnbrɛn lókɔn áli áyíbɛn ágɛ lí mɔ́ndɔ́nman sé Yankan-gbemán khúnbrɛn.

²⁷ Kasé lephan bɛn élɛ ncan yábhɛ yábhɛ óle yé, áyɔn salé lómánji opɛ néphan olí mɔn le bhwaliá otɔ bhwe. Lephan bɛn ophrɛ tɔ bhwe, lóka áphu lephan nankhɛ obhó lómɛ́n, ló wo khúnbrɛn wo tɔ bhwe opí wo. Lómánji ábhwe wo tɔ, tɛmɛ opɛ lephan nankhɛ bɛn olɛ lóthé sé néphan oyé.

²⁸ Lókhɛ́n kasé álepɛ lephan ábha gɛ lɛ ábhwethé sé néphan yé, áleyɔn sa néphan lókɔn khɛ́n élɛ ncan yábhɛ yábhɛ óle yé, wo lúkhwɛ́ tɔ bhwe ápasá hrómɛn. Lókhɛ́n tɛmɛ wo tɔ bhwe sé wo bɛn nbrɛn le Yankan.

²⁹ Ló néphan khɛ́n étɔ bhwe Nánnánmi sɛ́npɛ́ hrómɛn, tɛmɛ wo hromɛn, néphan olí mɔn le bhwaliá otɔ bhwe, ló wo bhwe wo tɔ, néphan nankhɛ oya lótho.

³⁰ Lókhɛ́n hɔ́n hrómɛn, kasé ápɛ lephan bɛn Yankan chɛ lée antɔ bhwe sé néphan oyé, lóka lókɔn lephan khɛ́n aya étɔ bhwe, áyɔn sa antémélé.

³¹ Hɔ́n khúnbrɛn ɔ́n gɛ tɔ Yankan bhwe, lókhɛ́n énɛn salé lókɔn tɔ ádɔn lókɔn, lókɔn tɔ ádɔn lókɔn, lónɔn lephan khúnbrɛn bha gɛ yé ábhwe wo étɔ, ló wo thɛ́n bha khwálé.

³² Néphan khɛ́n étɔ Yankan bhwe nánnánmi sɛ́npɛ́ hrómɛn, wo bhwetɔ́ Yankan bho se wo, áyɔn salé wo hámwanhɛ́n ya lókhɛ́n wo tɔ.

³³ Átɛsalé Yankan le pɔ salé lo bhá áphɔkhrɛ yítɛ́ hrómɛn, lókhɛ́n ńpɔ salé lo bhá ńthɛ́nkhwálé le áyítɛ́ apriman hromɛn. Sa lósi ɔ́n khɔ hɔ́n ewú áyí etɛ́ Yankan-gbemán khúnbrɛn hrómɛn,

³⁴ lóka Yankan-gbemán ébhurɛhɛ́n, áyɔn salé ńmie otémélé thíí chré, átɛsalé wo le gɛ mɔ́nsi wo tɔ bhwe lóka lókɔn, sa lósi Yankan bidí khɔ étɔ a, áyɔn salé wo ji wo cahɔn.

³⁵ Ló kasé ápɛ ábhwe bɛn wo énɛn wo bhi, tɛmɛ wo ya ábháthó bhi wo cahɔn. Áleyɔn salé bhie oya Yankan-gbemán hrómɛn tɔ bhwe.

³⁶ Wú hɔ́n yéne nɔn Yankan bhwe lili di? Ló wú hɔ́n míbrɛ tɛɛ nɔn ɔ́n ni néphan agɛ Yankan bhwetɔ́?

³⁷ Kasé hɔ́n hrómɛn, lephan bɛn ebhú salé mɛ́n ni lephan étɔ Yankan bhwe Nánnánmi sɛ́npɛ́ hrómɛn, lókhɛ́n anmú salé mɛ́n ni lephan agɛ ábhwetɔ́ achan Nánnánmi yé, tɛmɛ anyɛ́n salé ábhwe lókɔn khɛ́n lóhɛ́nthé mɛn tɛ́ hrɔ́ thu hɔ́n, áli lo Hwánthe bidí.

³⁸ Ló kasé lephan ɛle yɛn lóyábhɛ nɛn, hɛ lephan lókɔn, hɛ lɔ cíbɛn Yankan bha le yɛ́n hɛ.

³⁹ Lóhɛ́nthé, mɛn hɔnsɛ́nhɔn, Yankan bhwe ɔ́n ma tɔ sé néphan yé, tɛmɛ olí áyíbɛn ɔ́n mó hɔ́n thɛ́n khúnbrɛn tré lótho, lókhɛ́n ńcan yábhɛ yábhɛ lókɔn néphan le yɛn khɛ́n wo élɛ ɔn, ló-ɛ ɔ́n ne di lóbi.

⁴⁰ Áyí khúnbrɛn hrómɛn, tɛmɛ ɔ́n tɛ́ yí apriman, ɔ́n tɛ́ yí ayali.