1 KHORƐ́NTHI KHÚBHƐ́NƐ́N 13 - Ebrié New Testament 1996

Ápɔ́

¹ Kasé mɛɛ́n gɛ nɛ ncan yábhɛ yábhɛ khúnbrɛn néphan élɛ, kasé mɛɛ́n gɛ nɛ Yankan-mranchɛ́mán ncan élɛ, lókhɛ́n mɛn nɛn pɛ ápɔ́, mɛn bhwetɔ́ tɛsa ádonɛn bɛn wo bho yí wo ehá, lókhɛ́n édɛn, saji mɛn tɛsa bányɔn kpákpá édɛn.

² Kasé mɛn pɛ nánnánmi obhó tɔ Yankan bhwe sé néphan yé, kasé mɛn yɛn ábhwe khúnbrɛn phu, kasé mɛn yɛn Yankan yí ebhá tɛ́, kasé mɛn mímíbhú hrómɛn, mɛn gɛ chɛ́ ábhóbhó fi féne, lókhɛ́n mɛn nɛn pɛ ápɔ́, mɛn nɛn ni yíɛkɛ.

³ Ló mɛn yí khúnbrɛn mɛn pɛ, kasé mɛn khwɛn nwa néphan, kasé mɛn hɔn mɛɛ́n nbrɛn katɛn, ló átɛn othɔ́n mɛn khóliɛ́, lókhɛ́n mɛn nɛn pɛ ápɔ́, abha le tɛ́ yíɛkɛ sé mɛn.

⁴ Kasé ɛpɔ lephan, hɛ thɛ́n bha nɔ́n mɛ́n phɔ, kasé ɛpɔ lephan, ɛ́bha tɛ́ áyíbhwá se. Kasé ɛpɔ lephan, ɛbha le fúmɛ́n se. Kasé ɛpɔ lephan, ɛbha le lí nkhó mɛ́n phɔ.

⁵ Kasé ɛpɔ lephan ɛbha le tɛ́ áyí ali hɛ́ndɛ yí se. Kasé ɛpɔ lephan, ɛbha le lwɛli. Kasé ɛpɔ lephan, ɛbha le do thɛ́nyan se. Kasé ɛpɔ lephan, ɛbha le bhó mɛ́n bhwe ká hrómɛn.

⁶ Kasé ɛpɔ lephan, ɛbha le lí áphɔhá lóka ńya hɛ hɛ́nmɛn antɛ́ áyíléle, lókhɛ́n ɛ́bha lí phɔhá lóka antɛ́ áyíbhwá.

⁷ Ápɔ́ nɔn áchɛ́ lephan khɔnmán phɔ áyí khúnbrɛn hrómɛn. Ló áyí khúnbrɛn hrómɛn, ápɔ́ nɔn ásé lephan mímíbhú, ńmwasrui le ńthɛ́nnɔ́n.

⁸ Ápɔ́ li áyíbɛn abha le phú, lókhɛ́n bhwetɔ́trémán bhwetɔ́, cíbɛn ábha phú, ńcan yábhɛ yábhɛ néphan élɛ, lókhɛ́n wo le chwɛ, cíbɛn ábha phú, ló ábhweyɛ́n lɔ cíbɛn ábha phú.

⁹ Mímí nbrɛn, ábhwe thénthé lo yɛn, ále simɛ́n, ló Yankan bhwe lókɔn lo étɔ sé néphan oyé, áli ábhwe phɛ́nta bhrií nɔn lo étɔ.

¹⁰ Lókhɛ́n lóka áyí asimɛ́n bha bhá, lóka lókɔn áyí ale simɛ́n bha liá.

¹¹ Lóka mɛn ni yípɔ bhri, mɛɛ́n tɔ bhwe sa yípɔ bhri, mɛn mú hɛ́nphe sa yípɔ bhri, mɛn ní kɔ́nda sa yípɔ bhri, lókhɛ́n lóka mɛn di lephan, mɛn yɔ ńmiɔ́ yítɛ́ khúnbrɛn kalé.

¹² Áyí khɛ́n thénthé lo ewú, etɛ́ thɔɔn sa áyí wo ewú ńmɛ hromɛn. Lókhɛ́n cíbɛn lo bhá thándi gbée ya wú yí. Thénthé ábhwe phɛ́nta bhrií nɔn mɛn yɛn. Lókhɛ́n cíbɛn, mɛn mán yɛ́n ábhwe khúnbrɛn phú sa lósi Yankan khɔ yɛn mɛn.

¹³ Ló thénthé áyí bhwaliá khɛ́n wo étɔ lóbhwe, lónɔn ali: mímíbhú, ńmwasrui le ápɔ́, lókhɛ́n ló abanbrɛn lókhúnbrɛn lónɔn ali ápɔ́.