1 KHORƐ́NTHI KHÚBHƐ́NƐ́N 12 - Ebrié New Testament 1996

Nánnánmi Créncré yí asé néphan

¹ Thénthé ábhwe lo ebhá tɔ, lónɔn ali Nánnánmi Créncré yí asé néphan. Mɛn hɔnsɛ́nhɔn, ábhwe lókɔn mɛn pɔ salé ɔ́n yé lóthé mwámwá.

² Ɔ́n yɛn salé lóka ɔ́n ka yɛn Yankan, ɔ́n niábu lo gɛ ńfan ali áyíbɛn ále tɔ bhwe.

³ Lóhɛ́nthé, ábhwe lókɔn, mɛɛ́n nɛn salé ɔ́n yé lóthé mwámwá: lephan khɛ́n Yankan Nánnánmi bha mɛ́n phɔ éyɛli, ánnɛn gɛ tɔlé “Muswe gɛ Jezwi!” ló kasé lephan bɛn étɔlé: “Jezwi nɔn ali Hwánthe!” lephan lókɔn, Nánnánmi Créncré nɔn abha mɛ́n phɔ éyɛli.

⁴ Ápɛ áyí yábhɛ yábhɛ ali nánnánmi hromɛn yí, wo bho wo esé néphan, lókhɛ́n Nánnánmi míbrɛ nɔn ebhó áyí khúnbrɛn lókɔn sé néphan.

⁵ Ápɛ ási dɔndɔn okhɔ́ lí júmán, lókhɛ́n Hwánthe míbrɛ nɔn ali lephan wo elí júmán se.

⁶ Ápɛ júmán dɔndɔn bháne, lókhɛ́n Yankan míbrɛ nɔn esé lephan brɛ brɛ khúnbrɛn wo júmán yábhɛ wo bhá lí.

⁷ Lephan khúnbrɛn mwá hɛ́nthé nɔn Yankan khɔ Nánnánmi phɔ etɛ́ yí sé lephan brɛ brɛ khúnbrɛn wú.

⁸ Ápɛ lephan bɛn bháne, mɛ́n, Nánnánmi se ábhwetɔ́ asé lephan bhweyɛ́n, lókhɛ́n lephan lójɔ, Nánnánmi brɛ lókɔn bha se ábhwetɔ́ asé lephan áyíyɛ́n.

⁹ Mɛ́n Nánnánmi míbrɛ lókɔn, mɛ́n nɔn ansé lephan bɛn mímíbhú, ló mɛ́n míbrɛ nɔn ansé lephan lójɔ sɛ́npɛ́ obhó tɛ́ lɔ́phɔmán phɔ jan.

¹⁰ Lephan bɛn bháne, Nánnánmi bha se sɛ́npɛ́ obhó tɛ́ hɛ́nmɛntányí, lephan lójɔ, ánman sé nkɛ sɛ́npɛ́ obhó tɔ Yankan bhwe sé néphan oyé, lephan nankhɛ, ánman sé nkɛ sɛ́npɛ́ obhó yɛ́n nánnánmihɔn ali ńkpakprá nánnánmi, le Nánnánmi ali Nánnánmi mímí. Saji lephan bɛn ánman chɛ́ nkɛ lɛ ńcan yábhɛ yábhɛ nkɛ le yɛn, lókhɛ́n lephan bɛn bháne, ńcan yábhɛ yábhɛ lókɔn wo élɛ, ánman chɛ́ nkɛ lɛ lóthé sé néphan oyé.

¹¹ Lókhɛ́n Nánnánmi míbrɛ nɔn elí júmán khúnbrɛn lókɔn. Lephan brɛ Nánnánmi sé hɛ yí ká njɛ, mɛ́n yí ńpɔ lónɔn ansé hɛ.

Lephan míbrɛ, lókhɛ́n áyí abha mɛ́n phɔ áthúbhɔ

¹² Krisi tɛsa lephan lókɔn wo ewú. Lephan míbrɛ, lókhɛ́n áyí abha mɛ́n phɔ áthúbhɔ. Lephan míbrɛ lókhɛ́n áyí dɔndɔn abha mɛ́n phɔ lókhúnbrɛn lé li brɛ.

¹³ Lóyábhɛ brɛ, lo khúnbrɛn lókɔn khɛ́n lo li Jwifunɛ́n le lo khɛ́n lo le li Jwifunɛ́n, lo khɛ́n lo li gangánmán le líhɛ, wo ha lo nduhɛ́n salé lo khúnbrɛn lo jrɛn lephan míbrɛ Nánnánmi hɛ́n hrómɛn, ló Nánnánmi míbrɛ obhá lo thɛ́n hrómɛn.

¹⁴ Áleli áyí míbrɛ nɔn wo bho tɛ lephan, lókhɛ́n áyí búdúbúdú.

¹⁵ Ló kasé lephan nta étɔlé: “Lónian mɛn khɛ́n mɛn nɛn ni ńmɔ́n, lóhɛ́nthé mɛn nɛn cu ma lephan phɔ npɔhɔ́n”, áleli lónɔn ábha chɛ́sé ńta bha lé cu bhá lephan phɔ npɔhɔ́n.

¹⁶ Ló kasé lephan njɛ étɔlé: “Lónian mɛn khɛ́n mɛn nɛn ni ńmɛbhí, lóhɛ́nthé mɛn nɛn cu ma lephan phɔ”, áleli lónɔn ábha chɛ́sé ńjɛ bha lé cu bhá lephan phɔ npɔhɔ́n.

¹⁷ Kasé lephan phɔ nánmí khúnbrɛn jrɛn ńmɛbhí, lephan bha lé gɛ yé bhwe, ló kasé lephan phɔ nánmí khúnbrɛn jrɛn ńjɛ, lóka áyíbɛn esɔ́n, lephan bha lé gɛ yé lóphán.

¹⁸ Lóyábhɛ brɛ, Yankan khwɛn áyí yábhɛ yábhɛ khúnbrɛn ha lephan phɔ, ló mɛ́n yí ńpɔ, lónɔn ńtɛ.

¹⁹ Abha lé pɛ áyí óche lephan, kasé áyí míbrɛ tɛɛ nɔn ógɛ mɛ́n phɔ!

²⁰ Lóhɛ́nthé ápɛ áyí búdúbúdú bha lephan phɔ, lókhɛ́n lephan míbrɛ nɔn wo ewú.

²¹ Lephan mɛbhí lé gɛ kranmán ńmɔ́n lée: “Mɛn nɛn nɛn hɛ!” Saji lephan hɛ́nphe lɔ lé gɛ kranmán ńta lée: “Ee, mɛn nɛn nɛn hɛ!”

²² Áli mímí salé áyí abha lo phɔ khɛ́n alepɛ sɛ́npɛ́, kasé lóyí lókɔn le bhɛ́ne, lo bha lé gɛ tɛ́ yíɛkɛ.

²³ Ló áyí abha lo phɔ khɛ́n lo ebhú salé áleli yíɛkɛ se lo, lóyí lókɔn nɔn ali áyí lo ehá lóphɔ mwanhɛ́n brɛn áyí nánkhɛ khúnbrɛn abha lo phɔ. Lókhɛ́n áyí abha lo phɔ ali áyí aleyɔn sa lo fimɛ́n tɔ lóphɔ bhwe, lóyí lókɔn, lónɔn ali áyí lo ehá lóphɔ mwanhɛ́n brɛn áyí khúnbrɛn.

²⁴ Lókhɛ́n áyí ali áyí ayɔn mwámwá abha lo phɔ, ló-ɛ, lo le ha lóphɔ bhwa. Yankan nbrɛn khwɛn áyí búdúbúdú ha lo phɔ, ló ochɛ́sé áyí khɛ́n ale ha hɛ́n, wo lɔ wo gɛ nguhá:

²⁵ Lóhɛ́nthé, lephanmi le li áyíbɛn wo bhuri khunkhu. Áyí khúnbrɛn abha lephan phɔ, wo yí wo énɛn ló brɛ.

²⁶ Kasé áyí ekhú brɛ phɔ, átɛsa wo khúnbrɛn nɔn áyí ekhú wo phɔ, lókhɛ́n kasé brɛ gɛ nguhá, áli áphɔhá se wo khúnbrɛn.

²⁷ Hɔ́n khúnbrɛn lókɔn, kasé ogba hɔ́n bhurɛhɛ́n, hɔ́n nɔn ɔ́n ni Krisi phɔ nánmí, ló lephan brɛ brɛ abha hɔ́n hrómɛn, wo nɔn wo li áyí abha Krisi phɔ.

²⁸ Lóhɛ́nthé, Yankan-gbemán hrómɛn, Yankan nbrɛn khwɛn Krisi-mranchɛ́mán thwási, ńdɔn mɔn hrómɛn áse bhwetɔ́trémán, ńdɔn bhwaliá hrómɛn áse yíliemán, lómánji ádɔn néphan átɛ́ hɛ́nmɛntányí, le wo khɛ́n Yankan se wo sɛ́npɛ́ wo tɛ́ lɔ́phɔmán phɔ jan, saji néphan khɛ́n ágɛ dɔnmán wo jɔn mɔ́n, le néphan khɛ́n ágɛ yalí ápasá, lómánji ádɔn néphan khɛ́n ágɛ lɛ ncan yábhɛ yábhɛ wo le chwɛ.

²⁹ Wo néphan khúnbrɛn lókɔn wo le li Krisi-mranchɛ́mán, wo khúnbrɛn wo le li bhwetɔ́trémán, wo khúnbrɛn wo le li yíliemán, saji léli wo khúnbrɛn nɔn wo gɛ tɛ́ hɛ́nmɛntányí,

³⁰ wo khúnbrɛn wo lé gɛ tɛ́ lɔ́phɔmán phɔ jan, wo khúnbrɛn wo lé gɛ lɛ ncan yábhɛ yábhɛ wo le chwɛ, saji ńcan yábhɛ yábhɛ lókɔn néphan élɛ, wo khúnbrɛn wo lé gɛ lɛ lóthé sé néphan yé.

³¹ Ló áyí khúnbrɛn lókɔn Yankan se néphan, lóhrómɛn, tɛmɛ ɔ́n nɛn ló abanbrɛn áyí khúnbrɛn. Ló thénthé, mɛn mán nie hɔ́n áyí abanbrɛn áyí khúnbrɛn.