1 KHORƐ́NTHI KHÚBHƐ́NƐ́N 11 - Ebrié New Testament 1996

¹ Tɛmɛ ɔ́n sakhɔ́ mɛn nta tho tɛ́ yí, sa lósi, mɛɛ́n nbrɛn lɔ mɛɛ́n sakhɔ́ Krisi nta tho tɛ́ yí.

Áyɔn salé bhie obhó yí mrwɛn hɛ́n ló Yankan-khúthé

² Mɛɛ́n nri hɔ́n hwa, átɛsalé ákakhúnbrɛn mɛn bhwe édi hɔ́n mwanhɛ́n, ló ábhwe mɛn tɔ se hɔ́n, ɔ́n ya lótho.

³ Lókhɛ́n ábhwe mɛɛ́n nɛn lée ɔ́n yé, lónɔn ali sa: Krisi nɔn apɛ ńsɛ khúnbrɛn, ló bhie nca nɔn apɛ bhie, ló Yankan nɔn apɛ Krisi.

⁴ Lóhɛ́nthé, sɛ khɛ́n ábha ya ápasá hrómɛn la Yankan, lókhɛ́n ábha tɔ Yankan bhwe sé néphan oyé, kasé ńmo yí mrwɛn mɛ́n hɛ́n, átɛsalé nɛ́n mo nguhá se Krisi.

⁵ Lókhɛ́n kasé bhie ya ápasá hrómɛn éla Yankan, lókhɛ́n ántɔ Yankan bhwe sé néphan oyé, kasé nɛ́n mo yí mrwɛn mɛ́n hɛ́n, átɛsalé nɛ́n mo nguhá se mɛ́n ca. Bhie lókɔn, mɛ́n lɔ ńtɛsa bhie asɛ hɛ́n khwa.

⁶ Kasé bhie le bho yí mrwɛn hɛ́n, áyɔn salé ansɛ́ hɛ́n khwá. Ló kasé áli hɛ́ndɛ se bhie salé ansɛ́ hɛ́n khwá, áyɔn salé anmó yí mrwɛn hɛ́n.

⁷ Áleyɔn salé sɛ obhó yí mrwɛn hɛ́n, átɛsalé ńni lephan akhɔ Yankan, ńni Yankan nguhá, lókhɛ́n bhie nguhá áchan sɛ yé.

⁸ Átɛsalé, áleli bhie phɔ yí wo bho tɛ sɛ, lókhɛ́n sɛ phɔ yí nɔn wo bho tɛ bhie.

⁹ Saji áleli bhie hɛ́nthé nɔn wo tɛ sɛ, lókhɛ́n sɛ hɛ́nthé nɔn wo tɛ bhie.

¹⁰ Yankan-mranchɛ́mán hɛ́nthé, áyɔn salé bhie obhó yí mrwɛn hɛ́n, ló olí áyíbɛn ńkhɔ lóphɔ ánnie néphan salé ńma sɛ mɔ́n mɛn.

¹¹ Lókhɛ́n lo Hwánthe bhwetɔ́ hrómɛn, bhie míbrɛ lɔ lé gɛ chré, saji sɛ míbrɛ lɔ lé gɛ chré.

¹² Átɛsalé lósi yábhɛ brɛ khɛ́n wo khɔ bho sɛ phɔ yí tɛ bhie, lóhɛ́nthé nɔn bhie lɔ hó sɛ, ló áyí khúnbrɛn lókɔn áchan Yankan yé.

¹³ Hɔ́n nbrɛn tɛmɛ ɔ́n wú ábhwe lókɔn: bhie khɛ́n ale bho yí mrwɛn hɛ́n, wú áyɔn salé anya ápasá hrómɛn na Yankan?

¹⁴ Áyí khúnbrɛn abha ábithe élie hɔ́n salé kasé sɛ le hɛ́nyro thotho, áli hɛ́ndɛ se,

¹⁵ lókhɛ́n kasé bhie le hɛ́nyro thotho, áli nguhá se, áli ádɛgɔn ńmo mrwɛn hɛ́n.

¹⁶ Lókhɛ́n kasé hɔ́n hrómɛn, ápɛ lephan bɛn étalí ábhwe lókɔn ntɔ́nyán, mɛn bhwe mɛɛ́n gɛ kranmán hɔ́n nɔn ali sa: Yankan-gbemán khúnbrɛn hrómɛn le lo nbrɛn hrómɛn lɔ, álepɛ ábidí nánkhɛ abha lo yankanla hromɛn.

Lóka lo bha lo Hwánthe nɛn mɛ́n

¹⁷ Ábhwe lókɔn thénthé mɛn mán tɔ, lóhrómɛn álepɛ áhwalri se hɔ́n, átɛsalé hɔ́n hɛ́nbhúrɛ hromɛn, néphan égɛ áyíkhúphɔ brɛn wo mwá wo égɛ.

¹⁸ Wo kranman mɛn salé hɔ́n hɛ́nbhúrɛ hromɛn, ápɛ ágbe dɔndɔn abhuriya éswan. Ló mɛn mú salé ábhwe lókɔn áli mímí.

¹⁹ (Mímí nbrɛn, áyɔn salé hɔ́n hrómɛn opɛ ábhúríya, lónɔn óbha yɛ́n néphan khɛ́n agɛlé ya mímí nbrɛn.)

²⁰ Lóka hɔ́n ébhurɛhɛ́n, hɔ́n yí si ɔ́n khɔ́ tɛ́, élie salé áleli lo Hwánthe nɛn hɛ́nthé ɔ́n ma:

²¹ átɛsalé lóka ɔ́n khwalé hɔ́n elí nɛn, lephan fe fa phɔ wá ká wo brɛ brɛ nɛn wo sranman tho, lóyábhɛ nɛn, áchɛ́sé néphan fe sáji ló bháthó áko hromɛn, lókhɛ́n fe-ɛ nán dɛ ekú wo.

²² Ɔ́n pɛ bháthó ɔ́n gɛ lo lí nɛn, ɔ́n nán ndu. Hɔ́n yítɛ́ élie néphan salé hɔ́n éha Yankan-gbemán lia, ló néphan khɛ́n alepɛ yíɛkɛ, hɔ́n echɛ́ hɛ́ndɛ ká wo mɛ. Ló bí bhwe yábhɛ hɔ́n énɛn salé mɛn tɔ sé hɔ́n ɛ? Wú áyɔn salé mɛn nri hɔ́n hwa? Mɛn man nɛ́n gɛ nri hɔ́n hwa bhrɔ́ɔ́!

²³ Ábhwe lo Hwánthe bho se mɛn, lókhɛ́n mɛn mo mɛɛ́n nie hɔ́n, lónɔn ali sa: Lo Hwánthe Jezwi, lómréci brɛ khɛ́n wo ebhá hɔ́n-ɛn phɛ́lí, ńmo kpánhɔn,

²⁴ lóka ńna Yankan nansi, ńhɔn muri ló ántɔlé: “Mɛn phɔ nánmí nɔn ali lókɔn, áli áyíbɛn wo bho se hɔ́n. Tɛmɛ ɔ́n tɛ́ lóyábhɛ nɛn, ló mɛn bhwe odi hɔ́n mwanhɛ́n.”

²⁵ Lóyábhɛ brɛ, lóka wo li nɛn phu, ńhɔn áyábhɔ́, ló ántɔlé: “Áyábhɔ́ lókɔn, áli akprɔbha pɔ́pɔ́ bɛn Yankan bho se hɔ́n, mɛn nká hrómɛn. Lóka khúnbrɛn khɛ́n ɔ́n ma nán ńdɛ abha áyábhɔ́ lókɔn hromɛn, tɛmɛ mɛn bhwe odi hɔ́n mwanhɛ́n.”

²⁶ Átɛsalé lóka hɔ́n étha kpánhɔn lókɔn, lókhɛ́n hɔ́n enán áyábhɔ́ lókɔn hromɛn ndɛ, lo Hwánthe khú phɔ bhwe nɔn hɔ́n étɔ kábrɛ kábrɛ ábha di lóka ánman sáji má.

²⁷ Lóhɛ́nthé, kasé lephan ɛ́bha tha lo Hwánthe kpánhɔn lókhɛ́n ɛ́bha nán mɛ́n yábhɔ́ hrómɛn ndɛ, lókhɛ́n lósi yábhɛ ɛkhɔ ɛtɛ́ áleyɔn, ɛli pɔn se lo Hwánthe phɔ nánmí le mɛ́n nká.

²⁸ Lóhɛ́nthé lephan tɛmɛ ɛhá hɛ nbrɛn mwanhɛ́n lókhɛ́n ɛtha kpánhɔn lókɔn, lókhɛ́n ɛnán áyábhɔ́ lókɔn hromɛn ndɛ.

²⁹ Átɛsalé kasé lephan ɛbhá tha kpánhɔn lókɔn, lókhɛ́n ɛbhá nán áyábhɔ́ lókɔn hromɛn ndɛ, lókhɛ́n ɛbha lé yɛ́n salé áyí lókɔn áli lo Hwánthe phɔ nánmí, hɛ yí lókɔn ɛlí, le hɛ ndɛ lókɔn ɛnán, áli ákwabhɔ́ se hɛ nbrɛn.

³⁰ Lóhɛ́nthé nɔn hɔ́n hrómɛn, ápɛ néphan búdúbúdú agɛ lɔ́, wo le pɛ sɛ́npɛ́, ló fe ya hɔ́n hrómɛn khu.

³¹ Lókhɛ́n kasé lo phrɛ hamwanhɛ́n ya, Yankan bha le bhɔ́ lo kwa.

³² Lókhɛ́n thénthé lo Hwánthe bhɔ lo kwa phu, ló ńtɛ yí dri lo phɔ, ló ochɛ́sé lóka khɛ́n ánman mɔ́ áthéjinɛ́n pɔn, lo le bhá wo hromɛn.

³³ Lóhɛ́nthé mɛn hɔnsɛ́nhɔn, lóka hɔ́n ébhurɛhɛ́n lo Hwánthe nɛn mɛ́n, tɛmɛ ɔ́n nɔ́nthɛ́n bo néphan khúnbrɛn obhurɛhɛ́n.

³⁴ Ló kasé lephan áko ehɔ́n hɛ, tɛmɛ ɛlí nɛn ábháthó lókhɛ́n ɛbhá, ochɛ́sé hɔ́n hɛ́nbhúrɛ hromɛn, Yankan ole bhɔ́ hɔ́n kwa. Ló ali ábhwe nankhɛ abháne, lóka mɛn mán má, lónɔn mɛn mán primán lóbhwe khúnbrɛn lókɔn sé hɔ́n.