1 KHORƐ́NTHI KHÚBHƐ́NƐ́N 10 - Ebrié New Testament 1996

Phɔ́lu ékranmán néphan ole tɛ́ mo yí

¹ Mɛn hɔnsɛ́nhɔn, Moyízi cí tho, áyí atɛ lo jisɛmánhɔn, tɛmɛ lóbhwe lókɔn odi hɔ́n mwanhɛ́n. Mɔngú mɔngú tre wo hɛ́n tho ébo wo, wo nɛnsi khɔ ńdu bɛn óche gwe Nannan thethé, ló wo bhurika lo.

² Moyízi thá wo gɛ hɛ́nthé, wo ha nduhɛ́n mɔngú mɔngú le gwe ɔ́nmɔn hrómɛn.

³ Wo khúnbrɛn wo li ńnɛn míbrɛ ali nánnánmi nɛn,

⁴ ló wo nan ńdu míbrɛ ali nánnánmi ndu. Wo nan ńdu lókɔn achan ábhú hrómɛn bie gɛ wo thá ɔ́nmɔn élo, ábhú lókɔn áli nánnánmi bhú, saji ábhú lókɔn lónɔn ali Krisi mɛ́n bɛn nbrɛn.

⁵ Lóyí khúnbrɛn lókɔn Yankan tɛ se wo wu, lótɛ khɛ́n wo hromɛn néphan búdúbúdú tɛ yí ále pɔ Yankan mɛ, lóhɛ́nthé wo khu ló wo nánmí chránmanlé do ánánkhuthé khúnbrɛn.

⁶ Thénthé ábhwe khúnbrɛn lókɔn, átɛsa ábhwe wo ebhó thwelí bhwe tɔ sé lo, ochɛ́sé lo thɛ́n ole tré áyí phromɛn phromɛn tho, sa wo yí si wo khɔ tɛ.

⁷ Áleyɔn sa ɔ́n na mo sa wo hromɛn néphan fe yí si akhɔ tɛ. Lóhɛ́nthé Yankan hrɔ́ étɔlé: “Ápasá khúnbrɛn khwalé elí nɛn, wo enán ndu, ló wo chanfe tho wo égbe bhi.”

⁸ Áleyɔn sa lo lí gbakhre sa wo hromɛn néphan fe yí si akhɔ tɛ, ló ácí míbrɛ néphan akpɛn áphɛn le bhwaliá ya wo hromɛn khu.

⁹ Áleyɔn sa lo sú lo Hwánthe wú sa wo hromɛn néphan fe yí si akhɔ tɛ, ló ńdumán bha nan wo khúnbrɛn wɛn.

¹⁰ Áleyɔn sa ɔ́n gbɛ bhwe sé Yankan sa wo hromɛn néphan fe yí si akhɔ tɛ, ló Yankan-mranchɛ́wo awɛ́n néphan ka abha, ló ńwɛn wo khúnbrɛn phu.

¹¹ Áyí khúnbrɛn lókɔn atɛ wo, áli áyíbɛn Yankan tɛ se néphan wu ochɛ́sé wo hámwanhɛ́n. Ábhwetɔ́ lókɔn wo lrɛ tre, ochɛ́sé lo hámwanhɛ́n ya. Átɛsalé ácí lókɔn lo bha lóhrómɛn, áli ácí aphuji áthéji.

¹² Lóhɛ́nthé lephan kasé ɛbhú salé ɛya tho, tɛmɛ ɛhámwanhɛ́n ya, ló cíbɛn ɛle hálé.

¹³ Ásúwú lókɔn ɔ́n gɛ, áli áyíbɛn néphan bháne áwú. Lókhɛ́n Yankan li lephan áya mɛ́n bhwetɔ́ tho, ló anman nɛ́n dɛn khɛ́n ásúwú obánbrɛn hɔ́n sɛ́npɛ́. Lóka khɛ́n ásúwú bha bhú hɔ́n tho, ánman sé hɔ́n sɛ́npɛ́ ɔ́n ma gɛlé ya, ló mɛ́n nbrɛn ánman chɛ́ hɔ́n chán lóhrómɛn thándi.

¹⁴ Lóhɛ́nthé mɛn jɔn, tɛmɛ ɔ́n chán ńmola hromɛn féne.

¹⁵ Ɔ́n ni néphan bɛn ɔ́n pɛ ábhweyɛ́n, ló ábhwe lókɔn mɛɛ́n tɔ, tɛmɛ ɔ́n mú lóphɔ hɛ́nphe.

¹⁶ Tɛmɛ ɔ́n yɛ́n salé áyábhɔ́ lókɔn khɛ́n lo hɔn pɛ lo elá Yankan nansi: lóka lo enán lóhrómɛn yí, élie lo salé Krisi nká hrómɛn lo le Krisi ɔ́nmɔn lo mɛ́n librɛ. Ló kpánhɔn lókɔn khɛ́n lo bho lo ébhuri, lóka lo étha, élie lo salé Krisi nánmí hrómɛn, lo le Krisi ɔ́nmɔn lo mɛ́n librɛ.

¹⁷ Lósi yábhɛ brɛ khɛ́n kpánhɔn míbrɛ, lókhɛ́n lo-ɛ lo búdúbúdú, élie lo salé lo khúnbrɛn lókɔn thénthé lo jrɛn ńnánmí brɛ, átɛsalé lo khúnbrɛn lo tha lókpánhɔn míbrɛ.

¹⁸ Néphan khɛ́n elí nɛn wo bho ha npha se Yankan, ńphaha túprán tho, wo le Yankan ɔ́nmɔn, wo mɛ́n librɛ.

¹⁹ Ló ábhwe lókɔn mɛɛ́n tɔ, lóthé li bí? Wú mɛn nkɛé ńfan gɛ tɛ́ yíbɛn sé lephanmi? Wú mɛn nkɛé ńnán khɛ́n wo bhó ló mɛ́n hɛ́nmɛn lo ha npha, ágɛ tɛ́ yíbɛn sé lephanmi?

²⁰ Léliló, lókhɛ́n mɛɛ́n kranmán hɔ́n lée, áyí khɛ́n molamán bhó lo ha npha, ńphaha túprán tho, áli áyíbɛn wo bho ha npha se nánnánmi phromɛn phromɛn, lée áleli Yankan wo éha npha se. Ló mɛn nɛn pɔ salé ɔ́n má nánnánmi phromɛn phromɛn gbe hrómɛn.

²¹ Ɔ́n ma lé gɛ bhó lo Hwánthe yábhɔ́ nán ndɛ, lókhɛ́n ɔ́n cu bhó nánnánmi phromɛn phromɛn yábhɔ́ lɔ nán ndɛ. Ɔ́n ma lé gɛ chré lo Hwánthe tábrɛ mɛ́n lí nɛn, lókhɛ́n ɔ́n cu chré nánnánmi phromɛn phromɛn tábrɛ mɛ́n lɔ lí nɛn.

²² Wú lo énɛn lo gɛ lo Hwánthe ɔ́nmɔn swan? Wú lo ebhú salé lo pɛ sɛ́npɛ́ brɛn lo Hwánthe?

Áyí khúnbrɛn hrómɛn, tɛmɛ ɔ́n mó nguhá sé Yankan

²³ Néphan fe bháne étɔlé: “Lo gɛ mɔ́nsi lo tɛ́ áyí khúnbrɛn lo pɔ”, ábhwe lókɔn áli mímí, lókhɛ́n áleli áyí khúnbrɛn yɔn se lo. “Lo gɛ mɔ́nsi lo tɛ́ áyí khúnbrɛn lo pɔ”, lókhɛ́n áleli áyí khúnbrɛn nɔn ayɔn se néphan.

²⁴ Olépɛ lephan olú mɛ́n míbrɛ hɛ́nthé tɛ́ yí, lókhɛ́n tɛmɛ annú néphan nánkhɛ hɛ́nthé lɔ tɛ́ yí.

²⁵ Ńnán lókɔn wo ephɛ́lí ájɛ́gɔn, hɔ́n lɔ, ɔ́n gɛ mɔ́nsi ɔ́n tha lónán lókɔn, lókhɛ́n hɔ́n thɛ́n olé lri hɔ́n gbre, khɛ́n ɔ́n ya bhi bhwe yábhɛ yábhɛ.

²⁶ Lóhɛ́nthé Yankan hrɔ́ étɔlé, “áthéji le lóyí khúnbrɛn abha lóhrómɛn, áli lo Hwánthe ékɛ”.

²⁷ Lephan khɛ́n ále yɛn Yankan, kasé ńche hɛ lée ɛbhá mɛ́n hwan bha lí nɛn, ńnɛn wo se hɛ lóne, tɛmɛ ɛlí, ló hɛ thɛ́n ole lri hɛ gbre lókhɛ́n ɛya bhi bhwe yábhɛ yábhɛ.

²⁸ Lókhɛ́n kasé lephan bɛn ékranmán hɛ lée: “Ńnán lókɔn atre, wo bho ha npha se ńfan”, kasé áli lóyábhɛ nɛn, áleyɔn sa ɛtha ńnán lókɔn, lephan khɛ́n atɔ bhwe se hɛ ye mɛ́n hɛ́nthé, saji néphan nánkhɛ bhwe ábha tɔ hɛ́nthé.

²⁹ Ábhwe lókɔn mɛɛ́n tɔ, áleli hɔ́n thɛ́n bhwe ábha bhú hɛ́nthé, lókhɛ́n lephan nankhɛ thɛ́n bhwe ábha bhú hɛ́nthé. “Ló hɔ́n ébhi mɛn lée”, wú lephan nankhɛ mwanhɛ́n ebhú mɛ́n thɛ́n hrómɛn, “lónɔn abha le dɛn mɛn tɛ́ mɛn yí mɛn pɔ?

³⁰ Ló kasé lóka mɛn mán ní nɛn, lókhɛ́n mɛn ná Yankan nansi, ló bítɛ khɛ́n néphan bha cu gbrɛ mɛn, ńnɛn lókɔn mɛn ní, lókhɛ́n lóhɛ́nthé mɛn ná Yankan nansi ɛ?”

³¹ Lóhɛ́nthé hɔ́n nɛnlí hrómɛn, hɔ́n ndunán hrómɛn, hɔ́n yítɛ́ khúnbrɛn hrómɛn, tɛmɛ ɔ́n mó nguhá sé Yankan.

³² Hɔ́n yítɛ́ hrómɛn, tɛmɛ ɔ́n hámwanhɛ́n, ló ɔ́n ne chɛ́ lephan brɛ ohálé ńne hromɛn, Jwifunɛ́n hrómɛn lɔ, néphan aleli Jwifunɛ́n hrómɛn lɔ, saji Yankan-gbemán hrómɛn lɔ.

³³ Tɛmɛ ɔ́n tɛ́ yí sa mɛn yí si mɛn khɔ́ tɛ́, lónɔn ali sa: áyí khúnbrɛn hrómɛn, mɛn tɛ́ khékhremɛn tɛ́ yí opɔ́ néphan khúnbrɛn mɛ, ló léli mɛɛ́n nbrɛn mwá mɛɛ́n nɛn, lókhɛ́n lephan khúnbrɛn mwá nɔn mɛɛ́n nɛn, ochɛ́sé Yankan oswa wo.