1 KHORƐ́NTHI KHÚBHƐ́NƐ́N 1 - Ebrié New Testament 1996

Phɔ́lu ébhi néphan

¹ Mɛn Phɔ́lu nɔn mɛn tɛ áhrɔ́ lókɔn, mɛn le lo hɔnsɛ́n Sɔsutɛ́nɛn ɔ́nmɔn. Mɛn ni lephan bɛn Yankan nbrɛn san mɛ́n thɛ́npɔ́ hrómɛn salé mɛn ní Jezwi-Krisi-mranchɛ́wo.

² Mɛn tɛ́ áhrɔ́ lókɔn thu Yankan-gbemán abha Khorɛ́nthi khúbhɛ́, mɛn tɛ́ áhrɔ́ lókɔn thu néphan khúnbrɛn wo che obha lí Yankan-gbemán, lókhɛ́n abha Yankan phɔ Jezwi-Krisi hɛ́n hrómɛn, mɛn tɛ́ áhrɔ́ lókɔn thu néphan abha ási khúnbrɛn elúkhwɛ́ che lo Hwánthe Jezwi-Krisi. Jezwi-Krisi lókɔn ali wo Hwánthe, lókhɛ́n ali lo lɔ lo Hwánthe:

³ Tɛmɛ lo The Yankan le lo Hwánthe Jezwi-Krisi ɔ́nmɔn osé hɔ́n áphɔlíman le ńthɛ́nkhwálé.

Ńdubhɔ́ Khorɛ́nthi khúbhɛ́nɛ́n gɛ Krisi hɛ́n hrómɛn

⁴ Áphɔlíman lókɔn Yankan bho se hɔ́n Jezwi-Krisi hɛ́n hrómɛn, lóhɛ́nthé mɛn ná Yankan nansi ákakhúnbrɛn.

⁵ Krisi phɔ ɔ́n ma, lóhɛ́nthé nɔn Yankan bhɔ hɔ́n ndu áyí khúnbrɛn hrómɛn, ló ńse hɔ́n ndubhɔ́ khúnbrɛn ali ábhwe bhwábhwátɔ́ le ábhweyɛ́n.

⁶ Lo ndalefɛ lo li Krisi phɔ, lóbhwetɔ́ thénthé ágɛlé chre hɔ́n thɛ́n hrómɛn,

⁷ lóhɛ́nthé álepɛ Yankan ndubhɔ́ brɛ emián hɔ́n, hɔ́n khúnbrɛn lókɔn khɛ́n ɔ́n chre hɔ́n ébo lóka lo Hwánthe Jezwi-Krisi bha thándi sé néphan wú.

⁸ Mɛ́n nɔn ánman sé hɔ́n sɛ́npɛ́ ábha di lómɛ́n, lónɔn lóka lo Hwánthe Jezwi-Krisi bha sáji bhá, lócí lókɔn wo bha lé gɛ ápɔnlí bhrií hɔ́n phɔ.

⁹ Yankan li lephan bɛn alí mɛ́nbrɛ mɛ́n bhwetɔ́ hrómɛn. Mɛ́n nɔn ńche hɔ́n salé ɔ́n ma gɛ mɛ́n Bhi Jezwi-Krisi ɔ́nmɔn tɛ́ brɛ, Jezwi-Krisi lókɔn khɛ́n ali lo Hwánthe.

Wo jan gbe dɔndɔn bha Yankan-gbemán hrómɛn

¹⁰ Mɛn hɔnsɛ́nhɔn mɛɛ́n na hɔ́n, lo Hwánthe Jezwi-Krisi hɛ́n hrómɛn: tɛmɛ hɔ́n mɛ́n osí, ló ɔ́n ne ján gbe dɔndɔn bhá hɔ́n hrómɛn, tɛmɛ ɔ́n pɔlí phɔ hɔ́n hɛ́nphebhú hrómɛn le hɔ́n thɛ́n hrómɛn.

¹¹ Mɛn hɔnsɛ́nhɔn, mímí nbrɛn, néphan achan Kloe bháthó bha, wo nɔn wo kranman mɛn lée ágbo ka hɔ́n thethé.

¹² Ábhwe mɛn ye hɔ́n phɔ nɔn ali salé: hɔ́n hrómɛn, néphan étɔ bhwe yábhɛ yábhɛ. Lephan lókɔn chánfe, mɛ́n nkɛé: “Mɛn-ɛ Phɔ́lu yé mɛn ma”; lójɔ chánfe, mɛ́n nkɛé: “Mɛn-ɛ, Apolɔ́su yé mɛn ma”; áji lephan nankhɛ fe, mɛ́n nkɛé: “Mɛn-ɛ, Piɛ yé mɛn ma”; lómánji lephan lójɔ fe, mɛ́n nkɛé: “Mɛn-ɛ, Krisi yé mɛn ma.”

¹³ Ló wú Krisi li lephan bɛn abhuriya dɔndɔn? Wú Phɔ́lu nɔn akhu se hɔ́n áyábhletre phɔ? Wú Phɔ́lu hɛ́n hrómɛn nɔn wo ha hɔ́n nduhɛ́n?

¹⁴ Mɛn ná Yankan nansi salé hɔ́n hrómɛn álepɛ lephan brɛ mɛn ha nduhɛ́n, kasé áleli Krisipusi le Gaúsi ɔ́nmɔn.

¹⁵ Ló álepɛ lephan brɛ ábha gɛ tɔlé wo ha hɔ́n nduhɛ́n mɛn hɛ́n hrómɛn.

¹⁶ (Ee! mímí nbrɛn, mɛn ha Stefanasi le mɛ́n bháthónɛ́n ɔ́nmɔn nduhɛ́n, lókhɛ́n ále di mɛn mwanhɛ́n salé hɔ́n hrómɛn mɛn cu ha lephan nankhɛ bɛn nduhɛ́n.)

¹⁷ Léli néphan nduhɛ́nhá hɛ́nthé nɔn Krisi chɛ mɛn mran, lókhɛ́n Ábhwe Bhwábhwá lókɔn mɛɛ́n tɔ sé néphan oyé, lóhɛ́nthé nɔn ńchɛ mɛn mran. Ló lóka mɛɛ́n tɔ Ábhwe Bhwábhwá lókɔn sé néphan oyé, áleli ábhweyɛ́n khóo le ábhwetɔ́ bhwábhwá khóo hrómɛn, kasé mɛn tɛ́ lóyábhɛ nɛn, Krisi khú akhu áyábhletre phɔ, lósɛ́npɛ́ bha liá.

Jezwi-Krisi nɔn ali Yankan sɛ́npɛ́ le Yankan bhweyɛ́n

¹⁸ Átɛsalé Krisi khú akhu áyábhletre phɔ, áli ábhwe bɛn alepɛ thé se néphan khɛ́n alia wo ne hrómɛn, lókhɛ́n lo lókɔn khɛ́n lo li néphan Yankan swa, lo-ɛ ábhwe lókɔn áli Yankan sɛ́npɛ́ sé lo.

¹⁹ Lóhɛ́nthé Yankan hrɔ́ étɔlé: “Mɛn mán nɔ bhweyɛ́nmán bhweyɛ́n, ló néphan khɛ́n ali mɛbhíjanmán mɛn mán hɔ́n wo mɛbhíjan yɛn.”

²⁰ Ló abɛn li bhweyɛ́nwo ɛ? ka lephan ali hrɔ́yɛ́nwo khóo e? abɛn li bhwetáliwo khóo áthéji lókɔn ɛ? Yankan lie lo salé áthéji bhweyɛ́n li áyíbɛn alepɛ thé!

²¹ Átɛsalé Yankan mɛ́n bhweyɛ́n khóo hrómɛn, mɛ́n nbrɛn ńnɛn pɔ salé néphan okhɔ́ áthéji bhweyɛ́n hrómɛn yɛ́n mɛ́n lephan yábhɛ ńni, lóhɛ́nthé Ábhwe Bhwábhwá lókɔn lo étɔ sé néphan oyé, ábhwe lókɔn khɛ́n atɛsa fantɛ́mán bhwe, lóphɔ nɔn Yankan khɔ swa néphan ebhú mímí.

²² Jwifunɛ́n énɛn hɛ́nmɛntányí awú, Grɛ́si khúbhɛ́nɛ́n énɛn ábhweyɛ́n khóo,

²³ lókhɛ́n lo-ɛ Krisi lókɔn wo chɛ ha áyábhletre phɔ, mɛ́n phɔ bhwe nɔn lo étɔ sé néphan oyé: ábhwe lókɔn áli átha le ádi ɔ́nmɔn bhwe se Jwifunɛ́n, lókhɛ́n néphan aleli Jwifunɛ́n, wo ékɛ áli ábhwe bɛn alepɛ thé;

²⁴ lókhɛ́n néphan Yankan che bha li mɛ́n gbemán, Jwifunɛ́n lɔ, le néphan aleli Jwifunɛ́n lɔ, wo ékɛ ábhwe lókɔn lónɔn ali Krisi mɛ́n bɛn nbrɛn, ló Krisi lókɔn mɛ́n nɔn ńni Yankan sɛ́npɛ́ le Yankan bhweyɛ́n.

²⁵ Átɛsalé Yankan yéne, áyí khɛ́n lo ewú ali hɛ́nphelɔ yí, lóhrómɛn ábhweyɛ́n abháne áthúbhɔ brɛn néphanmiɔn bhweyɛ́n, ló saji Yankan yéne, áyí khɛ́n ali áyí alepɛ sɛ́npɛ́, lóyí lókɔn ákhɔ́nman brɛn néphan sɛ́npɛ́.

²⁶ Mɛn hɔnsɛ́nhɔn, lóka lókɔn khɛ́n Yankan che hɔ́n lée ɔ́n ma lí mɛ́n gbemán, hɔ́n néphan yábhɛ lócí ɔ́n ni, tɛmɛ lóbhwe odi hɔ́n mwanhɛ́n. Kasé wo éya áthéji bhwetɔ́ tho, hɔ́n hrómɛn lóka yábhɛ lókɔn, néphan kpɛ́bɛn nɔn ógɛ tɔlé ayɛn bhwe, apɛ sɛ́npɛ́, ali néphan khónkhó bha ákhúbhɛ́ hrómɛn.

²⁷ Yankan wu bibi khɛ́n áthéjinɛ́n hrómɛn, ńsan néphan ali fantɛ́mán, ló hɛ́ndɛ oká bhweyɛ́nmán mɛ, Yankan wu bibi khɛ́n ńsan néphan alepɛ sɛ́npɛ́, ló hɛ́ndɛ oká dwasanmán mɛ;

²⁸ néphan khɛ́n áthéjinɛ́n le kán sa ali néphan, néphan khɛ́n áthéjinɛ́n ésamɛ, néphan khɛ́n áthéjinɛ́n le bhú salé ali néphan, wo néphan yábhɛ lókɔn, wo nɔn Yankan san wo, ló néphan ali néphan khónkhó áthéjinɛ́n hɛ́nmɛn, hɛ́ndɛ oká wo mɛ.

²⁹ Lóthé nɔn ali salé Yankan hɛ́nmɛn álepɛ lephan ágɛ fúmɛ́n.

³⁰ Lókhɛ́n hɔ́n, ɔ́n ni néphan bɛn Yankan khwɛn hɔ́n bha ha Jezwi-Krisi phɔ, ló Krisi phɔ nɔn Yankan khɔ chɛ lo gɛ ábhweyɛ́n, mɛ́n phɔ nɔn Yankan khɔ tɛ lo priman, mɛ́n phɔ nɔn Yankan khɔ chɛ lo li mɛ́n gbemán, saji mɛ́n phɔ nɔn Yankan khɔ swa lo yɛn lo ne hrómɛn.

³¹ Lóhɛ́nthé Yankan hrɔ́ étɔlé: “Kasé lephan ɛ́nɛn ɛfúmɛ́n, tɛmɛ ɛsakhɔ́ lo Hwánthe yí atɛ phɔ fúmɛ́n.”