ETUNDILO 14 - Embimbiliya - Bíblia Sagrada em Umbundu

¹ Yehova wa popia la Mose hati,

² Sapuila va Isareli, huti, Tiuki. Tungi ocilombo ocipepi loko Pihahirote, pokati ka Migidolo lokalunga, kovaso ya Baale-Cifone. Oko muẽle va tunga ocilombo okuti kekulo liokalunga.

³ Momo Fareo o yola va Isareli epembe, hati, Va saka vofeka. Ekalasoko lia va lingila ocingonja.

⁴ Kuenje ame ndi tĩlĩsa utima wa Fareo okuti eye o va landula. Oco ndi limuisa esumbilo ku Fareo lokolohoka viaye viosi. Kuenje va Egito va ndimbuka okuti ame ndi Yehova. Kuenje va Isareli va ci linga.

⁵ Eci va sapuila osoma ye Egito, vati, Omanu vaco va tila, oco utima wa Fareo lakuenje vaye, oku sokolola omanu vaco, wa pongoloka. Va popia vati, Eci nye tua linga ndeti oku eca va Isareli okuti ka va tu vumbi vali?

⁶ Oco wa angiliyisa ekãlu liaye liovita, wa enda kumuamue lolohoka viaye.

⁷ Wa enda lovita epandu kakãlu ovita a nolĩwa, kuenda akãlu osi akuavo a va Egito, la vakesongo vavo vosi.

⁸ Yehova wa tĩlĩsa utima wa Fareo, Soma ye Egito, kuenje wa landula va Isareli, osimbu va Isareli va kala loku amako lutõi.

⁹ Va Egito va va landula. Otuvalu tuosi tua Fareo lakãlu aye ovita, la vakuakuendela kotuvalu lolohoka viaye va va landula kuenje va va sanga vocilombo cavo kekulo liokalunga, ocipepi lo ko Pihahirote, kovaso ya Baale-Cifone.

¹⁰ Eci Fareo eya ocipepi, oco va Isareli va petula ovaso kuenje va Egito vovo, va kasi oku va landula. Oco va Isareli va yokoka ca lua, kuenje va likutilila ku Yehova.

¹¹ Va popia la Mose, vati, Omo ve Egito ka mu kuete ayambo nga oco wa tu upila ha tu fila vekalasoko? Nye wa tu lingila ndeti okuti wa tupa vofeka ye Egito?

¹² Eyi hayoko ondaka tua popia love ve Egito tuti, Ci kale, tu vumba ño va Egito? Momo nda tua vumbile va Egito nda hise, oku fila vekalasoko hacoko.

¹³ Mose yu wa popia lomanu hati, Ko ka yokoki. Kolisiko, oco vu mõla eyovo lia Yehova lina a ko muisa etaili. Momo va Egito vu lete etaili, lalimue eteke vu va mõla vali.

¹⁴ Yehova o vu yakela. Cene oku ũha lika.

¹⁵ Yehova wa popia la Mose hati, Nye o mbilikiyila? sapuila va Isareli vameko kovaso.

¹⁶ Ove yelula ombueti yove, oluĩla eka liove kilu liokalunga hu ka tepisa, okuti va Isareli va pita vokati kokalunga posi ya kukuta.

¹⁷ Ame ndi tĩlĩsa ovitima via va Egito okuti va va landuilamo. Ndi limuisa ulamba ku Fareo lokolohoka viaye viosi, lokakãlu aye ovita, lokuvakuakuendela kotuvalu tuaye.

¹⁸ Va Egito va limbuka okuti ame ndi Yehova, eci ndi limuisa ulamba ku Fareo, lokakãlu aye, kuenda ku vakuakuendela kotuvalu tuaye.

¹⁹ Omunga ya suku, yina ya pitila olohoka via Isareli kovaso, ya sondoloka, ya enda konyima yavo. Ongunji yelende ya tunda kovaso yavo kuenje yeya konyima yavo,

²⁰ yeya pokati kocilombo ca va Egito locilombo ca va Isareli. Oco kua kala elende, kua kalavo owelema. Kuenje uteke waco wa pita puãi ka va lisangele uteke wosi.

²¹ Mose yu woluĩla eka liaye kilu liokalunga. Yehova wa sikisa ofela yokutundilo uteke wosi kuenje ya tiuwiya ovava okalunga okuti, okalunga ka linga osi ya kukuta kuenje ovava aco a litepa.

²² Va Isareli va lokila vokati kokalunga posi ya kukuta, kuenje ovava a linga ndocimbaka konẽle yavo yokondio lokonẽle yokepĩli.

²³ Va Egito va landulako. Va iñila konyima yavo vokati kokalunga. Otuvalu tuosi tua Fareo, lakãlu aye ovita lavakuakuendela kotuvalu tuaye, cosi ca iñila.

²⁴ Oco, poku lendela kuomẽle, Yehova yu vongunji yondalu lelende kuenje wa tulukila ovaso kocilombo ca va Egito kuenje wa tangelekisa olohoka via va Egito.

²⁵ Eye wopako alola akãlu avo okuti a enda lovitangi. Oco va Egito va linga vati, Tu tili va Isareli, momo Yehova o va yakela oku yaka la va Egito.

²⁶ Yehova yu wa popia la Mose hati, Oluĩla eka liove kilu liokalunga okuti ovava aco a tiukila ku va Egito, kakãlu avo kuenda ku vakuakuendela kotuvalu tuavo.

²⁷ Oco Mose woluĩla eka liaye kilu liokalunga kuenje eci kua ca omẽle, oco okalunga ka tiuka vali, ka kala ndomo ka tuwa ale. Va Egito va lupukilamo kuenje Yehova wa kunduila va Egito vokalunga.

²⁸ Ovava a tiuka, a tuvika akãlu lavakuakuendela kotuvalu lolohoka viosi via Fareo vina via va landuile vokalunga. Lomue kokuavo wa supapo ndaño umosi.

²⁹ Puãi va Isareli va endela posi ya kukuta pokati kokalunga, ovava a va lingile ndocimbaka kondio yavo lokepĩli liavo.

³⁰ Oco eteke liaco Yehova wa popela va Isareli povaka a va Egito. Kuenje va Isareli va mõla ovivimbi via va Egito konẽle yokalunga.

³¹ Va Isareli va mõla upange unene Yehova a linga oku nyõla va Egito. Kuenje va sumbila Yehova, va kolela Yehova lukuenje waye Mose.