EFETIKILO 37 - Embimbiliya - Bíblia Sagrada em Umbundu

¹ Yakoba wa tumãla vofeka ya Kanana muna mua vongaila isiaye.

² Lilo olio esapulo liepata lia Yakoba. Eci Yosefe a kala lanyamo ekui lepanduvali wa lisa lisa olomeme kumue la vahuvaye. Eye umãlehe kuenje wa kala kala lomãla va Biliha kuenda omãla va Silipa, akãi va isiaye; kuenje Yosefe wa sapowaila isiavo ovilinga viavo vivi.

³ Ocili Isareli wa solapo ca lua Yosefe, omãla vaye vosi vakuavo ci sule, momo wo cita tupu kukongo. Wo tongisila ombinja yovoko.

⁴ Vahuvaye va limbuka okuti isiavo u sole ca lua, vahuvaye vosi ci sule, kuenje vo suvuka; ka va tẽlele oku popia laye lombembua.

⁵ Kuenje Yosefe wa lota onjoi; wa yi sapuila vahuvaye, kuenje va vokiyako vali oku u suvuka.

⁶ Yu wa popia lavo hati Ndo yeveleli onjoi eyi nda lota.

⁷ Etu tua kala loku kuta ovitungu vepia, kuenje ocitungu cange ca talama vilu; ovitungu viene via ñualako oku fendela ocitungu cange.

⁸ Vahuvaye va popia laye vati, Ove nga o linga osoma yetu, o tu viala? Kuenje vo suvuka vali enene omo ka va solele olonjoi viaye lolondaka viaye.

⁹ Yu wa lota onjoi yikuavo, wa yi sapuila vahuvaye. Wa linga hati, Nda lota vali onjoi, okuti ekumbi losãi lolombungululu ekui lamosi vi kasi loku fendela ame.

¹⁰ Puãi eci a sapuilako isiaye kuenda vahuvaye, oco isiaye wo lemela hati, Onjoi wa lota ya soka ndati? Ame hẽ la nyoho la vahuvove tuiya hã ha tu wila posi loku ku fendela?

¹¹ Vahuvaye vo kuatela ukuse, isiaye puãi wa patekela eci a popia.

¹² Oco vahuvaye va enda ko Sekeme oku ka lisa oviunda via isiavo.

¹³ Isareli wa popia la Yosefe hati, Vahuvove hẽ, ka va kasi loku lisila ko Sekeme? Enju, hu tume kokuavo. Eye wa kumbulula hati, Ame ulo.

¹⁴ Oco a popia laye hati, Kuende, ka kulihise vahuvove kumue loviunda, oco wiye o sapuileko ondaka yaco. Oco wo tuma ha tundi kocimbota ca Hevirone, kuenje weya ko Sekeme.

¹⁵ Ulume umue wo sanga oku tungayala vusenge; kuenje ulume waco wo pula hati, Nye o sandiliya?

¹⁶ Eye hati, Ñasi loku sandiliya vahuvange; va sapuile oku va kasi oku lisila oviunda.

¹⁷ Ulume yu wo sapuila hati, Palo va ilukapo, nda va yeva vati, Tu enda ko Dotane. Yosefe yu wa landula vahuvaye kuenje wa va sanga ko Dotane.

¹⁸ Ovo vo muĩla kupãla, kuenje osimbu ka pitilile ocipepi lavo, vo tumbika ongombo yoku wipa.

¹⁹ Ovo va livanguisa ovo muẽle vati, Tali ukualonjoi wiyo.

²⁰ Enjui, tu wipayi, tu wimbi vocitunu cimue ha tu popi tuti, Ocinyama ca tema co lia, oco tu tale eci ci linga olonjoi viaye.

²¹ Ruvene wa ci yeva kuenje wo puluisa povaka avo; wa popia hati, Ka tu ka nyõli omuenyo waye.

²² Ruvene wa popia lavo hati, Ko ka peseli osonde yaye, wimbi ño vocitunu eci palo vekalasoko, ko ka wimbili vali eka. Wa ci popela omo wa yongola oku u puluisa povaka ao loku u tiula ku isiaye.

²³ Oco, eci Yosefe a pitila ku vahuvaye, oco va lula Yosefe ombinja yovoko,

²⁴ kuenje vo kuata, vo lowisa vocitunu. Ocitunu caco cupulokoso, ka mua kaile ovava.

²⁵ Oco va tumãla oku lia ombolo. Eci va petula ovaso avo oku vanja oco va mõla endo lia va Isameli liolio, lia tunda ko Gileada, lolongamelo viavo vi ambata olosimbolua lulela lekokoto, lia lunga oku vi tuala ke Egito.

²⁶ Yuda yu wa popia la vamanjaye hati, Ci tu sumũluisa ndati oku ipa manjetu loku vundisa osonde yaye?

²⁷ Tu endi, tu ko landisi ku va Isameli, ovaka etu ka vo ko kuate lũvi. Ocili eye manjetu, ukuasitu yetu. Kuenje vamanjaye va tava kokuaye.

²⁸ Oco alume va Midiane vakuakufũla va pita. Vamanjaye vocitunu va sosamo Yosefe, kuenje vo landisa ku va Isameli lakui avali kolopalata. Oco vambata Yosefe loku enda laye ke Egito.

²⁹ Eci Ruvene eya vali kocitunu kuenje wa sanga okuti Yosefe vocitunu kemo, oco wa tola tola uwalo waye.

³⁰ Yu wa tiukila ku vamanjaye, wa va sapuila hati, Umãlehe ka mõleha, ame hẽ njila pi?

³¹ Oco va ipaya ocitupi cohombo kuenje va nyañula ombinja ya Yosefe va yi yava vosonde yaco.

³² Va tuma ombinja yaco yovoko ku isiavo vati, Eyi tua yalula. Va kulihise nda hẽ oyo ombinja yomõlove nda ndati.

³³ Eye wa yi limbuka hati, Ombinja yomõlange muẽle Ocinyama ca tema co lia. Ka ci pumbi okuti Yosefe wa nyanyõha.

³⁴ Oco Yakoba wa tola tola uwalo waye kuenje wa wala ocikelei kombunda yaye. Wa lila omõlaye oloneke vialua.

³⁵ Omãla vaye valume lomãla vaye vakãi, vosi va seteka oku u lembeleka; eye puãi ka tavele oku lembelekiwa, wa linga hati, Ocili omõlange ndu lila ño, lile, toke konjembo. Oco isiaye wo lila.

³⁶ Otembo yaco eyi, va Midiane vo landisa ale ve Egito; vo landisa ku Potifara, ukulu wa Fareo, kesongo liakuenje velombe.