Yoshua 1 - EBIBILIA ENCHENU

Nyasae ogochika Yoshua arwanie ense ya Kanani ayebue

¹ Ekero Musa, omosomba bw’Omonene, konya akure, Omonene agakwana na Yoshua, mosinto o Nuni, omokonyi o Musa,

² akamotebia, “Musa, omosomba one, okure. Imoka, bwamboke orooche oro rwa Yorodan, aye na Abaisraeli aba bonsi, mosoe ase ense eria ngochia kobaa.

³ Nabaeire aase onsi morataare namagoro aino, buna narierete Musa eira ng’a nimbayee.

⁴ Orogongo rwaino nigo rorachakere erooro ya irianyi, roikere Lebanoni ensemo ya sugusu, naende rochakere orooche oronene rw’Eufarati, robwateranie ense yonsi y’Abahiti roikere Enyancha Enene ya bosongo.

⁵ Ase obogima bwao bwonsi, omonto tari orakobue. Buna narenge amo na Musa, naboigo ndabe amo naye, tinkogotiga nonya ng’ake.

⁶ Obe omokong’u na omoremu, ekiagera naye oraikie abanto aba, banyore ense eyio narierete chisokoro chiabo eira na gotiana ng’a nimbayee.

⁷ Otenene bokong’u rioka, na obe omoremu! Orende na obwate boronge amachiko onsi aya omosomba one Musa agochikerete. Tobaisa koyatiga, na koonchoka gochia aande onsi ensemo y’okorio gose ey’okobee; erio nario orasesenigwe aande onsi ase ogochia.

⁸ Amang’ana ’ebuku eye y’amachiko oyakwane botambe nomonwa oo, oyairanerere omobaso na obotuko, obwate na okore onsi ayarikireo. Erio nario orasesenigwe mono ase chinchera chiao chionsi.

⁹ Inee! Tari inche nagochikire ng’a otenene bokung’u, obe omoremu? Ase ayio, toondoka, tobaisa gokwa omoyo, ekiagera inche Omonene, Nyasae oo, nigo inde amo naye aande onsi orabe gokogenda.”

Yoshua ogochika abanto

¹⁰ Erio Yoshua agachika abatang’ani b’abanto

¹¹ ng’a baete egati y’ebitwori batebie abanto ng’a beroiserie endagera, ekiagera ritang’ani amatuko atato ataraera inabamboke orooche oro rwa Yorodan, baire ense eyio Omonene, Nyasae obo, abaeire ebe eyabo.

¹² Yoshua agatebia abanto b’egesaku kia Reuben, na ekia Gadi, amo nekeng’ese ki’egesaku kia Manase,

¹³ “Inyora ring’ana riria Musa, omosomba bw’Omonene, abachigete ekero abatebetie ng’a Omonene, Nyasae oino, nabae obotoereru ase ense eyio arabae momenye.

¹⁴ Abakungu baino na abana baino nabatigare, amo namaicho aino, ase ense eye Musa abaete aiga moocha ya Yorodan. Inwe abanyene abamore chituoni chi’esegi goika mwamboke mobogoretie ebirwanero biaino, motang’ane abamino.

¹⁵ Mobakonye goika Omonene abae barabwo obotoereru, buna abaete inwe, nabarabwo mbaire ense eyio Omonene, Nyasae oino, arabae. Erio momanye koirana ase ense yaino, eye Musa, omosomba bw’Omonene, abaete aiga moocha ya Yorodan.”

¹⁶ Barabwo bakairaneria Yoshua, “Onsi ayagwatochikire natoyakore, na aase aande onsi oratotome natogende.

¹⁷ Buna tware koigwera Musa, naye natokoigwere. Omonene, Nyasae oo, abe amo naye buna abete na Musa.

¹⁸ Monto onde bwensi oraange koigwera amachiko ao na taigwa amang’ana okomotebia, goika aitwe akwe. Aye otenene bokong’u, obe omoremu!”