Yacquub 4 - Ereyga Illaahey Axdiga Cusub

Illaahey adeeca

¹ Maxaad ku dagaalameysaan oo aad ku doodaysaan? Miyeysan ka imaanin damacyada xun xun ee idinku jira?

² Waxaad dooneysaan wax eydan haysanin, oo waxaad sameyn doontaan wax kasta si aad u heshaan. Waxaad ka maseyrsantihiin waxa dadka kale haystaan, mana heli kartaan, sidaa darteed waxaad bilowdaan dagaal si aad uga soo qaadataan. Ma haysataan waxaad rabtaan waayo Illaahey ma eydan weydiisan.

³ Xitaa markaad duceysaneysaan, baryadiina lama aqbalo, maxaa yeelay, waxaad u duceysataan ujeedo qaldan oo waxaad rabtaan waxyaalaha damacyadiina ka farxiya.

⁴ Dadkiinan sinada badanow miyeydaan garaneyn saaxiibnimada aduunka waa cadawnimada Illaah? Sidaa darteed qof walboo aduunka la saaxiiba Illaahey ayuu cadow la noqday.

⁵ Mise miyaad u maleynaysaan inuu qorniinka sabab la’aan u yiri, wuxuu si hinaaso leh ugu xiisaa ruuxa uu sababay inuu nagu dhex jiro?

⁶ Laakiin wuxuu na siiyay nimco kasii badan si aan uga hortagno damacyada sharta leh. Sida qorniinku leeyahay, “Illaahey waa kasoo horjeedaa kuwa kibra, laakiin kuwa is hooseysiiya ayuu u eexdaa.”

⁷ Illaah isu dhiiba. Ibliiska hor joogsada, isaguna wuu idin ka carari doonaa.

⁸ Illaahey u soo dhawaada, Illaaheyna wuu idiin soo dhowaanayaa. Dembiilayaal yahow, gacmihiina nadiifiya. Qalbigiinana nadiifiya, waayo daacadnimadiinu waxey u kala qeybsan tahay Illaahey iyo aduunka.

⁹ Murugooda, baroorta oo ooya. Qosolkiina oohin ku beddela. Meeshii aad ka farxi lahaydeen noqda kuwo murugeysan.

¹⁰ Isku hooseysiiya Rabbiga hortiisa, isaguna wuu idin sareysiin doonaa.

¹¹ Walaalayaalow xumaan ha iska sheegina, haddaad wax iska sheegtaan oo aad is xukuntaan, waxaad eedeyneysaan oo xukumeysaan sharciga Illaahey. Laakiin shaqadaadu waa inaad u hogaansanto sharciga, ma aha inaad xukunto inuu ku khuseeyo iyo in kale.

¹² Illaahey kaligiis oo ah kan sharciga bixiyaa waa xaakim. Isaga kaligiis ayaa awood u leh inuu wax badbaadiyo ama burburiyo. Haddaba sideed xaq ugu leedahay inaad deriskaaga xukuntid?

Digniin ku saabsan isku kalsoonaanta

¹³ Bal dhageysta kuwiinan dhahaya, “Maanta ama berri ayaan magaalada aadi doonnaa. Muddo sanad ah ayaan ku ganacsan doonnaa halkaas, waxaanna ka sameyn doonnaa lacag badan.”

¹⁴ Maxaad ka ogtihiin berri? Siddeed ku hubi kartaan noloshiina? Waa ceeryaamo wax yar imaaneysa kadibna baaba’eysa.

¹⁵ Waa inaad tiraahdaan, “Haddii Rabbigu uu na daayo, waan noolaan doonaa oo aan sameyn doonaa waxyaalahan ama kuwaas.”

¹⁶ Haddii kale waxaad ku faaneysaan qorshihiina, oo dhamaan faankaas oo dhan waa shar.

¹⁷ Haddii uu qofku garanayo waxa wanaagsan ee uu sameyn lahaa laakiin uusan sameynin, waxey u tahay dembi.