Rooma 16 - Ereyga Illaahey Axdiga Cusub

Salaamo qaas ah

¹ Waxaan idin kala dardaarmayaa walaasheen Foybi, oo ah mid u adeegta kaniisadda ku taala Kenekhreya.

² Illaahey dartiis u soo dhaweeya, una soo dhaweeya si u qalanta dadka Illaahey, caawimaad walboo ey idiin kaga baahantahayna siiya. Waayo iyadu xitaa dad badan oo aan ku jiro ayey soo caawisay.

³ Iigu salaama Bariskilla iyo Akula oo ah kuwo aan shaqada Ciise Masiix wada qabano.

⁴ Noloshooda ayey dartey halis u galiyeen. Aniga kaligeyna maahee dadka aan Yuhuudda ahayn oo dhan ayaa u mahadcelinaya.

⁵ Sidoo kalana iigu salaama xerta gurigooda ku kulma. Iigu salaama saaxiibkeyga qaaliga ah Ebaynetos, kaasoo ahaa kii ugu horeeyay ee Aasiya Masiixa ka rumeeya.

⁶ Iigu salaama Maryan taas oo aad idin kugu dadaashay.

⁷ Iigu salaama Andaronikos iyo Yuniyas, kuwaasoo Yuhuud ila ah xabsina igula jiray. Rasuullada dhexdooda caan ayey ka yihiin hortey ayeyna Masiixi ahaayeen.

⁸ Iigu salaama Ambaliyas, walaalkey aan Rabbiga dartiis saaxiib qaaliya ku nahay.

⁹ Iigu salaama Urbanos oo aan shaqada Masiixa wada qabano iyo Istakhus saaxiibkey qaaliga ah.

¹⁰ Iigu salaama Abellees, kaasoo adeege daacad ah u ah Masiixa. Iigu salaama kuwa ka tirsan reer Aristobulos.

¹¹ Iigu salaama walaalkey aan Yuhuudda wada nahay ee Herodiyos. Iigu salaama kuwa guriga Narkisos jooga ee Masiixiyiinta ah.

¹² Iigu salaama Tarufayna iyo Tarufoosa, kuwaasoo Rabbiga aad ugu adeega. Iigu salaama saaxiibteyda qaaliga ah Bersis, taas oo iyaduna Rabbiga aad ugu adeegta.

¹³ Iigu salaama Rufus kaasoo uu Illaahey doortay iyo hooyadiis oo hooyo oo kale ii ahayd.

¹⁴ Iigu salaama Asunkiritos, Filegoon, Hermees, Batrobas, Hermaas iyo walaalaha kale ee la jooga.

¹⁵ Iigu salaama Filologos, Yulya, Neere’us iyo walaashiis, iyo Olumbas iyo walaalaha kale ee iyaga la jooga oo dhan.

¹⁶ Isku salaama dhunkashada quduuska ah. Kaniisadihii Masiixa oo dhan wey idin soo salaamayeen.

¹⁷ Walaalayaalow waxaan idiin dardaarmayaa inaad iska ilaalisaan kuwa kala qeybsanaanta idiin keena ee caqabad ee kasoo horjeeda waxbaridda aad barateen. Kuwaas ka fogaada!

¹⁸ Waayo iyagoo kale Sayidkeena Ciise Masiix uma adeegaan, laakiin waxey u adeegaan danahooda. Hadalkooda macaan iyo sasabasho ayey ku khiyaanaan maskaxda dadka nacasyada ah.

¹⁹ Waan ku faraxsanahay inuu qof walba maqlay sidaad Rabbiga u adeecdeen. Laakiin weli waxaan idin ka rabaa inaad fahantaan waxa wanaagsan xumaantana aad ka fogaataan.

²⁰ Illaaha nabadda bixiyana wuxuu mar dhow Shaydaanka keeni doona cagihiina hoostooda. Nimcada Rabbigeena Ciise Masiix ha idin la jirto.

²¹ Waxaa idin salaamaya Timoteyos oo aan isla shaqeyno, sidoo kale waxaa idin salaamaya Lukiyos, Yasoon iyo Soosibater oo Yuhuud ila ah.

²² Aniga oo ah Tertiyos oo warqaddan qorayna waxaan idinku salaamayaa magaca Illaahey.

²³ Gayos oo aniga iyo dadka kaniisadda oo dhan aan marti u nahayna wuu idin salaamayaa. Erastos oo ah maamulaha qasnada magaalada iyo walaalkeen Kowartos wey idin soo salaamayaan. [

²⁴ Nimcada Rabbigeena Ciise Masiix kuligiin ha idin la jirto. Aamiin.]

²⁵ Aan Illaahey wada ammaanno! Kaasoo awoodda inuu idinku xoogeeyo warka wanaagsan ee aan wacdinayo, kaasoo ah warka ku saabsan Ciise Masiix. Waayo waqti dheer ayaa warkan la qarinayay,

²⁶ laakiin hadda shaaca ayaa laga qaaday. Illaaha weligiis jira ayaa nebiyadiisa amray iney warka wanaagsan wax ka qoraan, si quruumaha oo dhan isaga u adeecaan oo u aaminaan.

²⁷ Haddana Ciise Masiix dartiis ayaan weligeen ku ammaaneynaa Illaaha xigmadda badan! Aamiin.