Matayos 28 - Ereyga Illaahey Axdiga Cusub

Ciise wuu sarakacay

¹ Maalintii Sabtida ka dambaysay oo ahayd maalintii usbuuc ugu horraysay, Maryantii reer Magdala iyo Maryantii kale ayaa tagay si ey xabaasha u soo fiiriyaan.

² Isla markiiba waxaa dhacay dhul gariir weyn, waxaana samada ka yimid malag Illaahey. Wuxuuna leexiyay dhagaxii qabriga ku daboolnaa wuuna ku dul fariistay.

³ Malagu wuxuu u dhalaalayay sidii iftiinkii, dharkiisuna waxey u cadaayeen sidii barafkii.

⁴ Askartii qabriga ilaalineysay ayaa gariiray oo sidii maydkii cabsi darteed dhulka ugu dhacay.

⁵ Markaas ayuu malagii haweenkii ku yiri, “Ha cabsanina, waayo waan ogahay inaad u timaadeen Ciise, kaasoo iskutallaabta lagu qodbay.

⁶ Halkan ma joogo! Wuu sarakacay sidii uu horey idin kugu sii sheegay. Bal fiiriya meeshii uu jirkiisu yaalay.

⁷ Haddaba dhaqso taga oo u sheega xertiisa oo ku dhaha, ‘Ciise dhimashada wuu ka sarakacay wuxuuna idin kaga hor mari doonaa Galili. Halkaas ayaad ku arki doontaan.’ Waxaanna u imid inaan arintaas idiin sheego.”

⁸ Markaas ayey dumarkii dhaqso uga tageen xabaasha iyagoo argagaxsan oona faraxsan si ey ugu sheegaan xertiisi.

⁹ Isla markiiba waxaa jidka kula kulmay Ciise oo ku yiri, “Waan idin salaamay.” Markaas ayey u dhawaadeen oo lugihiisa ku sujuudeen.

¹⁰ Kadib Ciise ayaa ku yiri, “Ha cabsanina, taga oo u sheega walaalahay iney Galili tagaan, halkaas ayey igu arki doonaan.”

War bixintii waardiyayaasha

¹¹ Intey dumarkii sii socdeen, qaar ka mid ah waardiyayaashii ayaa magaalada tagay oo gudoomiyayaashii wadaaddada u sheegay wax walboo dhacay.

¹² Markaas ayey Gudoomiyayaashii wadaaddada la kulmeen odayaashii waxeyna go’aansadeen iney lacag laaluush ah siiyaan waardiyayaashii,

¹³ waxeyna ku yiraahdeen, “Waxaad qof walba ku tiraahdaan, ‘xertii Ciise ayaa yimaadeen habeenkii intaan hurudnay oo xaday jirkii Ciise.’

¹⁴ Haddii taliyuhu maqlo warkan, waan qancineynaa, oo dhibka waan idin ka leexineynaa.”

¹⁵ Markaas ayey waardiyayaashii qaateen lacagtii oo sameeyeen sidii lagu amray. Sheekadaasna illaa maanta Yuhuudda qaar wey aaminsanyihiin.

Waxa xerta Ciise laga rabo iney sameeyaan

¹⁶ Kadib kow iyo tobankii xerta ahaa waxey aadeen buur Galili ku taala, halkaas oo uu Ciise amray iney tagaan.

¹⁷ Markey Ciise arkeen wey u sujuudeen, laakiin qaar ayaa ka shakiyay.

¹⁸ Markaas ayuu Ciise iyagii u yimid oo ku yiri, “Awood oo dhan ayaa samada iyo dhulka la iga siiyay.

¹⁹ Sidaa darteed, taga oo quruumaha oo dhan xer ka dhiga, idinka oo ku baabtiisaya magaca Aabaha iyo Wiilka iyo Ruuxa Quduuska ah,

²⁰ oona baraya iney adeecaan wax walboo aan idin ku amray. Weligiinna waan idin la jiri doonaa, xitaa illaa dhamaadka aduunka.”