Markos 16 - Ereyga Illaahey Axdiga Cusub

Ciise wuu sarakacay

¹ Maalintii Sabtida kadib ayaa Maryantii reer Magdala iyo Maryantii hooyada u ahayd Yacquub iyo Saloome waxey gadeen dhir udgoon si ey jirka Ciise u mariyaan.

² Aroortii hore maalinta koowaad ee usbuuc goortii qoraxdu soo baxeysay ayey tageen xabaashii.

³ Markey sii socdeen ayey is weydiiyeen, “Yaa dhagaxii xabaasha hortiisa la dhigay meesha ka qaadi doona?”

⁴ Laakiin markey dhinaca qabriga fiiriyeen ayey arkeen dhagixii aadka u weynaa oo laga leexiyay meeshii.

⁵ Goortii ey xabaashii dhagaxa laga sameeyay galeen ayey arkeen nin dhar cad qaba oo fadhiya dhinaca midigta ah. Dumarkii aad ayey iskugu naxeen.

⁶ Markaas ayaa ninkii iyaga ku yiri, “Ha cabsanina.” Ma waxaad raadineysaan Ciisihii reer Naasared, kii iskutallaabta lagu qodbay. Wuu sarakacay! Halkan ma joogo, bal fiiriya meeshii jirkiisa la dhigay.

⁷ Haddaba taga oo u sheega xertiisa siiba Butros, oo ku dhaha, “Wuxuu idin kaga hor mari doonaa Galili. Halkaas ayaad ku arki doontaan siduu mar hore idiin sheegay.”

⁸ Dumarkii markey xabaashii kasoo tageen aad ayey uga yaabeen arintaas oo wey gariireen. Aad ayeyna uga cabsadeen iney qof u sheegaan waxa dhacay. [

⁹ Markii uu Ciise soo sarakacay maalintii usbuuc ugu horeysay subaxnimadeedi, wuxuu marka hore u muuqday Maryantii reer Magdala taas oo toddobo ruux wasakh leh uu ka saaray.

¹⁰ Iyaduna wey tagtay oo waxey u soo sheegtay xertii kuwaas oo la murugoonayay.

¹¹ Markey maqleen Ciise inuu sarakacay oo uu nool yahay iyaduna ey soo aragtay, ma eysan aaminin.

¹² Kadib Ciise wuxuu qaab kale ugu muuqday laba xertiisa ah iyagoo magaalada kasii baxaya.

¹³ Iyaguna wey soo laabteen oo waxey kuwii kale u sheegeen waxey la kulmeen, laakiin lama aaminin.

¹⁴ Kadib Ciise wuxuu u muuqday kow iyo tobankii xertiisa ahaa iyagoo cunteynaya. Wuuna canaantay waayo wey madax adkaadeen oo wey aamini waayeen kuwii isaga arkay kadib markii uu sarakacay u sheegeen inuu nool yahay.

¹⁵ Ciise wuxuu iyaga ku yiri, “Dunida oo dhan taga oo warka wanaagsan kusoo wacdiya quruumaha oo dhan.

¹⁶ Mid walboo i aamina oona la baabtiiso wuu badbaadi doonaa. Laakiin mid walboo i rumeysan waayana waa la xukumi doonaa.

¹⁷ Calaamadahaan waxey la jiri doonaan kuwa rumeysan. Magaceyga ayey ku bixin doonaan ruuxyada wasakhda leh, afaf cusubna wey ku hadli doonaan.

¹⁸ Masas ayey gacmahooda ku qaadi doonaan, oo waxey cabi doonaan sun waxna ma yeeli doonto. Gacmahoodey kuwa xanuunsan saari doonaan oo weyna bogsan doonaan.”

¹⁹ Markii uu Sayid Ciise iyaga la hadlay kadib ayaa kor samada loogu qaaday wuxuuna fariistay gacanta midig ee Illaahey.

²⁰ Xertiisana wey tageen oo waxey ka wacdiyeen meel walba, Illaaheyna wuu ka dhex shaqeeyay oo mucjisooyinkii ey sameeyeenna waxey cadeeyeen in fariintey wadaan ey run tahay.]