Falimaha 28 - Ereyga Illaahey Axdiga Cusub

Bawlos oo jooga Melita

¹ Markaan nabad ku gaarnay biyaha qarkooda ayaan ogaanay jasiiraddaas iney tahay Melita.

² Kuwii halkaas deganaa aad ayey noogu naxariisteen. Roob ayaa markaas da’ayay oo qabow ayaa jiray sidaa darteed dab ayey noo shideen oo anaga oo dhan ayey na soo dhaweeyeen.

³ Bawlos ayaa qoryo soo ururiyay oo dabka saaray, markaas ayaa kuleylkii dartiis mas intuu soo baxay Bawlos gacanta ka qaniinay.

⁴ Kuwii halkaas deganaa ayaa markey arkeen maskii inuu gacanta Bawlos kasoo laalaado, ayey is dheheen, “Ninkan waa gacan ku dhiigle, inkastoo uu badda nabad kaga soo baxay, xaqnimadu uma ogolaanayso inuu noolaado.”

⁵ Laakiin Bawlos intuu maskii gacantiisi ka ruxay ayuu dabkii ku tuuray isaga oo waxba aan gaarsiinin.

⁶ Waxey u maleynayeen inuu bararo ama isla markiiba dhulka ku dhaco oo dhinto. Laakiin markey waqti badan sugeen ayey arkeen inaan waxba ku dhicin isagii, markaas ayey fikradoodi badaleen oo ey dheheen isagu waa illaahey.

⁷ Meelahaas waxaa ku yaalay dhul uu iskalahaa nin la yiraahdo Bobliyos, taliyihii jasiiraddaas. Wuxuu na tusay deeqsinimo martigelin saddex maalmood.

⁸ Bobliyos aabihiis ayaa xanuusanaa, wuxuu la xanuusanaa qandho iyo calool xanuun. Markaas ayaa Bawlos soo booqday oo gacanta saaray oo u duceeyay wuuna bogsiiyay.

⁹ Markey arintaas dhacday ayaa dadkii jasiiradda deganaa oo xanuusanaa oo dhan wada yimaadeen waana la bogsiiyay.

¹⁰ Aad ayey noo sharfeen, oo markaan safrayneyna wax walboo aan u baahneyn ayey nasiiyeen.

Bawlos oo gaaray Rooma

¹¹ Saddex bilood kadib ayaan waxaan ku safarnay doon ka timid Iskanderiya taas oo waqtigii qaboobaha jasiiradda joogtay, qeybta horena uu kaga sameysnaa madaxyada illaahyadii mataanaha ahaa.

¹² Waxaan imaanay magaaladii Surakus oo waxaan joognay saddex maalmood.

¹³ Halkaasna waan ka tagnay oo waxaan gaarnay Regiyon. Maalintii ku xigtay dabayl ayaa ka timaaday dhinaca koonfurta, maalintii labaadna waxaan gaarnay Botiyolos.

¹⁴ Halkaasna waxaan kula kulannay walaalaha oo nagu casuumay inaan hal isbuuc la joogno. Kadibna waxaan tagnay Rooma.

¹⁵ Markaas ayaa walaalaha qaar ee joogay Rooma maqleen inaan imaanay markaas ayey ka yimaadeen suuqa Abbiyus iyo hoteelada waaweyn oo wey na la kulmeen. Bawlosna markii uu iyagii arkay ayuu Illaahey u mahadceliyay oo weliba dhiiranaaday.

¹⁶ Markaan Rooma gaarneyna Bawlos waa loo fasaxay inuu kalinimo ku noolaado isaga oo askartu ilaalineyso.

Bawlos wuxuu ka wacdiyay Rooma

¹⁷ Saddex maalmood kadib ayaa Bawlos kulan iskugu wacay hogaamiyayaashii Yuhuudda. Markey isku yimaadeen ayaa Bawlos ku yiri, “Walaalayaalow, aniga oo aan wax xumaan ah ku sameynin dadkeena iyo caadada awoowayaasheen, ayaa waxaa la igu xiray Yeruusaalem oo weliba la ii dhiibay reer Rooma.

¹⁸ Goortii su’aalo la i weydiiyay kadib reer Rooma waxey doonayeen iney isoo daayaan waayo qalad ey igu dilaan ma galin.

¹⁹ Laakiin Yuhuuddu markey diideen ayaan waxaan dhahay dacwadeyda Kaysar ha dhageysto. Laakiin illaa hadda aniga dadkayga dacwo uma haysto.

²⁰ Waxyaalahan darteed ayaan weydiistay inaan idin arko oo aan idin la hadlo. Rajadii reer binu Israa’iil darteed ayaan silsiladaan ugu xiranahay.”

²¹ Markaas ayey ku yiraahdeen, “Anagu wax warqad ah oo adiga kugu saabsan Yahuudiya kama helin, dadkeenana wax xumaan ah oo ey kaa soo sheegeen ma laha.

²² Laakiin waxaan jeclaan lahayn inaad noo sheegtid fikradaada, waayo waan ognahay in meel walba dadku kaa hadlaan.”

²³ Waxey isku raaceen iney maalin Bawlos la kulmaan, markaas ayaa iyagoo badan gurigiisi yimaadeen. Bawlosna wuxuu kala hadlay oo marqaatifuray waxyaalo ku saabsan Boqortooyada Illaahey subaxdii illaa galabtii. Wuxuu isticmaalay sharciga Muuse iyo buugaagta nebiyada inuu qalbiyadooda ku soo celiyo Ciise.

²⁴ Qaar ayaa ku qancay hadaladiisi qaar kalana ma rumeysan.

²⁵ Iyagii ayaa dhexdooda ka heshiin waayey markaas ayey kala tageen Bawlos goortii uu hadalkan ugu dambeeya yiri, “Ruuxa Quduuska ah waxyaala run ah ayuu kala hadlay awoowayaasheen siduu nebi Isayos sheegay.

²⁶ “Oo waxaad dadkan ku dhahdaa waad maqli doontaan laakiin weligiin ma fahmi doontaan, waad fiirin doontaan laakiin waxba ma arki doontaan.

²⁷ Waayo dadkan qalbiyadoodu wey qalaafsanaadeen, wax dhegahooda kuma maqlaan indhahoodana wey xireen. Haddii kale indhaha wax wey ku arki lahaayeen, oo dhegahoodana wax ayey ku maqli lahaayeen, qalbigoodana wax ayey ku fahmi lahaayeen oo wey soo laaban lahaayeen, oo aniguna waan cafin lahaa.”

²⁸ Markaas ayaa Bawlos yiri, “Sidaa darteed waxaan doonayaa inaad ogaataan badbaadadii Illaahey waxa loo soo diray dadka aan Yuhuudda ahayn, weyna dhageysan doonaan!” [

²⁹ Goortuu waxyaalahaas dhahay ayaa Yuhuuddii kala tageen iyagoo aad iskugu buuqayo.]

³⁰ Laba sano Bawlos wuxuu deganaa guri uu kireystay oo halkaas ayuu kuwa u yimaada ku soo dhaweynayay.

³¹ Geesinimo iyo xornimo ayuu boqortooyada Illaahey ku wacdinayay oo dadkana barayay waxyaalaha ku saabsan Rabbigeena Ciise Masiix.