Falimaha 19 - Ereyga Illaahey Axdiga Cusub

Bawlos oo jooga Efesos

¹ Goortii Abolloos joogay Korintos ayaa Bawlosna wuxuu dhex maray tuulooyin illaa Efesos, halkaas ayuu kula kulmay kuwa xer ah.

² Markaas ayuu iyagii ku yiri, “Miyaadan Ruuxa Quduuska ah helin markaad aaminteen?” Markaas ayey ku jawaabeen, “Maya, xitaa maanan maqlin wax ku saabsan Ruuxa Quduuska ah.”

³ Kadibna Bawlos ayaa weydiiyay, “Baabtiiskee ayaa la idin ku baabtiisay?” Waxey ku jawaabeen, “Baabtiiskii Yooxanaa.”

⁴ Markaas ayaa Bawlos ku yiri, “Yooxanaa baabtiiskiisi wuxuu ahaa baabtiiska toobadkeenka. Wuxuuna dadka ku yiri aamina kan iga daba imaan doona, kaasoo ah Ciise.”

⁵ Markey arintaas maqleen ayaa lagu baabtiisay magaca Rabbi Ciise.

⁶ Goortii Bawlos iyaga gacantiisa saaray ayaa Ruuxa Quduuska ah ku soo dul degay, isla markiiba waxey ku hadleen afaf kale oo waxeyna bilaabeen iney wax sii sheegaan.

⁷ Iyagoo dhan waxey ahaayeen laba iyo toban nin.

⁸ Saddex bilood ayuu Bawlos sunagogga tagayay oo si geesinimo leh uga wacdinayay waxyaalo ku saabsan boqortooyada Illaah.

⁹ Laakiin qaarkood ayaa madax adkaaday, waxeyna diideen iney rumeystaan oo xitaa waxey xumaan ka sheegeen habka kuwa Ciise raacsan u nool yihiin. Bawlos halkaas ayuu uga tagay oo xertii ayuu sii kaxeystay oo maalin walba wuxuu kula sheekeysan jiray qolka wax lagu barto ee ku yaalo Turannos.

¹⁰ Arintaas waxey socotay muddo laba sano ah illaa Yuhuuddii iyo Gariigtii ku noolayd Aasiya ey maqleen fariinta Rabbiga.

¹¹ Illaaheyna wuxuu Bawlos siiyay xoog uu ku sameeyo mucjisooyin waaweyn,

¹² sidaa darteed dadkiina waxey qaateen dharkii Bawlos iyo marooyin uu taabtay si ey ugu geeyaan kuwii xanuusanaa, dadkii oo dhan ayaa bogsaday kuwii ruuxyada xun qabayna wey ka baxeen.

¹³ Waxaa dhacday in kuwo Yuhuud ah meelaha tageen iyagoo isku dayeen iney ruuxyada xun ku bixiyaan magaca Sayid Ciise. Waxey ruuxii wasakhda lahaa ku yiraahdeen, “Magaca Ciise ee Bawlos ku wacdinayo ku soo bax!”

¹⁴ Waxaa arintaas sameynayay toddoba wiil oo uu gudoomiyihii wadaaddada oo ah Yuhuudi ee la dhihi jiray Iskeba ayaa dhalay.

¹⁵ Laakiin ruuxii xun ayaa ku yiri, “Ciise waan garanayaa, Bawlosna waan garanayaa, laakiin idinku yaa tihiin?”

¹⁶ Isla markiiba ninkii ruuxyada xun qabay ayaa ku booday oo iyagii ka awood badiyay. Markaas ayey iyagoo la garaacay oo nabaro leh gurigii ka carareen.

¹⁷ Yuhuudda iyo Gariigtii joogtay Efesos, markey arintaas maqleen aad ayey u cabsadeen oo magaca Sayid Ciise ammaaneen.

¹⁸ Dad badan oo rumeysteyna banaanka ayey u soo baxeen oo wey qirteen waxa xun ee ey sameyn jireen.

¹⁹ Qaar sixir sameyn jireyna buugoodi ayey keeneen oo waxey ku gubeen dadka hortooda. Qiimahii buugaagtaas markii la sameeyay waxey noqotay qiyaastii konton kun.

²⁰ Sidaa darteed ereygii Rabbigana aad ayuu u faafay wuuna xoogeystay.

²¹ Waxyaalahan oo dhan goortay dhaceen kadib ayaa Bawlos go’aansaday inuu tago Yeruusaalem, isaga oo sii dhex marayo Makedoniya iyo Akhaya. Wuxuuna yiri, “Halkaas markaan gaaro kadib waa inaan tagaa Rooma.”

²² Markaas ayuu wuxuu Makedoniya u diray laba kuwii isaga caawinaayay oo ah Timoteyos iyo Erastos, isagiina muddo ayuu ku haray Aasiya.

Rabshadii ka dhacday Efesos

²³ Isla waqtigaas rabshado waaweyn ayaa ka dhacday Efesos oo ku saabsan jidka Rabbiga.

²⁴ Tumaal lagu magacaabi jiray Deemeetriyos, ee u sameyn jiray macbad qalin ah Arteemis, oo u keeni jiray ganacsi fara badan farsamo yaqaanada halkaas.

²⁵ Deemeetriyos wuxuu iskugu wacay kuwii ey isku shaqada ka shaqeynayeen, oo ku yiri, “Saaxiibayaalow waad ogtihiin inaan shaqadan lacag fiican ka helno.

²⁶ Waana aragtaan oo xitaa waad maqashaan ninkan Bawlos inuu dad badan qanciyay, Efesos kaliya maahee xitaa illaa Aasiya. Oo wuxuu ku hadlayay in illaahyada gacmaha lagu sameeyay eysan illaahyo ahayn.

²⁷ Qof walbana wax xun ayuu ka sheegayaa ganacsigeena, xitaa macbadka illaahadda Arteemis khatar ayuu ku jiraa, waayo Aasiya oo dhan ayaa laga caabudi jiray iyo xitaa aduunka laakiin hadda weynaanteeda waa la ilaawi doonaa.”

²⁸ Shaqaalihii ayaa markey arintaas maqleen aad uga xanaaqay oo waxey bilaabeen iney qayliyaan iyagoo leh, “Waxaa weyn Arteemista reer Efesos!”

²⁹ Magaaladii oo dhan ayaa rabshad ka dhacday. Dadka qaar ayaa waxey qabteen Gayos iyo Aristarkhos kuwii uu Makedoniya Bawlos kala yimid. Markaas ayaa waxey si dhaqso ah u aadeen meeshii uu kulanka magaalada ka dhacayay.

³⁰ Bawlos wuxuu doonayay inuu dadkii badnaa hor istaago laakiin xertii ayaa u diiday.

³¹ Xitaa kuwo ka mid ah madaxda Aasiya oo saaxiibadii Bawlos ah ayaa fariin u soo diray oo ka baryay in uusan tagin meesha kulanku ka dhacaayay.

³² Dadkii oo dhan ayaa wareersanaa, qaar wax ayey ku qaylinayeen, qaar kalana wax kale ayey ku qaylinayeen. Badidooda ma garaneynin waxey meesha u joogaan.

³³ Yuhuuddii meesha joogtay ayaa nin Aleksanderos la dhaho hor keenay dadkii badnaa, oo waxey ku dhaheen wuxuu sheegi lahaa. Wuxuu doonayay inuu dadka hortooda isku difaaco.

³⁴ Laakiin markey ogaadeen inuu yahay Yuhuudi, iyagii oo dhan ayaa muddo laba saac ah qaylinayay iyagoo leh, “Waxaa weyn Arteemis, reer Efesos!”

³⁵ Nin madaxda magaalada ka mid ah ayaa yimaaday oo aamusiyay dadkii, oo yiri, “Reer Efesow, yaan garaneyn magaalada iney tahay tan ilaalisaa macbadka Arteemista weyn iyo sawirkeeda tan ka imaatay samada?

³⁶ Sidaa darteed qofna taas ma diidi karo, ee aamusa oo waxyaala doqonnimo ah ha sameynina.

³⁷ Nimankan aad halkan keenteen waxba macbadka kama xadin wax xunna kama sheegin illaahaddeena.

³⁸ Haddii Deemeetriyos iyo shaqaalahiisa ey wax ku haystaan nimankan waxaa jira maxkamaddo ee hasoo dacweeyaan.

³⁹ Haddii wax kale jiraanna oo aad sameyn rabtaanna waa in la keeno sharciga hortiisa.

⁴⁰ Haddaba khatar ayaan kujirnaa rabshadii maanta darteed iyadoo aanan sabab u haynin. Oo waxna ka sheegi karin.”

⁴¹ Markii uu waxyaalahan yiri kadib ayuu kala diray dadkii.