Ịnahụmị 3 - IWE ỌNỊNỊ

Ohomorihi vaa sị ụya rị Anininivẹ Ẹnẹyịmavara kà

¹ Ụ vaa daa re ẹkụra ana wụ̀ aza ha, ẹkụra ọ dọ ọọza mẹ anị, ẹkụra evene, ẹkụra ọnị ako ọnịrị ezigi ẹ yị ma ta hụụnị anị!

² Batọ! Ijapa aa sụ waanyị-waanyị aanị nọọ, dị ahụ ịkẹkẹ ịrẹkụ aa sụ́ chịyị-chịyị bẹẹ nị, dị ahẹtẹ umaata aa sụ́ gidiba-gidiba, ịkẹkẹ ịrẹkụ aa sụ́ waga-waga vẹ aanị nọọ!

³ Isoja ọnịrị umaata ẹnịnị ee ne vẹ, dị ẹ yaa mi ụhwọ ọnịrị ọha ẹnịnị nyanga-nyanga kẹnẹ nị. Oku ene su hi ẹtẹ ẹẹ nẹba gụma-gụma, ọza ẹ yị zụ yẹ ịrịka aza ene su. Oku vị ọnị aza aa hyẹdụ vanga jịnẹ ẹ kẹnẹ.

⁴ Ẹkụra Ininivẹ vị ana aa mẹ̀ ebira anka ọsẹrẹka avọọ nị. Uzoza anị ọnịrị ịrakwọ eē si vene anẹkụra ana vọ ngụ ụvọ nị.

⁵ Ẹnẹyịmavara Ochẹtẹẹngụ kà, ọnị vaa sị ụya rị Ininivẹ! Ọnị vaa tụ́ wa ahwaahụ dị anẹkụra ọzọza ee re e, dị ọnị mẹ̀ ụhị nyị wa eyi avaba ẹkụra irenyi-irenyi.

⁶ Ẹnẹyịmavara kà ọnị vaa mẹ̀ ka aa nyị ịhyẹrẹ Ininivẹ. Ọnị vaa va wa nẹtẹ, dị ọzọza kụkụ aa sị eyi kẹnẹ-kẹnẹ re wa.

⁷ Dị avaba aza ene èe re e, di e yee mi ịrẹsụ kẹnẹ. Ẹ vaa kà a ka Ininivẹ ọ́ maanị jị eburu aanị nị! Ẹnẹ vaa va vayị yọ? Ẹnẹ vaa sị ayị anị nẹtẹ?

⁸ Vị Ininivẹ wáá dahi huu Itebesi ana vị ohyẹtẹ ẹkụra ẹtẹ Ijipiti nị? Ọnị ọ rẹ nyị irehu anaā dọ ọ tụ anka ọvọ mẹ dọ Ininivẹ tụ avọọ. Irehu Ịnayịrị va ana kara a.

⁹ Itebesi vị ana sị ịrẹma ka ẹkụra Anikusi ọnịrị Ijipiti. Dị Iputi ọnịrị Aniribiya vị ọnọgụvọ anị nị.

¹⁰ Anẹkụra ẹnẹẹ ẹ yị va zụ za ka asị a za Anitebesi nịnị ọrịhị na ngụ ẹkụra ọsa. Ezweyi ẹnịnị vị ene vee tụ́, dị aa wụ̀ wa va hi avaba oze ene hi ịnị ẹkụra. Aza ọkọọka ẹnịnị vị ẹnẹ ẹ vaa ga hi ẹngụ ụvọ. Dị ẹ tụ wa ẹchẹkẹchẹẹkẹ, dị ẹ kụ́ wa nọ ẹkụra ọsa.

¹¹ Anininivẹ vaa vanga anka ọza ọnị eche aa mẹrị avọọ. Ẹ vaa sị vụrụ ka ẹnị e zwe ẹ̀ yị ọnịvị ẹnịnị nị.

¹² Avaba aha ọyịtẹ̀ ẹnịnị sị mẹẹ anka ọchị ihwigi ọnị ẹtụtụ ịpaapa vi hi ịrẹsụ anị avọọ nị. Èe ziizi ọchị anị kẹnẹ dị ẹ hụrẹ va hi ẹtẹ yị ọza ọnọọ, dị ọ rị ọ.

¹³ Ọkụrẹkụ Anininivẹ tụ ọkụmị anka anyẹnẹẹ avọọ. Avaba oze ọbanyị ana ngụ ẹkụra vị ana na hi ẹtẹ yị ọnịvị nịnị. A vaa rị ọchojoze ọbanyị ẹnẹẹ ịra.

¹⁴ Òo zee eyi wa chi ahata kara ẹkụra awụ, dị wa da enyi hi ọ, òo zee eyi wa jị ụvụ, dị wa tụra ọvọ kara ẹkụra awụ nịnị, ọnịvị awụ nịnị vị ana aa yịị vẹ.

¹⁵ A vaa rị wa ịra, à vị dị aa sị ụhwọ sẹ wa. Aa vaa hụ́ wa anka akụvarịva mẹẹ̄ rị ịsa ịnị aarẹ avọọ. Ẹ yị nyị ẹnịnị mẹmẹ sị rụrụ.

¹⁶ Osohu ene hi ịnị ẹkụra awụ nịnị ẹ̀ẹ daka rụrụ hụụnị ụzọmị ẹbẹẹba. Ẹnịnị vaa ta anka akụvarịva o rere rị avaba ịsa hụrẹ ẹtẹ, di e hira aa na avọọ.

¹⁷ Ọkụrẹkụ ọnịrị ọdọvịdị Anininivẹ vi ene vee zwe anka akụvarịva ana tara ku ọvọ ịnị ụmẹ ahị avọọ. Ama ịjị ọyị ọ̀ọ da eyi zụ́ kẹnẹ, di e hira nọ ịzị ọza ẹ yị yẹ.

¹⁸ Ohinọyị Asiriya, ọdọvịdị ẹkụra nịnị ọnịrị Ịgọvọnọ nịnị ẹ zị nọ iroo. Anẹkụra anị ẹ sị gara hi ịrẹsụ ataba. Ẹ sị mẹẹ anka atẹmẹ ẹnẹ ẹ yị nyị oseratẹmẹ avọọ nị.

¹⁹ Ụnava ọnị ọ tọ̀ aanị o divi ẹtẹẹtẹrẹ, ẹ yị nyị eyọtụra. Ama avaba aza ana vaa wụ́ ọ vị ana vaa jẹ, dị ẹ yaa gụ ahụ Àa nyị ọza ana ha hụụnị ayịchamayị awụ?