Ẹzịra 10 - IWE ỌNỊNỊ

Aza e ro ịnẹ hụụnị ebira odivi

¹ Ẹzịra mẹ̀ vavọọ yi ku ẹtẹ aa mẹ̀ aduwa ọvịdị irehi Ohomorihi, dị aa jị òrèrè, dị aa kụ ẹngụ anịị nya ẹtẹ nị. Aa dọ irenu ịvị ẹnẹnị dị ọkọnị Anisirẹrị, anọrụ, anẹẹ, ẹnịrị ezweyi va gụ kara a nị. Aza ẹnẹẹ nyẹmba vị ana raa jị òrèrè ọngwọọngụ.

² Dị Isekaniya ozi Ijehiyẹrị ana hụụnị ovwoovu Erami kà, Ẹzịra ẹnị ẹ raà mẹ akamawụ hi Ohomorihi ịnị anẹẹ anikinami ẹnẹ ẹnị na nyị aanị. Ama o yi du ta hị́ Anisirẹrị ụvọ.

³ Booro aanị, ọ sị vị abaabo ka ẹnị hụrẹ anẹẹ anikinami ẹnịnị ọnịrị ezi ẹnịnị ụvọ ka ẹẹ nọ eehi ẹnịnị anka ajuwe ọnị Ẹzịra ọnịrị aza ana sị ụvọ za ọda Ohomorihi sị yị ẹnị aanị.

⁴ Dị ọ kà a yị Ẹzịra ka ọ̀ kwẹẹtẹ ọ̀ mẹ ịsị a vọrọ ka ọ̀ mẹ, ka ọnị ịrẹyị ọnọnị ya ịnị ụvọ anị nị. Asị o hí angwa ka ẹnị vaa jẹẹ ịrẹma anị.

⁵ Dị Ẹzịra kwẹẹtẹ dị ọ mẹ ka, ohirẹsụ ẹbanyị irehi Ohomorihi nịnị ọnịrị Anireevi nịnị beri Anisirẹrị nịnị ana vọ ẹ̀ hị́ eku ka ẹnị vaa saasa ịrẹyị ọnị Isekaniya kà nị.

⁶ Dị Ẹzịra va hụụnị irehi Ohomorihi dị ọ na sụ ịnị eehi Ijehohananị ozi Eriyasibi nị. Ịsa ana Anisirẹrị nịnị mẹ ộ zị Ẹzịra ẹngụ dị ọ̀ yị rị ịsa dị è yi hú enyi nị.

⁷ Â tụ́ ụtụ ngụ avaba Ijerusarẹmị ọnịrị Ijuda ka avaba aza ana vavẹ hụrị Ịbabịrọnị ẹ̀ va gẹ Ijerusarẹmị

⁸ Ọdọvịdị nịnị ẹnịrị azọkụ nịnị ệ mẹ ọda ka, ọ̀ọ naa mẹ ẹkụhị ẹẹta dị a nyị ọza ẹnẹ ẹ̀ yị vẹ nị, a vaa dọ ọ avaba ogu anị, dị a dụ ọ hụụnị akakana aza ana hụrẹ Ịbabịrọnị vavẹ eehi.

⁹ Ịhyẹgwẹta anị, ana vị ẹkụhị oohu ịnị ụhwẹ ịhịịna, dị avaba aza hara hụrị ẹtẹ Ịbẹnjamịnị ọnịrị Ijuda va gụ Ijerusarẹmị, dị ẹ yaayịtẹ hi ini orere ọvịdị irehi Ohomorihi Ịrẹyị ọnọnị ọnịrị orihi ọrata anaa zụ ộ mẹ̀ ka avaba ẹnịnị ẹẹ da ẹgahị.

¹⁰ Ẹzịra ana vị ohirẹsụ irehi Ohomorihi ộ kwẹẹtẹ, dị ọ kà ịrẹyị yị wa nị. Ọ kà ẹnịnị ẹ raà sị ahụ jị ọda Ohomorihi. Anẹẹ anikinami ẹnẹ ẹ nyị vị ana ka Anisirẹrị nịnị ngụ ịvị huni avọọ.

¹¹ Dị ọ kà, obobooro ọnọọ ẹ dọ irenu ịvị ẹnịnị yị Ẹnẹyịmavara, Ohomorihi ohiku ẹnịnị, dị ẹ mẹ̀ ịsa ọnị o sì. E yi anẹẹ anikinami ẹnẹẹ tịtẹ, dị asị ẹnịrị anikinami nịnị ana ra kara wa kụkụ mẹ ụ̀na.

¹² Dị avaba ịragụ ana gụ nowu tụ ẹba, dị ẹ kà avọọ yọ nị. Ẹnị vaa mẹ̀ ịsa tụra ịsa ọnị Ẹzịra ọ́ọ kà.

¹³ Ama aza ẹ sị rụrụ, dị orihi aa zụ nị. Aza ẹ yị vavọọ vaa zụ jẹẹ ịnị orihi ana zụ aanị. Ẹnị ẹ rụrụ ana nyị anẹẹ anikinami. Ẹkụhị ọnya a vị ẹkụhị ẹẹva ẹ yị vaa hụ mẹ eto ịrẹyị ọnọọ.

¹⁴ Dị ẹ kà ọdọvịdị ẹnịnị ẹ jẹẹ Ijerusarẹmị, di e tenyi ịrẹyị ọnọọ yị ẹnị? Dị avaba aza ana nyị ụvọ tụ ịnị ịvị ọnọnị ẹ ve tụ ọdọvịdị ọnịrị ọmọkarẹyị nịnị ana hụrẹ ẹkụra ọzọza vẹ. Ẹnị ẹ̀ẹ vavọọ mẹ, Ohomorihi ẹ yị kụkụ vaa vaa vavọọ kụ ayị hi ẹnị.

¹⁵ Ẹ yị nyị ọza ẹnẹ ẹ yị dọ eto ọnọọ ẹ̀ yị vị Imesurami ọnịrị Isabetayi ana vị Anireevi. Ijonatani ozi Asiheri ọnịrị Ijahizeya ozi Itikiva ẹ vị aza ana dọ beri wa nị.

¹⁶ Dị avaba aza ana vọ ana hụrẹ Ịbabịrọnị vẹ dọ eto ana mẹ aanị nị. Agụvị avọọ dị Ẹzịra ana vị ohirẹsụ irehi Ohomorihi nyị aza hụnị ohirẹsụ ịrẹsụ-ịrẹsụ, dị a chẹrẹ ịrẹha ẹnịnị tịtẹ nị. Ịnị ẹkụhị ịpaapa ịnị ụhwẹ ẹẹwụ e nyima aa jị irenu ngụ ịrẹyị aza ana nyị anẹẹ anikinami nị.

¹⁷ Ịnị ụhwẹ ọhụta anị, e re si iruvo avaba ịrẹyị ẹnịnị ta.

Anọrụ ana nyị Anẹẹ Anikinami

¹⁸ Ezi ohirẹsụ irehi Ohomorihi nịnị ana nyị anẹẹ anikinami ẹ vị ezi Ijesuwa ozi Ijozadaki ọnịrị ẹyịnyara anị Imaseya, Eriiza ọnịrị Ijaribi neberi Igidarịya.

¹⁹ Avaba ẹnịnị ê hị́ eku ka ẹnị a hụrẹ anẹẹ anikinami ẹnẹ ẹ nyị ụvọ tịtẹ, dị ẹnị ẹ sị ịdẹba mẹ̀ ịsọvọ ịvị ọnị ẹ mẹ.

²⁰ Ihanani, ọnịrị Izebadiya hụụnị ovwoovu Imeri.

²¹ Imaseya, Erija, Isemaya, Ijehiyẹrị ọnịrị Uziya hụụnị ovwoovu Iharimi.

²² Eriyoyenayi, Imaseya, Isimẹrị, Ịnẹtanẹrị, Ijozabadi ọnịrị Eriisa hụụnị ovwoovu Ipasihuri.

²³ Anireevi ana nyị anẹẹ anikinami ẹ vị Ijozabadi Isimeyi, Ikeraya (ọnị a raa hị́ Ikerita), Ipetahiya, Ijuda ọnịrị Eriiza.

²⁴ Eriyasibi ana vị ọjahẹ ộ nyị ọnẹẹ anikinami. Ẹnị Oserẹtẹ ịnị irehi Ohomorihi ana nyị anẹẹ anikinami ẹ vị Isarumi, Ịtẹrẹmị ọnịrị Uri.

²⁵ Anisirẹrị ana vọ ana nyị anẹẹ Anikinami yị; ẹnị ezi Iparosi ẹ vị Iramiya, Iziya, Imarichija, Imijamini, Eriyaza, Ihasabiya ọnịrị Ịbẹnaya.

²⁶ Imataniya, Ịzakaraya, Ijehiyẹrị, Abidi, Ijeremoti ọnịrị Erija vị ezi ịnị ovwoovu Erami.

²⁷ Dị aza ana hụụnị ovwoovu Izatu ẹ vị Eriyoyenayi, Eriyasibi, Imataniya, Ijeremoti, Izabadi, ọnịrị Aziza nị.

²⁸ Dị Ezi ịnị ovwoovu Ibebayi ẹ vị Ijehohananị ọnịrị Ịhananịya neberi Izabayi Atirayi nị.

²⁹ Dị Ezi ini ovwoovu Ibani ẹ vị Imesurami, Imaruki, Adaya, Ijasubi, Iseri, ọnịrị Ijeremoti nị.

³⁰ Dị Ezi ịnị ovwoovu Ipahati Imowabi vị Adina, Cherari, Ịbẹnaya, Imaseya, Imataniya Ibezareri, Ibinuyi ọnịrị Ịmanasẹ nị.

³¹ Aza ana hụụnị ovwoovu Iharimi ẹ vị Eriiza, Isiya, Imarichija, Isemaya, Isimiyọnị,

³² Ịbẹnjamịnị, Imaruki ọnịrị Isemariya.

³³ Aza ana hụụnị ovwoovu Ihasumi ẹ vị Imatenayi, Imatata, Izabadi, Erihwẹrẹtị, Ijeremayi, Ịmanasẹ ọnịrị Isimeyi.

³⁴ Aza ana hụụnị ovwoovu Ibani ẹ vị Imaadayị, Amịramị, Uweri,

³⁵ Ịbẹnaya, Ibediya, Ikeruhi,

³⁶ Ivanịya, Imeremọtị, Eriyasibi,

³⁷ Imataniya, Imatenayi ọnịrị Ijaasu.

³⁸ Aza ana hụụnị ovwoovu Ibinuyi ẹ vị Ibani, Isimeyi,

³⁹ Iseremiya, Inatanị, Adaya,

⁴⁰ Imachịnadẹbayị, Isasayi, Isarayi,

⁴¹ Azarẹrị, Iseremiya, Isemariya,

⁴² Isarumi, Amarịya ọnịrị Ijosẹẹhụ.

⁴³ Aza ana hụụnị ovwoovu Inebo ẹ vị Ijeyẹrị, Imatitiya, Izabadi, Izebina, Ijadayi, Ijowẹrị, ọnịrị Ịbẹnaya.

⁴⁴ Avaba anọrụ ẹnẹnị ẹ nyị anẹẹ ana vị anikinami nị. Ẹnịnị ê yi wa, dị ẹ dụ ẹnịrị ezi ẹnẹ ma yị wa nị.