Ayịsaya 63 - IWE ỌNỊNỊ

Ohomorihi ô họ̀ oponu ịrẹsụ Anedomi

¹ Ẹnẹ ọnị ọnọnị vị ana hụrị Ibozira ịnị ẹtẹ Edomi aa vẹ aanị kẹ? Ẹnẹ kụ́ ẹnya ovivi chomi-chomi hí ẹngụ, di e hu ahụ ọkọọka ịnị ụbanyị ụkata anị vẹ aanị? Ẹnẹyịmavara ana hụ ọ dọ ọza ha aa vẹ vaa nọ̀ ka ọnị ọ raà nyị ehuna.

² Sị ẹ vẹ dị awuru anị ee vi anka ọza ana kwọrọ igirepi anaā sị̀ mẹ eche avọọ?

³ Dị Ẹnẹyịmavara tụ ohi kà a ọnị ọ raà kwọrọ avaba Anẹkụra nịnị anka a mẹẹ̄ kwọrọ igirepi avọọ, dị ẹyị nyị ọza ana vẹ ịnị ọgụvọ anị nị. Ayị ộ kụ ọnị dọ ọnị kwọrọ wa, dị ẹnịnị sì ku avaba achị anị ana a dọ ọ ọtị nị.

⁴ Ẹnẹyịmavara kà ụmẹ ọnị a sị dị aza anị ha o si tu. Ụmẹ o si tu ka ọnị ọ sị ụya rị ọnịvị aza anị nịnị.

⁵ Ọ kà ọnị ô kana eyi, dị ọnị re ka ẹ yị nyị ọza ana zụ gụ ọnị ụvọ. Ama dị ụkata anị sị ọnị nyị ehuna, dị ọyịkụ anị sị ọnị jẹẹ nị.

⁶ Ịnị ọyịkụ anị ọnị ộ sị avaba anẹhẹ mẹ ịyẹyẹ, dị ọnị gara wa, dị ọnị va ẹnịnị hi ịrẹsụ nị.

Ọyịza ọnị Ẹnẹyịmavara mẹ̀ yị Isirẹrị

⁷ Ayịsaya ka ọnị vaa kà a Ẹnẹyịmavara mẹmẹ aa ngụ ayị ẹnịnị. Ọnị aa ga a agụvị avaba ọyịza ọnị ọ mẹ yị ẹnị, dị mẹ ize yị Anisirẹrị nịnị agụvị ka ộ vayị ẹnịnị, di o sì ịrẹyị ẹnịnị pooro nị.

⁸ Ẹnẹyịmavara kà aza anị ẹ vị nị, ẹnịnị ẹ yị vee vene ọnị. Agụvị avọọ ọ dọ wa ha

⁹ hụụnị avaba ụya ẹnịnị nị. Ẹnẹyịmavara ụvọta ọ dọ wa ha, ẹ yị vị anggẹẹrị. Ộ dọ wa ha agụvị oyisì ọnịrị ayamva anị, ộ vịdị tẹsị ẹnịnị hụrị ẹtẹẹtẹ.

¹⁰ Ama ẹnịnị ệ mẹ akamawụ hi ọ ene du Ụhwẹ Ọnịnị ayị. Agụvị avọọ Ẹnẹyịmavara vara ọnịvị ẹnịnị, dị ọ vara eyi ịraazị ka wa nị.

¹¹ Ama Ẹnịnị ệ tamayị ịsa ana mè ịnị ụmẹ Imosiisi ozi ahụ Ẹnẹyịmavara. Ê họ̀ use ka ịzị Ẹnẹyịmavara ana dọ ọdọvịdị aza anị ha hụụnị Oku Ovivi? Ịzị Ẹnẹyịmavara ana sị ụkata yị Imosiisi ya?

¹² Ọnị ộ mẹ̀ ka ụkata igirima anị ọ ya pe Imosiisi ọnị ọ sị ga oku hi. A vaa ga a pooro zịna-zịna nị.

¹³ Ọnị ộ kụ aza anị jịnẹ enyi anka umaata ee zwe echi ini ozi, dị ẹ yị tụ ahụ avọọ nị.

¹⁴ Ọnị ọ sị ụkata anị sị ụhwọtụ yị wa anka imaaru ana kụ nọ ịnị ozi na tụ́ ụhwọ́ avọọ nị. Ộ mẹ̀ ka aa ga Ẹnẹyịmavara.

¹⁵ Ẹnẹyịmavara navọ wa va eyi chi vẹ hụrẹ ẹbẹẹba, aha ọnịnị ọnịrị ụbanyị awụ, dị wee re ịsa ana aa na.

¹⁶ Ẹwa vị ada ayị nị. Ohiku ayị Abụrahamị ọnịrị Ijekọvụ ẹ yị yẹ yị, ama ẹwụ Ẹnẹyịmavara ọ vị ada ayị. Ẹwa vị ọza anaa dọ yị ha pooro nị.

¹⁷ Sị ẹ vẹ dị ụ navọ ka ya ha hụrẹ oze awụ? Sị ẹ vẹ dị ụ mẹ̀ yị ọnịrẹsụ ọkatẹngụ ana mẹ̀ ka ya va hụụ ịrẹma wụ? Navọ wa vavẹ agụvị aza anaa hẹkẹ wụ ọnịrị aza ana ahịka awụ ẹ vị pooro nị.

¹⁸ Ọnịvị ayị vị ana dụ ẹyị aza ọnịnị awụ ịnị ụmẹ chee: dị ẹ sị irehi ọnịnị awụ mẹ̀ ịyẹyẹ.

¹⁹ Ụ mẹ̀ yi anka aza ọnị wẹ yị vị ọdọvịdị anị avọọ. Ọ sị mẹ anka ị yị vị aza awụ avọọ nị.