2 Ịtọpa 28 - IWE ỌNỊNỊ

Ahazi ộ vị ohinọyị Ijuda

¹ Ịrayị ohu Ahazi vị dị ọ rị ohinọyị Ijuda ọnị ọ mẹ̀ ịrayị ẹwụrịhịnọnyị Ijerusarẹmị nị. Ộ hama ebira ọyịza Idevidi ana vị ohiku anị. Ộ mẹ̀ ebira ene e yi hine Ẹnẹyịmavara ayị vụrụ-vụrụ.

² Ộ saasa ebira odivi ohinọyị Anisirẹrị nịnị nị. Ộ sị enyusẹ tụ́ ịsa ene vene ori ana a hị́ Ịbaarị.

³ Ịnị ozi Ihinọmị ọ ya aa rị eturare ịra yị ori ẹnẹẹ nị. Ezi Anọrụ anị vị ọnị ọ hyakụ rị ịra ịnẹ ịsọvọ yị ori ẹnẹẹ. Ebira enyisi ọnị aza ọnị Ẹnẹyịmavara dụ kwooze yị Anisirẹrị nịnị aa saasa nị.

⁴ Aa na aha ori ene hi ịrẹsụ ataba ọnịrị avaba ọchị ẹbanyị nịnị naa mẹ̀ ịsọvọ, dị ộ rị eturare ịra hi ori ẹnẹẹ Anisirẹrị ọnịrị Anisiriya ẹ̀ gẹ ịrẹkụụ Ijuda.

Isiriya ọnịrị Isirẹrị ê va eyi ka Ijuda

⁵ Ohinọyị Ahazi ộ mẹ̀ ebira odivi, dị Ẹnẹyịmavara ana vị Ohomorihi anị navọ ọ ka ohinọyị Anisiriya ô huna a eyi ịrẹkụ, dị ọ kụ́ Anijuda ọrụrụ-ọrụrụ ọnị ọ za ọrịhị vavẹ va ngụ Ịdamasịkọsị nị. Avọọ Ịpẹka ozi Iremaraya ana vị ohinọyị Anisirẹrị ịnị ụmẹ ọnọọ mẹ rẹ nyị ẹbẹẹba Ahazi, dị ọ nyayịnẹ wụ̀ aza anị va ha nị.

⁶ Ka ohinọyị Ahazi ộ mẹ̀ ịvị, Ẹnẹyịmavara Ohomorihi ohiku nịnị hụrẹ ẹ ụvọ ka Ịpẹka ộ wụ̀ ọkọọka isoja Anijuda ẹnị akawụ-akawụ oze ẹbẹẹta (120,000) ịnị ẹkụhị ọnyara nị.

⁷ Ọka ịrẹkụ ọnya aanị ana vị vị Anehwireemi ọnị ịrẹha anị rị Izikiri ộ wụ̀ Imaseya ozi ohinọyị ọnịrị Azirikami ana vị ọdọvịdị irehi ohinọyị ne beri Erikana ana sị irenu tụra ohinọyị.

⁸ Isoja Anisirẹrị nịnị vị ana za Anẹẹ ọnịrị ezi Anijuda anda ẹnịnị nọ Isamariya beri ọga ẹnịnị. Avaba aza ẹnẹ ẹ kụ́ vị akawụ-akawụ oze ẹchẹẹhị.

Ọnịsẹ Odedi ộ kà ịrẹyị yị Anisirẹrị

⁹ Â nyị ọnọrụ ọnya aanị ana aā hị́ Odedi ana vị ọnịsẹ Ẹnẹyịmavara ana ra ẹkụra Ịsamarịya, ộ na gẹrẹ isoja Anisirẹrị nịnị mẹ̀ kụ́ Anijuda nịnị ẹnẹ ẹ za orihi aa vaa ngụ ẹkụra Isamariya. O me tu wa, dị ọ kà a Ẹnẹyịmavara Ohomorihi ohiku ẹnịnị ộ kụ́ ayị hi Anijuda, dị ọ navọ wa ka a nyị ẹbẹẹba ẹnịnị nị. Ama booro aanị ộ wụ́ oze odivi ẹnẹ ẹ zị wụ̀ aza ẹnịnị va ha.

¹⁰ Booro aanị ẹnịnị ee si ka eni ẹ za anẹẹ ọnịrị ezi Anijerusarẹmị ọnịrị Anijuda ọrịhị ẹnịnị. Aanịka wẹ́ẹ́ yị yẹ ka wa ra mẹ̀ ịvị hị́ Ẹnẹyịmavara ana vị Ohomorihi awụ nịnị?

¹¹ Odedi ka ẹnịnị e be ọnị átọ́. Ọ kà aza ẹnẹ ẹ za aanị vị ẹyịnyara ẹnịnị. Agụvị avọọ ẹ hụrẹ wa ụvọ ẹẹ nọ eehi. Ẹ̀ẹ yị vị avọọ, Ẹnẹyịmavara vaa kụ ayị dị ọ sị ụya rị wa.

¹² Ẹnị ẹẹna ịnị ọdọvịdị Anisirẹrị nịnị ana aa hị́ Azarịya ozi Ijehohananị, Ịbẹrẹkiya ozi Imesiremoti ê yị jẹẹ pe wa.

¹³ Ẹnẹnị ệ ka yị wa ka asị ẹ kụ́ wa vẹ ịzọọ. Ệ kà a ẹnị ẹ sị ịvị hi Ẹnẹyịmavara. Ẹnị e re du ọ ayị ana hụ ọ mẹ ka a sị ụya rị ẹnị. Booro aanị ẹnị waa ra mẹ̀ ịsa ọsa ana va da ẹnya tụ́ ịnị ẹnya yi ẹngụ ẹnya ẹnịnị nị.

¹⁴ Ịrẹyị ẹnị ẹ ka, dị isoja nịnị hụrẹ aza ẹnịrị ogu ẹnịnị yị ọdọvịdị ẹnịnị.

¹⁵ Ẹnị ẹẹyịna ẹnẹẹ aa nyị ka ẹ sì sị achị yị ọrịhị ịrẹkụ ẹnẹnị hụụnị ogu ẹnẹ ẹ kụ́. Ẹnịnị ẹ kụ́ achị ọnịrị adava yị wa, dị ẹ sị ịsọyịrị ana hụ wa rị ọnịrị enyi ọyịhu. Ệ sị angwẹ orivi tụ́ ịnị ụnava ẹnịnị ya. Aza ẹnẹ ẹ yị zụ́ zị ụsẹ vị ana sị ịkẹrịkẹtẹ sị, dị ẹ kụ avaba aza ana za ọrịhị varẹma nọ ẹtẹ Ijuda ana vị Ijeriko, ẹkụra ọsọchị Anisirẹrị ana kụ́ wa na varẹma vẹ Isamariya nị.

Ahazi ka Asiriya ẹ mẹ̀ ọgụvọ yị ọnị

¹⁶ Ịnị ụmẹ ọnọọ ohinọyị Ahazi ộ tụ́ ne tu ohinọyị Asiriya ka ọ vaa gụ ọnị ụvọ nị.

¹⁷ Ka isoja Anedomi nini ẹ rẹ raà sị ịrẹkụ hụ Anijuda, dị ẹ za wa ọrịhị nị.

¹⁸ Ịnị ụmẹ ọnọọ ọnyọọnya, Anihwirisiti nini sị ngụ tù ẹkụra ene hi iruvo ataba Ijuda ọnịrị ịnị Ịnẹgẹvị, eyi ụvẹtẹ Ijuda nị. Ẹnịnị ẹ raà rị Ịbẹtị-Isemesi, Ayijaroni, Igederoti, Isoko ọnịrị ẹkụra eweyi-eweyi anị, Itimina ọnịrị ẹkụra eweyi-eweyi anị ne beri Igimizo ọnịrị ẹkụra eweyi-eweyi anị. Ẹ mẹ sị wa rị, dị ẹ ra ẹkụra ẹnẹẹ nị.

¹⁹ Ẹnẹyịmavara ộ mẹ̀ ụhị nyị Anijuda nịnị agụvị ka Ahazi ohinọyị Isirẹrị ộ tụ́ aza ụka ka ẹẹ mẹ̀ ebira odivi. Ẹ yị mẹ ịzẹyịza ka Ẹnẹyịmavara na.

²⁰ Avọọ ohinọyị Itigilatị-Ipiresa Ẹtẹ Asiriya va eyi ịraazị ka a, dị ọ mẹ ẹvaya yọ, dị ẹ yị gụ ọ ụvọ nị.

²¹ Ahazi ộ kụ́ ẹnya irehi Ẹnẹyịmavara ọnịrị ẹnya irehi ohinọyị beri irehi ọdọvịdị nịnị, dị ọ kụ́ wa na mẹ ohinọyị Asiriya ẹyịza. Ama ohinọyị Asiriya ọ yị hụvị avọọ mẹ ọgụvọ yọ.

Ebira odivi ọdịrẹma Ahazi ọnịrị usu anị

²² Ịrẹma odivi-odivi ana maanị tu ọ aanị, ọ vana da ngụ ịnị ebira aa mẹ hi Ẹnẹyịmavara hu avọọ nị.

²³ Ộ mẹ̀ ịsọvọ yị ori irenyi-irenyi Anịdamasịkọsị ene hu ọ ẹtẹ. Ọ kà agụvị ka ori ẹnịnị ẹ gụ ohinọyị Aramị ụvọ, ọnị raa mẹ̀ ịsọvọ yi wa agụvị ẹnị ẹ rẹ gụ ọnị ụvọ. Ama dị ahịka ẹnị e vee vụ ọnịrị avaba Anisirẹrị nịnị ẹtẹ nị.

²⁴ Ahazi ọ́ kụ́ avaba ẹnya ịnị irehi Ohomorihi, dị ọ chaka rugu-rugu, di o gu avaba oze irehi Ẹnẹyịmavara kà asị a nyị ọza ana zụ mẹ hẹkẹ ịzọọ nị. Dị ọ varẹma hi ụta ori ọzọga tụ́ avaba ụtọ-ụtọ oze ene hi Ijerusarẹmị nị.

²⁵ Avọọ ọ mẹ rẹ da irehi ori hi avaba ẹkụra-ẹkụra ene hi Ijuda nị. Ebira ọnị ọ mẹ aanị ộ mẹ̀ ka ayị kụ́ Ẹnẹyịmavara Ohomorihi ohiku ẹnịnị.

²⁶ Avaba ịsa ọnị Ahazi mẹ ọnịrị ẹhẹ ọnị ọ ra vị ọnị a chẹrẹ tụ ịnị iwe ịtọpa ohinọyị Ijuda ọnịrị Isirẹrị nịnị.

²⁷ Ahazi me su, ee ne Ijerusarẹmị ama ẹ yị vị ịzị eē ne ohinọyị nịnị tụ ê ne e. Ozi anị Ihezekaya ộ rị ohinọyị tụ́ udi anị nị.