2 Ahemvo 1 - AHYERƐLƐ KRONGRON

Elia fa Ahasia bɔne si ye nyunu

¹ Ahabo wue asi ne, Moabo yɛle Yisrael nwo lɔen.

² Ahasia ahemvie bɔ ɔwɔ Samaria ne, né Ahasia wafi ye aborɔsaen ne mboma nu wate watɔ. Opurale, yiti otuli ɛbɔfoɛ mɔ kyɛ, “Ɛmɔhɔ Ekron bosoen Baal Sebubo so na ɛmɔɔbisa sɛ me puralɛ bɔ mapura ye ngɔte apɔ a?”

³ Nakoso AWURADE abɔfo sele Tisibeniɛ Elia kyɛ, “Dwɔso koyia Samaria hene ɛbɔfoɛ nemɔ, na se bɛ kyɛ, ‘Aso Nyameɛ biala ɔnne Yisrael bɔ yiti yeɛ ɛmɔkɔ Ekron bosoen Baal Sebubo so abisa ye?’

⁴ Yiti AWURADE nwa nyoo, ‘Bɛen bɔ anwonyerɛ ahã wɔ ato so ye, engofi so ndwɔso, na mmom ewue yeɛ ekowu ɔ.’ ” Na Elia sili nu hɔle.

⁵ Ɛbɔfoɛ nemɔ sa hɔle Samaria hene berɛ, na obisale bɛ kyɛ, “Nzu ati yeɛ ɛmɔasa bawa ye?”

⁶ Bebuale ye kyɛ, “Biaa bie ooyiale yɛ, na osele yɛ kyɛ, ‘Ɛ́mɔsa bɛhɔ Nana Ahasia bɔ ɔsomane ɛmɔ ne berɛ beese ye kyɛ, AWURADE nwa: Aso Nyameɛ biala ɔnne Yisrael bɔ yiti yeɛ ɛsoma maa bɛkɔ Ekron bosoen Baal Sebubo so abisa ye? Ye sɔ ti, bɛen bɔ anwonyerɛ ahã wɔ ato so ye, engofi so ngodwɔso, na mmom ewue yeɛ ekowu ɔ.’ ”

⁷ Ahasia bisale bɛ kyɛ, “Biaa bɔ ooyiale ɛmɔ hane sɔ dwirɛ ne hyirele ɛmɔ ne, ye sona sue te sɛɛ?”

⁸ Bebuale ye kyɛ, “Ye ataadeɛ ne te nwomaa bɔ nwiaa wɔ so ɔ, na wabɔ nwomaa abɔsoɛ.” Yeɛ Ahasia hane kyɛ, “Tisibeniɛ Elia ɔ.”

⁹ Nana Ahasia somane koɛhonɛfoɛ aburannu so safohene ko, ɔne koɛhonɛfoɛ aburannu bɔ sɔ safohene ne la bɛ noa ne. Safohene ne hɔle Elia berɛ. Né Elia te bokaa bie ti afia, na osele Elia kyɛ, “Nyameɛ sona, Nana nwa, ‘Dwu bra ase.’ ”

¹⁰ Nakoso Elia buale koɛhonɛfoɛ aburannu so safohene ne kyɛ, “Sɛ nde Nyameɛ sona de a, ye de see ófi nyameɛso ɔɔyera wɔ ne wɔ koɛhonɛfoɛ aburannu nemɔ.” Na see fili nyameɛso ɔɔyerale safohene ne ɔne ye koɛhonɛfoɛ aburannu nemɔ.

¹¹ Nana Ahasia sa somane koɛhonɛfoɛ aburannu so safohene ko bieku, ɔne koɛhonɛfoɛ aburannu bɔ sɔ safohene ne la bɛ noa ne. Ɔfo hɔle Elia berɛ oosele ye kyɛ, “Nyameɛ sona, Nana nwa, ‘Dwu bra ase kekesaala ye!’ ”

¹² Nakoso Elia buale bɛ kyɛ, “Sɛ nde Nyameɛ sona de a, ye de see ófi nyameɛso ɔɔyera wɔ ne wɔ koɛhonɛfoɛ aburannu nemɔ.” Na Nyameɛ see fili nyameɛso ɔɔyerale safohene ne, ɔne ye koɛhonɛfoɛ aburannu nemɔ.

¹³ Afei ye pɛen nza ne aso, Nana Ahasia sa somane koɛhonɛfoɛ aburannu so safohene ko, ɔne koɛhonɛfoɛ aburannu bɔ sɔ safohene ne la bɛ noa ne. Koɛhonɛfoɛ aburannu so safohene bɔ ɔtɔ so nza ne hɔle oobuli ndwerɛ wɔ Elia nyunu, na ɔsrɛle ye kyɛ, “Ao Nyameɛ sona, mepa wɔ kyerɛ, maa me ne wɔ ngoaa aburannu hemɔ, yɛ ngoa nwo ohia wɔ.

¹⁴ Amba, see fili nyameɛso ɔɔyerale koɛhonɛfoɛ aburannu so safohene nyɔ nemɔ, bɛ ne koɛhonɛfoɛ aburannu kure nyɔ nemɔ. Nakoso me de, ma me ngoa nwo ohia wɔ.”

¹⁵ Na AWURADE abɔfo sele Elia kyɛ, “Dwu ɛne ye bɛhɔ; nnɛsuro ye.” Yiti Elia dwuli ɔne ye bɛhɔle Nana Ahasia berɛ.

¹⁶ Na ɔhã hyirele Ahasia kyɛ, “AWURADE nwa nyoo, ‘Ɔnate kyɛ atu mmenia maa bahɔ Ekron bosoen Baal Sebubo berɛ abisa ne ati, yiti bɛen bɔ anwonyerɛ ahã wɔ ato so ye, engofi so ngodwɔso, na mmom ewue yeɛ ekowu ɔ! Nyameɛ biala ɔnne Yisrael bɔ ɛkɔhora kobisa wɔ ti kofi ye berɛ anaa?’ ”

Ahasia wue

¹⁷ Yiti Ahasia wuli, kyɛbɔ AWURADE dwirɛ bɔ ɔnate Elia so hane ne, ɔte ne ala. Ahasia wanwo baa bienzua yiti Yehoram yeɛ olili ye bia ɔ. Mmerɛ bɔ Yehoram lili bia ne, né Yuda hene Yehosafate ɔwa bienzua Nana Yehoram koso olili bia ɔ, ye afoɛ nyɔ so ɛne.

¹⁸ Afei Ahasia nwo dwirɛ ngaa ne, bɔ ɔyɔle ne, amba, bahyerɛ ye wɔ Yisrael ahemvo nwo dwirɛ nwomaa ne anu.