YONA 1 - EBAIBO INZIENUKHU

Yona yasuula okhuhulila OMWAMI

¹ Litukhu lindi, OMWAMI yal'loma khu Yona, omusiani wa Amitai.

² Yamubool'la, “Tsia Nineve, litookho likali lila, ma ofukule obubi bwalio; manyile singa obwa abandu balio bali ababi.”

³ Kata mbwo Yona yasimukha niyelukhila Ebuhisipania khulwa okhurula khu MWAMI. Yatsia Yopa, nanyoolayo eliaro eliali nilienya okhutsia Ebuhisipania. Nahaana omurungo kwoluchendo, ma naniina muliaro eliali nilitsitsanga Ebuhisipania owa yakhabeye ehale okhurula khu MWAMI.

⁴ Nebutswa OMWAMI yaruma omuyeka omukali khunyanza, ma imbumbuyeka yali eyetsingufu okhusila ma eliaro niliba mubutinyu bwokhufunikha.

⁵ Abatiyi bomuliaro bali noburi ma nibareeba obukhonyi siomundu okhurula khunyasaye uwe omwene. Kho khulwo okhwanguyia eliaro, bafuuba emisiko munyanza. Olwe yako kekholekhanga Yona yali natsiye mulwalo lweliaro ma tsindoolo tsiali nitsimwir're.

⁶ Omukhongo weliaro namunyoolamwo ma namureeba, “Busina oli mutsindoolo? Buukha osaaye khunyasayewo khulwo obukhonyi. Haundi nakhubelel'la ma nahonie obulamu bwefwe.”

⁷ Abatiyi bomuliaro nibabool'lana, “Chende khukhupe imbulu khumanye nikhutsimbi tsia wina etsichilanga nikhuba musibi yisi.” Bakhupa imbulu ma nekwila Yona.

⁸ Kho bamala nibamureeba, “Luno okhubool'le, nikhutsimbi tsia wina etsichilanga nikhuba musibi yisi? Omulimokwo nisina? Orulanga musibala sina? Oli owalwibulo sina?”

⁹ Yona nakalusia, “Ndi Omuheburania. Ndekayakayanga OMWAMI Nyasaye womwikulu, owalomba liloba nende inyanza.”

¹⁰ Yona natsilil'la okhubabool'la mbu yali niyelukhanga okhurula khu MWAMI. Abandu yabo nibaria, ma nibamubool'la mbu, “Esiokhol'le yisio siali esindu esibi okhusila!”

¹¹ Imbumbuyeka yameetekha buli lwosi, kho abatiyi bomuliaro nibamureeba, “Khukhukhole mbwena kho khwikal'le imbumbuyeka?”

¹² Yona nakalusia, “Fuube munyanza, ma yitsa okhulenjela. Manyile nise ochilanga nimunyoola omunyakhano kweimbumbuyeka yiku.”

¹³ Musilenje yisio, bateema okhuhila eliaro khundulo, nibalifukanga netsingufu tsiabwe tsiosi. Nebutswa imbumbuyeka yatsilil'la okhuba imbi okhusila, ma nibaramwa.

¹⁴ Kho balakaya khu MWAMI nibaboola, “E OMWAMI, khukhusaayanga, oralekha khutibe khulwo okhufwa khwomundu uyu tawe! Ibe, E OMWAMI niwe ochilanga yaka kosi nikekholekha; nakobulalilo bubwo.”

¹⁵ Khe bachinga Yona ikulu ma nibamufuuba munyanza, ma inyanza nelenjeela kukhwo.

¹⁶ Yaka kakhola abatiyi bomuliaro okhuba noburi khu MWAMI ma nikachila nibahaana omusango khu MWAMI khandi nibesuha okhumurumikhila.

¹⁷ OMWAMI yalaka isuche ingali okhumila Yona, ne Yona yali munda mweisuche khulwa amatukhu kataru, om'basu nobutukhu.