YOELI 3 - EBAIBO INZIENUKHU

Nyasaye alikhalachila amahanga esiina

¹ OMWAMI aboolanga mbu, “Mumatukhu yako, ma khunyinga tsana, ndakhakalusisia Yuda nende Yerusalemu obuhinda.

² Ndakhare amahanga kosi halala, ningahila mwibanda liobukhalachi elia Yehoshafati. Ebwene iyio ndakhakhalachile amahanga esiina khulwamang'ana kosi akabakhol'la abandu banje. Amahanga yako kali okhusalaania abandu banje mubibala biebucheni ma nibakabana esibala sianje.

³ Bakhupila abandu banje imbulu, khulwokhwahula nelihanga elili hena elibukula abasumba. Bakusia abasiani nende abakhaana mubuhambe khulwokhunyoola amapesa kokhukhol'la obutambi nende okhunywela amalwa.

⁴ “Nisina esia mwateemanga okhuukhol'la inywe Tiro nende Sidoni nende tsimbeka tsia Filisiti tsiosi? Mwenyanga okhuurunga elia ndakhola nohomba? Ne nimuba nimuurunga, nase bwangu namurungie inywe habwene nahabwene.

⁵ Mwabukula etsifetsa tsianje nende etsisaahabu tsianje, ma nimuhila ebindu bianje ebiolukoosi muhekalu tsienywe.

⁶ Mwakusia abandu ba Yuda nende Yerusalemu khu Bayunani, nimubahila ehale okhurula mwiloba liabwe.

⁷ Ne luno nzitsanga okhubakalusia okhurula habundu tsana aha mwabakusia. Ne namukhol'le inywe aka mwabakhol'la.

⁸ Nandekhe abaana benywe abasiani nabakhaana bakusibwe khubandu ba Yuda; ne nabo balabakusia khu Basabea, khulwibulo oluli ehale okhusila. Ise OMWAMI mal'le okhuboola.

⁹ “Landie ling'ana lino mumahanga kosi, mbu: ‘Mwerechekhe okhulwana lihe; mulange abasikari benywe; lange abasikari benywe bosi halala, ma muchiake okhutsia imbeli.

¹⁰ Mutuye amachembe kenywe kabe tsinganga, ne tsinjeso tsienywe tsibe amafumo. Kata orali netsingufu okhwola alwane lihe.

¹¹ Khole bwangu mwitse, inywe amahanga kosi akali ahembi, ma mwebunjikhe halala mwibanda.’ ” Ruma abasikaribo E OMWAMI betse okhuseera amahanga.

¹² “Okhwola amahanga kerechekhe, ma ketse mwibanda lia Yehoshafati. Ebwene iyio nakhalachile esiina amahanga kosi akali ahembi.

¹³ Obubi bwako nobwinji, mukaremule singa obuswache buremulwanga mwichesa; mukasen'ne hasi singa esinu sitsuuye tsinzabibu etsitiinyilwanga.”

¹⁴ Emikanda nemikanda chili mwibanda liobukhalachi. Litukhu lio MWAMI lili ahembi mwibanda liobukhalachi yimwo.

¹⁵ Eliuba nomwesi bimwamile, tsinyininyini natsio tsilekhele okhwakha.

Nyasaye yakhalaamile abandube tsikhabi

¹⁶ OMWAMI ahuumanga nali Sayuni; omwoyokwe kuhukumanga okhurula Yerusalemu; likulu nesibala birenganga. Nebutswa OMWAMI alasoola abandube.

¹⁷ “Ma inywe Isiraeli mulamanye mbu ise nise OMWAMI Nyasaye wenywe, omenyanga mu Sayuni esikulu sianje esitsienukhu. Yerusalemu lilaba litookho litsienukhu; kata abasuku sibalalileka khandi tawe.

¹⁸ “Ne khwitukhu yilio, ebikulu ebirambi biosi biakhabe nende emikunda chiemisabibu; ne ebiayo biakhabe khubuli esikulu; ne emichela chia Yuda chiosi chiakhetsulemwo amaatsi. Esitaho siakhasenukhe mu Hekalu yo MWAMI, khulwokhusama Libanda lia Sitimu.

¹⁹ “Emisiri liakhakwe esitsiimi, Edomu liakhabe esitsiimi esiasasikha, sichila abandu bako baseera abandu ba Yuda; ma nibeera abandu barali nesikha.

²⁰ Nebutswa Yuda nende Yerusalemu bilabamwo abandu inziayo.

²¹ Ndakharunjie es'sialia khulwe yabo aberwa, ne sindakhabelel'le abali nesikha tawe, sichila ise OMWAMI menyanga mu Sayuni.”