YOELI 1 - EBAIBO INZIENUKHU

¹ Kano namang'ana ako MWAMI yabool'la Yoeli omusiani wa Petsueli.

Abandu beekhuula okhwononibwa khwebiraakwa

² Hulile, inywe abasakhulu; reche amarwi, inywe mwesi abamenya musibala sia Yuda. Mbula ling'ana singa yili liayekholakhwo mumatukhu kenywe, kata mumatukhu kabakuka benywe noho?

³ Bool'le abaana benywe khukalio, abaana benywe nabo babool'le abaana babwe, nabo nibabool'la lisuuba lilondakhwo.

⁴ Ebietsisiche tsilekhele, obwonya buliiye; ebiobwonya bulekhele, amatakal'la kaliiye, ne ebiamatakal'la kalekhele, amahalang'ang'a kaliiye.

⁵ Buukhe ma mulakaye inywe abanywi, khupe etsikhwisi, inywe abanywi bewaini mwesi, tsinzabibu tsiokhulombakhwo ewaini indoro tsimuluywe.

⁶ Lihe lietsisiche tsitsile okhuseera esibala siefwe; tsili netsingufu, khandi netsinyingi etsiranyala okhubalwa; ameno katsio namochi singa ameno kesimba.

⁷ Tsimuluye emisabibu chiefwe, ma tsiliiye emikhuyu chiefwe. Tsikhoboye amakhoba kemisaala kosi, ma tsilekhele tsisaka tsiakhwo nitsilabile tser're.

⁸ Mwekhuule, abandu inywe singa omukhaana omuchima, owekhuulanga okhufwa khwomusaatsa owamuhamba.

⁹ Emisango chiobuswache nende echiewaini sichiliho khulwo khuhanwa mu Hekalu tawe; abesaalisi bekhuulanga sichila sibali nemisango chiokhuhaana khu MWAMI tawe.

¹⁰ Emikunda chiononibubwe, liloba nalio liekhuulanga; sichila obuswache bwononibubwe, emisabibu chiomele, ne emiseituni chinial'le.

¹¹ Mubeelele, inywe abalimi, khupe etsikhwisi, inywe abaachilanga emisabibu, sichila ingano nende esayiri, kata nende ebiraakwa bindi biosi biononekhele.

¹² Emisaala chiemisabibu nende emikhuyu tsinial'le; emisaala chiamatunde chiosi chiomele ma chifwiye. Obusangali mubandu bukor're.

¹³ Mwebiikhe tsingubo tsiamakunia nimwekhuula, inywe abesaalisi abarumikhanga khulusambwa. Tsie mu Hekalu ma mwekhuule obutukhu bwosi! Omusango kwobuswache nohomba okweiwaini, sikulikhwoho khulwokhuhanwa khu Nyasaye wenywe tawe.

¹⁴ Mulake litukhu liokhuhonga okhulia, ma mulange abandu mwibukaana. Mubunjelesie abemeli nende abandu bosi abamenya musibala sia Yuda betse mu Hekalu yo MWAMI Nyasaye wenywe, ma mulakayile OMWAMI.

¹⁵ Litukhu lio MWAMI lili ahembi; litukhu elio MWAMI naleere okhumumwa. Liakhabe litukhu liokhuriisia okhukali.

¹⁶ Ebiraakwa biononibwanga, nefwe nikhureyekhwo imoni. Kata obusangali sibuli mu Hekalu ya Nyasaye wefwe tawe.

¹⁷ Tsimwo tsiomele ma tsikoreye mumaloba; khubula obuswache bwokhureela, ebiachi bibulamwo obuswache.

¹⁸ Tsing'ombe tsiananga khulwobutsune, sichila obunyasi bubula mubwayilo. Ne kata ebiayo biamakondi bili khubutinyu.

¹⁹ E OMWAMI, khulakayilanga ibe, sichila omul'lo kusambile obwayilo bwomusitsiimi, ne tsimemo tsiakwo tsisambile obwayilo bwomumikunda.

²⁰ Kata tsinyama tsiomubulimo tsikhulakayilanga ibe, sichila emichela chiamaatsi chikhamile, ne omul'lo kusambile obwayilo bwomusitsiimi.