YEREMIA 1 - EBAIBO INZIENUKHU

¹ Esitapu sino siahandikwamwo amang'ana akal'lomwa nende Yeremia omusiani wa Hilikia, owali mulala khubesaalisi be litaala lia Anatsotsi elili mulusoma lwa Benjameni.

² OMWAMI yal'loma khu Yeremia mumuhika kwelikhumi nakhataru muburuchi Yosia omusiani wa Amoni, omuruchi wa Yuda.

³ Khandi OMWAMI yal'loma khu Yeremia olwa Yehoyakimu omusiani wa Yosia yali nali omuruchi wa Yuda. Olunyuma lwobul'lomi yibwo, OMWAMI yal'loma khuye ali akhenji okhwola mumuhika kwelikhumi nal'lala okwoburuchi bwa Sedekia omusiani Yosia. Mumwesi kwakharano mumuhika yikwo abandu bemwitookho lia Yerusalemu batilwa nibahilwa mubuhambe.

Okhulangwa khwa Yeremia

⁴ OMWAMI yambool'la mbu,

⁵ “Olwa ndali nisili okhukhulombela munda mwa mamawo, ndali nindakhwela, khandi nosili okhwibulwa ndali nindakhura sibeka ma nikhukhola omuroobi khubetsimbia.”

⁶ Nase ningalusia mbu, “Aa OMWAMI Nyasaye! Lola ise sindamanya khul'loma tawe; ndi butswa omwana muti.”

⁷ Nebutswa OMWAMI niyambool'la mbu, “Oraboola mbu ibe oli omwana muti tawe, nebutswa ibe otsie khubandu bakhurumangakhwo, ma obabool'le kosi akanakhulake okhuboola.

⁸ Orabba noburi khubo tawe sichila nambe nindi n'nawe khulwa okhukhulinda. Ise, OMWAMI mal'le okhuboola!”

⁹ Kho OMWAMI nanyiila omukhono kukwe ma natila khumunwa kwanje ma niyambool'la mbu, “Huyia Ise khuhetsanga amang'ana kokhoyele khul'loma.

¹⁰ Olwaleelo khuhetsanga obunyali khubetsimbia nende amahanga khulwo khu keha nende okhukakoka hasi, okhukasasia nende okhusukhania obwami, okhukombokha nende khukasimikha.”

Obusukhi bwebindu b'bili

¹¹ OMWAMI yali okhuureeba mbu, “Yeremia nisina esiololanga?” Nase ningalusia mbu, “Ndolanga olusaka lwomusaala kwomukhuyu.”

¹² OMWAMI naboola mbu, “Oli habwene, sichila ise mengelesianga okhulola mbu amang'ana kanje kahesikhile.”

¹³ Khandi OMWAMI yamala nal'loma khu ise nareeba mbu, “Nisina esindi esiololanga?” Nase ningalusia mbu, “Ndolanga indabu yamaatsi kapapachilangamwo elubeka lwesinyolu ne eli ahembi okhusundukha ino.”

¹⁴ OMWAMI niyambool'la mbu, “Okhumumwa khulichiakila elubeka lwesinyolu khubandu bosi bamenyele musibala muno,

¹⁵ sichila nzia okhulanga tsinzibulo tsiosi etsili esinyolu okhwitsa. Abaruchi babwe bakhare tsindebe tsiabwe tsiobwami mubilibwa bia Yerusalemu nende khumasisi kalio kosi khandi khumatookho ka Yuda kandi.

¹⁶ Ndakhahaane esinyasio khubandu banje sichila bayona; bayikhupa omukongo, ma bahaana emisango chiabwe khubanyasaye bandi khandi balomba ebiniini ebia bekayakayanga.

¹⁷ Werechekhe Yeremia; ma otsie obabool'le amang'ana kosi aka nzia okhukhulaka obabool'le. Orabbaria luno tawe khase ndakhakhukhola okhuba omuri okhusila olwa nobe nooli n'nabo.

¹⁸ Olwaleelo mal'le okhukhukhola ibe okhuba singa litookho liasirwa nelisisi, khandi singa esiilo eyalombwa khusibia, khandi singa lisisi liomukasa khulwokhwikal'la esibala siosi, nabaruchi ba Yuda, nende abemeli, nabesaalisi nende abandu bomusibala tsana.

¹⁹ Nabakhuseere nebutswa sinabakhuleke tawe sichila ndi halala n'nawe ne nakhusoola. Ise OMWAMI, mal'le okhuboola.”