TITO 3 - EBAIBO INZIENUKHU

Okhumenya singa Omukristo

¹ Witsusie abandu baabo okhwelela khubami, nende abobunyali, babahulile, ma babe aberechekhu okhukhola amalahi munjila yosi.

² Obabool'le balekhe okhwikhal'la omundu kata mulala tawe, nebutswa babe abomulembe nende abobuyanzi, nibamanyia obuhoma khubandu bosi.

³ Okhuba kata ifwe nefwe khwalinji abahingwa, abesikalamarwi, khandi abasiamu. Khwali abahambe bokhwekomba nende emienya lukano lukano. Khwamalil'la tsinyinga tsiefwe mukhwekomba nende okhusiendekha, nikhwasinyikhilwa nabandu nefwe nikhubasinyikhila.

⁴ Nebutswa olwo obulahi nende obuyanzi bwa Nyasaye Omuhonia wefwe bwabisukha khwifwe,

⁵ yakhuhonia. Sikali khulwe emilimo chiobulunji echiakhwakhola tawe, nebutswa khulwe tsimbabasi tsitsie omwene mbu yakhuhonia okhubir'ra mu Mwoyo Omutsienukhu, okhuhetsanga okhwibulwa okhuhia nende obulamu obuhia khulwa okhukhusaaba.

⁶ Nyasaye yakhutsukhila butsukha Omwoyo Omutsienukhu okhubir'ra mu Yesu Kristo Omuhonia wefwe,

⁷ kho mbu khulwe esirenda sisie, khwabalwa abalunji ma nikhukwa abalamilwa mukhunaya khwobulamu oburahwaho tawe.

⁸ Yili neling'ana liokhusubilwa. Nyenyanga otinyilisie amang'ana yaka butinyu, kho mbu yabo abasubilanga Nyasaye betsul'le okhukhola emilimo emilahi, echili emilahi ma echiobukhala khubandu bosi.

⁹ Nebutswa wehanye amahangasi koluhingwa, nokhubal'lisia tsinzibulo tsiabakuka, nobusoolo nende okhulwan'na Amalako. Yako kabula obukhala kata esifune siosi tawe.

¹⁰ Ne omundu oleeranga obwabukhani omuchetsihie esiakhabili butswa ma olekhane n'naye.

¹¹ Omanye mbu omundu singa omwene uyo wayononekha, ne tsimbi tsitsie omwene tsimanyianga mbu nomusiamu.

Amebaalo Kokhumal'likha

¹² Nyinga ndiruma Aritema khuibe nohomba Tukiko, okhole akonyala okhwitsa khu ise Nikopoli yino, sichila khalachile okhumal'la amatukhu komunyiri ebwene yino.

¹³ Teema butinyu okhonye Sena ekhwenje yamalako nende Apolo bachiake oluchendo lwabwe, ma olole mbu bali nende kosi akabatakhanga.

¹⁴ Ne abandu befwe nabo beeke okhubukula obweyangu bwabwe okhukhola amalahi mbu bahaane biosi ebienyekhanga. Baramenya obulamu bwabutswa tawe.

¹⁵ Bosi abali ninase barumanga amasiesi khuibe. Okhusiechisie abalina befwe mubusubili. Esirenda sia Nyasaye sibe n'nenywe mwesi.