TITO 2 - EBAIBO INZIENUKHU

Amebaalo Katooto

¹ Nebutswa ibe okhwola wibaale amang'ana akahambananga nende amebaalo kobulamu.

² Yibaal'la Abasakhulu babe abokhwetembelesia abobuchesi, abokhwelinda abene; babe aba tooto mubusubili bwabwe, nomubuyanzi, nomubwetinyilisi.

³ Khandi mbwo wibaal'le abasiele nabo babe noluyali ol'lahi mufwo tsiabwe. Barabba abokhwikhal'la abandi tawe kata obokhuyanza ewaini inyinji tawe. Bebaale akali amalahi,

⁴ kho banasie abakhasi abasili abayia ifwo yokhuyanza abasaatsa babwe nende abaana babwe;

⁵ nibabetsanga abokhwelinda abene, abasiyikhu, abakholi bemilimo abalahi mutsinyumba tsiabwe, abelelanga khubasatsa babwe kho abandu babule okhunyeka amang'ana akarulanga khu Nyasaye.

⁶ Munjila iyo oyunjie abasatsa abasili ababukha babe abokhwelinda abene.

⁷ Mumang'ana kosi okwana okhuba esilolelo sieifwo indahi. Obe nesilongole khandi omwetembelesi mubwibaali bubwo.

⁸ Wibaale norumikhilanga amang'ana kobulamu akaranyala okhutsekulwa tawe, kho omufukuli asimbe omurwe nabul'le eliaboola khwifwe.

⁹ Oyungie Abahambe belele khubami babwe, khandi babayanzisie mumang'ana kosi. Barakatusania n'nabo tawe,

¹⁰ kata barabebela tawe. Nebutswa bamanyie mbu nabalahi khandi abasubilwa amatukhu kosi, kho bahane oluyali khumebaalo ka Nyasaye omuhonia wefwe mukosi aka bakholanga.

¹¹ Okhuba Nyasaye yamanyia esirenda sisie esileranga okhuhonibwa khubandu bosi.

¹² Esirenda yisio sikhwibaal'langa khulekhe obulamu oburali obwokhuyanzisia Nyasaye nende okhwekomba khwesibala, nikhumenya musibala sialeelo mukhwetembelesia, mubulunji, nende muliiba liokhuria Nyasaye,

¹³ nikhulindil'langa Litukhu liekhabi elia khunayanga khwo olwobukhongo bwa Nyasaye wefwe omukhongo nende obwo Omuhonia wefwe Yesu Kristo bulilolekha.

¹⁴ Yehana khulwefwe, mbu akhununule okhurula mububi bwosi, nokhukhusiya okhuba abandu babe omwene abali nesinani okhukhola amalahi.

¹⁵ Wibaale amang'ana amalahi yako; orumikhile obunyali bubwo bwosi, olwoba nochetsiyianga nokondokhela bosi abakhuhulila. Omundu wosi arakhuchaaya tawe.