TITO 1 - EBAIBO INZIENUKHU

¹ Ise Paulo, omurumikhili wa Nyasaye ma omurumwa wa Yesu Kristo mandikanga ebarwa yino. Ndahulwa ma nirumwa okhusechelesia obusubili bwabandu ba Nyasaye abelwa nende okhubemel'la khubwatooto obuleeranga liiba liobunyasaye,

² obwokhunaya khwabwo khuli obulamu oburahwa tawe. Nyasaye oranyala okhukaata yakhusubisia obulamu yibu mutsinyinga tsiakhale,

³ ne mutsinyinga etsikwanile, yabubisula mwing'ana lilie. Ling'ana tsana ndakholwa omusubilwa okhulilinda ma ndikambanga khulwo obunyali bwa Nyasaye Omuhonia wefwe.

⁴ Mandikilanga ibe Tito, omwana wanje watooto mubusubili obwakhusanganga halala. Esirenda nende emilembe chibe khuibe okhurula khu Nyasaye Papa nende Yesu Kristo Omuhonia wefwe.

Omulimo Kwa Tito Ekurete

⁵ Ndakhulekha Kurete mbu okol'losie amang'ana akali nikasili okhukholwa ma wahule abakhulundu belikanisa mu sielitaala. Witsulile obulakani bwanje:

⁶ Omukhulundu okhwola abe omundu orali nesikha; abe omusaatsa womukhasi mulala, khandi abaanabe okhwola babe abasubili, abarali noluyali lwokhuba abesifwabwi nohomba abesikala marwi.

⁷ Okhuba uyo oli omwemeli welikanisa nohomba omulindi womulimo kwa Nyasaye, okwana okhuba sila esikha. Arabba omundu wokhutsalikha nohomba owokhutiila elileko bwangu, nohomba omukholwi wamalwa, nohomba wokhusolana nohomba owokhulangukhila amapesa tawe.

⁸ Abe oyanzanga okhwinjisia abacheni, owayanza amalahi. Okhwola yelinde omwene, abe omulunji, omutsienukhu, owokhwekaya omwene.

⁹ Nafumilanga ling'ana lisubilwa elia yechibwa, kho naye abe onyala okhwibalila abandu bandi amebaalo katooto, nende okhuleka abamayingane.

¹⁰ Okhuba baliho abesikala marwi abenji, okhusila muno abarula khubusubili bwesiyahudi abakholanga induli, nibakaata abandi nende amang'ana kabutswa.

¹¹ Bahel'le okhwikalwa eminwa chiabwe sichila banyasianga abomutsinyumba tsiosi khulwo okhwibaala amang'ana akarakwan'ne, bakholanga yako kosi khulwo obukhala bwesifwabwi.

¹² Mulala khubo omuroobi wabwe abene yaboola mbu: “Abakurete khasotso babetsanga ababehi, bali tsinyama nabulimo tsimbi, abalangu abakara.”

¹³ Amang'ana yako nakatooto. Khusifune yisi obakondokhele butinyu, babe abalamu mukhusubila.

¹⁴ Baratsilil'la okhureka amarwi khuketsingano tsia Bayahudi, namalako kabandu okhurula khu yabo abafukulanga akatooto tawe.

¹⁵ Ebindu biosi nebisiyikhu khu yabo abali abasiyikhu abene, nebutswa sibulaho esindu esisiyikhu khubandu abali abesifwabwi khandi abarasubilanga, nebutswa emioyo chiabwe nende amakani kabwe nakesifwabwi.

¹⁶ Baboolanga mbu bamanya Nyasaye, nebutswa mumilimo chiabwe bamwambakhananga. Bo nabes'sinyo, abesikala marwi, ne sibakhoyele okhukhola omulimo kwosi omulahi tawe.