RUTSI 4 - EBAIBO INZIENUKHU

Boasi yateesia Rutsi

¹ Boasi yatsia habwikhalo bwelitaala musilibwa ma niyekhalaho. Ma mulamunyene Rutsi owa ahembi owa Boasi yali naral'lenjekhwo nabir'raho. Boasi namulanga, “Kotola witse hano, wikhale.” Ma natsia niyekhalaho.

² Ma Boasi nalanga abakhulundu belitaala likhumi nabahomba nabo bekhaleho; kho nibekhala ho.

³ Ma nabool'la mulamunyene Rutsi owa ahembi, “Luno Naomi ucheleye okhurula musibala sia Moabu, ne yenyanga okhukusia omukunda kwali okwomwikho wefwe Elimeleki.

⁴ Nduutsi mbu okhwola iwe omanyekhwo. Nikali wakhenya okhukukula, okukul'le imbeli wabakhulundu bekhaye yaba. Ne norenya okhukukula khandi oboole sichila obunyali bwokhuranga obwokhukukula buli khuibe mbelio khe nase nondekhwo.” Omundu uyo nakalusia “Nangukule.”

⁵ Boasi naboola, “Nokula omukunda okhurula khu Naomi kho khandi nokule Rutsi omukhaana Mumoabu, omulekhwa, khe omukunda kube mulwibulo lwe uyo owafwa.”

⁶ Omundu uyo nakalusia, “Nikali mbwo singula omukunda yikwo tawe, sichila sikuli okwanyala okhulaamila abaana banje tawe. Ibe obukule obweyangu bwanje ma okukule.”

⁷ Mumatukhu yako Abaisiraeli bali nende ifwo nalebe mukhukulana khwemiandu. Kalinji mbu okusinjia ahinie esilaro musilenje, ahelesie okulanga. Yino yali injila ya Baisiraeli eyokhumanyia mbu amang'ana yako kho kahweye.

⁸ Kho mulamunyene Rutsi uyo nabool'la Boasi, “Ibe omwene okule omukunda yikwo.” Ma nayinia esilaro sisie musilenje nahelesia Boasi.

⁹ Ma Boasi nabool'la abakhulundu nende bosi abali habwene yaho, “Inywe mwesi muli abakobokheli olwaleelo mbu ngul'le okhurula khu Naomi ebindu biosi ebiali ebia Elimeleki nende abasianibe Kilioni nende Mahaloni.

¹⁰ Khandi Rutsi omukhaana Omumoabu, omukhasi sika Mahaloni, mukul'le abe omukhasi wanje. Kano nakachile emiandu chitsilil'le okhuba muliira liowafwa, kho eliiralie lilekhe okhukora mubaana babwe, khandi mwitaala liabwe. Inywe muli abakobokheli olwaleelo.”

¹¹ Abakhulundu nende abandu bosi nibaboola, “Yee, khuli abakobokheli. OMWAMI amukhole omukhasiwo abe singa Raeli nende Leya, abebul'la Yakobo abaana abenji. Nawe ohindihale mulwibulo lwa Efurate, ma ofume mu Betselehemu.

¹² Abaana abo MWAMI yakhakhuhelesie okhubir'ra mumukhasi uyu balalombe olwibulolwo okhuba singa olwa Peresi omusiani wa Yuda nende Tamari.”

Boasi nende olwibulo lulwe

¹³ Kho Boasi yabukula Rutsi naba omukhasiwe. Naba n'naye, ma OMWAMI namunyal'la okhubelekha, ma niyebula omwana omusiani.

¹⁴ Abakhasi nibabool'la Naomi, “OMWAMI yetsoomibwe. Ukhuheeye omwitsukhulu owokhukhulinda. Eliira liomwana uyu lifumenje mu Isiraeli.

¹⁵ Nabetsenje omulindiwo khandi owokhukhulisia mubusiele bubwo. Okhuba omukhaanawo Rutsi wakhuyanza, ma wakhukhol'la amenji okhuyomba abasiani bane nabataru. Ne luno ukhwibuliye omwitsukhulu, owanokhuleer're obulamu obuhia.”

¹⁶ Naomi yabukula omwana, namufumbel'la, ma naba omuleliwe.

¹⁷ Abakhasi abamenyanibe nibamukulikha eliira Obedi. Ma nibabool'la buli mundu mbu, “Naomi wibuliywe omwana omusiani.” Obedi yamala naba niye samwana Yese, ouli samwana Daudi.

¹⁸ Ne tsinzibulo tsia Peresi nzietsino; Peresi yebula Hesironi,

¹⁹ ne Hesironi niyebula Ramu, ne Ramu niyebula Aminadabu;

²⁰ Aminadabu niyebula Nashoni, ne Nashoni niyebula Salumoni;

²¹ Salumoni niyebula Boasi, ne Boasi niyebula Obedi;

²² Obedi niyebula Yese, ne Yese niyebula Daudi.