RUTSI 3 - EBAIBO INZIENUKHU

Rutsi anyoola omusaatsa

¹ Naomi yabool'la Rutsi, “Omukhaana wanje okhwola ndole mbu unyooye omusaatsa khe obe nende inyumbayo omwene.

² Witsul'le mbu Boasi owa walinji nabakhaanabe nimulamu uwo. Omukolooba kwan'nondi yetsa okhusesa obuswache halutse.

³ Wesaabe, webakhe amafura ma wabiikhe bulahi, otsie halutse tsana ne oralekha amanye oliho tawe okhwola olwa yetsa okhuba naliye ma nanyweye.

⁴ Ohenjelesie bulahi hayetsa okhukona ma olwe etsindoolo tsitsa okhumuyila, winjile ofunule ebilenjebie ma okone habwene yaho. Yetsa okhukhubool'la esiokhola.”

⁵ Rutsi namukalusia, “Ndakhola kosi akobooye.”

⁶ Kho Rutsi yamala natsia halutse nakhola kosi aka nyakhusalawe yali nam'booleye.

⁷ Olwa Boasi yali naliye ma nanyweye, omwoyokwe kwali nikusangal'le. Yatsia nakona ahembi hamurwe kwesifumi siobuswache. Rutsi yetsaho kalaha, nachingula lipalangeti ma nakona habilenje bia Boasi.

⁸ Mubutukhu hakari Boasi yekosa ma nabukha niyesukhania, ne nachenya okhunyoola omukhasi nakon'ne habilenje bibie.

⁹ Nareeba, “Niwe wina?” Naye nakalusia, “Nise Rutsi omwami. Niwe okwan'ne okhundenda sichila oli mulamwa.”

¹⁰ Naye naboola, “OMWAMI akhulaamile ikhabi. Umanyisie obwesieli obukhongo mukokholanga luno okhuyomba obwa wakhol'la nyakhusala wo. Wakhatsiye okhuruna abasiani, kata babe abahinda nohomba abatakha, nebutswa sokhol'le mbwo tawe.

¹¹ Kho luno omukhaana wanje, oraria tawe, ndakhukhol'la kosi akoboola, okhuba abomwitaala liefwe bosi bamanyile singa obwoli omukhasi omulahi.

¹² Nakatooto mbu ise ndi mulamuwo, habula aliho mulamuwo undi oli ahembi khuibe okhuyomba ise.

¹³ Olinde butswa obutukhu buno bwonyene, ma mukamba tsuli nakhulole nikali yakhakhukalusia singa mulamuwe. Nakhola mbwo nebuba obulahi; ne nasuula okhukhukalusia ndesuhanga khu MWAMI oli mwoyo mbu ise nakhukalusie. Okone hano okhwola mukamba.”

¹⁴ Ma Rutsi nakona habilenje bia Boasi okhwola nibusia, ma nabuukha isi nesili okhulabulukha bulahi eyomundu arakham'manyilamwo tawe, sichila Boasi siyayenya omundu amanyekhwo mbu akon'neho tawe.

¹⁵ Boasi namubool'la, “Hinia ingubo yawefubiiye yiyo wale hano.” Rutsi nakhola mbwo. Ma Boasi natsukhakhwo etsikilo amakhumi kabili etsiobuswache ma namutukha. Ma Rutsi nakalukha n'nabwo mwitaala.

¹⁶ Olwa yoola ingo, nyakhusala nyene namureeba, “Kaali mbwena omukhaana wanje?” Rutsi namubool'la kosi aka Boasi yali namukholeye.

¹⁷ “Yambooleye mbu rakhakalukha khu iwe nindi amakhono mataka tawe, ma niyambelesia obuswache buno bwosi.”

¹⁸ Naomi namubool'la, “Olinde butswa, omukhaana wanje, okhwola olwa nolole singa amang'ana yaka nakabe. Boasi sahulukhakhwo litukhu lino tawe okhwola amale amang'ana yaka.”