RUTSI 2 - EBAIBO INZIENUKHU

Rutsi yaruluma m'mukunda kwa Boasi

¹ Naomi yali nomwikhowe owalangwa Boasi, owali omundu omukhongo khandi omuhinda. Yali owesilibwa sianga Elimeleki owalinji omusaatsawe.

² Litukhu elala Rutsi yabool'la Naomi, “Lekha nzie m'mukunda, rulume obuswache obwabatiyi balekhanga munyuma. Manyile mbu ndanyoola omundu owitsa okhuhuchil'la mulonde munyuma.” Naomi nakalusia “Tsia mwana wanje.”

³ Kho Rutsi yatsia m'mukunda, naruluma inyuma wabatiyi. Ne yetsukhan'na nali musitonye siomukunda kwa Boasi.

⁴ Boasi yetsa narula Betselehemu ma nasiesia abatiyi naboola, “OMWAMI abe n'nenywe.” Nabo nibakalusia, “OMWAMI akhuhelesie ikhabi.”

⁵ Boasi nareeba omusinjil'li wabatiyi, “Omukhaana uno nowawina?”

⁶ Omusinjil'li wabatiyi nakalusia, “Nomukhaana okhurula Moabu owetsa nende Naomi.

⁷ Yali okhureeba mbu mulekhe alonde abatiyi munyuma nabunjelesia obuswache obusikalanga munyuma. Akhol'le butswa emilimo okhurula khumukamba okhwola esaa yino narahulukhangakhwo kata nahati.”

⁸ Ma Boasi nabool'la Rutsi, “Hulila omukhaana wanje, orakhatsiakhwo okhuruluma m'mukunda kundi kwosi nikurali kuno tawe, nebutswa obe ahembi nende abakhaana banje.

⁹ Obahenje olole habachesanga ma obe ahembi n'nabo. Ndachile abasiani banje balekhe okhukhunyasia. Noba nobuluho otsie onywe amaatsi akali mutsisongo tsiabetsusisie.”

¹⁰ Rutsi yasikama niyenamia obweni bubwe hasi, ma nabool'la Boasi, “Busina nyooye olukoosi mutsimoni tsitsio? Busina okhol'langa bulahi ise omucheni butswa?”

¹¹ Boasi nakalusia, “Ndahuliye kosi akawakhol'la nyakhusalawo okhurula omusaatsawo nafwa. Manyile obwawalekha papawo nende mamawo nende esibala siawebul'lwamwo, ne niwitsa okhumenya mubandu aboramanyile tawe.

¹² OMWAMI akhurunje khukosi akawakhola. Ohebwe amatani ametsulu okhurula khu MWAMI Nyasaye wa Isiraeli, owawitsile okhwebisa mutsimbahatsie.”

¹³ Rutsi nakalusia, “Ukholeye bulahi okhusila Omwami. Unemisie omwoyo khulwokhumbool'la amang'ana amalahi yako kata nirali onyala okhuhelana nende mulala khubakhaana abakholi baabo.”

¹⁴ Esaa yebiakhulia Boasi yabool'la Rutsi, “Yitsa olie khumukaati notonjela m'munyu yiku.” Ma Rutsi niyekhala nende abatiyi ma Boasi namukamila amatuma amakhalange. Nalia niyekura ma ebindi nibisikala.

¹⁵ Olwa yali narul'le nakalukhile okhuruluma, Boasi yalaka abitiyibe nababool'la, “Mulekhe arulume kata hakari mubirwe ne muramusolania tawe.

¹⁶ Kata khandi mutsomolekhwo obundi mubirwe mubulekhe arulume ne muramwikal'la tawe.”

¹⁷ Ma Rutsi natsilil'la okhuruluma obuswache okhwola khubwile ne olwa yali nahul'le nanyoola mbu uhesisie etsikilo ahembi likhumi.

¹⁸ Yakalukha nobuswache yibwo mwitaala, namanyia nyakhusala nyene obwa yali narulumile. Khandi yamuhelesia ebiakhulia ebiayasikala n'nabio olwa yali niyekur're.

¹⁹ Nyakhusala nyene namureeba, “Orulumile hena obuswache buno olwaleelo? Otiyilenje m'mukunda kwawina? Nyasaye alaamile ikhabi omundu okhwitsuliye.” Ma Rutsi nabool'la Naomi mbu atiyilenje m'mukunda okwomundu olangwanga Boasi.

²⁰ Naomi nabool'la Rutsi mbu, “OMWAMI alaamile Boasi ikhabi. OMWAMI buli khasotso yetsul'langa amasubisioke khubali mwoyo nende abafwa.” Ma natsilil'la okhuboola, “Omundu uyo nomwikho wefwe, omuluyia wahembi.”

²¹ Ma Rutsi naboola, “Khandi akayomba kosi, yambooleye mbu nzilil'le okhuruluma obuswache ahembi nabatiyi babe okhwola olwa nabamale lichesa liosi.”

²² Naomi nabool'la Rutsi, “Yee omukhaana wanje, nobulahi otiyenje nende abakhaanabe khase wakhanyasibwa niwakhatsia mumikunda chia abandu bandi.”

²³ Ma Rutsi natiya nabakhaana ba Boasi okhwola olwelichesa liobuswache nende ingano liahwa. Ne natsilil'la okhumenya nende nyakhusala nyene.