OMUKAMBI 1 - EBAIBO INZIENUKHU

Obulamu bubulakhwo esindu

¹ Kano namang'ana ko Mukambi, omusiani wa Daudi, owali omuruchi mu Yerusalemu.

² Omukambi yaboola mbu, kosi nakabutswa. Obulamu bubula esifune, kosi nakabutswa.

³ Nibukhala sina obwomundu anyoolanga okhurula khumilimo echia akholanga musibala?

⁴ Amasuuba keetsanga nikabira nebutswa esibala sisikalukhanangakhwo tawe.

⁵ Eliuba lirulanga khandi eliuba liyeelanga ma khandi lianguha okhukalukha aha lirul'langa.

⁶ Omuyeka kuhungutsanga nikuhengele esinyolu, nikusukhana okhuhenga enandete ma kubotokhana bwangu okhutsia aha kuchaakilanga khandi.

⁷ Emichela chiosi chitsukhanga munyanza, nebutswa inyanza siyitsulanga tawe. Amaatsi kakalukhanga ahemichela chiachaakila ma chichaaka oluchendo khandi.

⁸ Ebindu biosi bichonyianga okhuyomba obwomundu anyala okhwinoosia. Tsimoni tsiefwe sitsinyala okhulola akanyala okhutsisangasia tawe; amarwi kefwe nako sikanyala okhuhulila amang'ana akakahela tawe.

⁹ Akali okhwekhola khale niko akakhetse okhwekhola khandi. Akakholwa khale niko akakhakholwe khandi. Sililiho ling'ana liosi licheni musibala tawe.

¹⁰ Sibulaho esiabandu banyala okhuboola mbu “Lole, sino nesicheni” tawe. Siali okhwekholakhwo khale muno nikhusili okhwibulwa.

¹¹ Abulaho owitsul'langa akali okhwekhola khale tawe, khandi abulaho mumatukhu akakhetse olitsul'la akali muliekhola hakari waluno nende olwene yilwo.

Akomukambi yabir'ramwo

¹² Ise Omukambi, ndali omuruchi wa Isiraeli mu Yerusalemu.

¹³ Ndali okhurakhwo omwoyo okhusila okhukhaaba nende okhurunilisia kosi mubuchesi akekholanga musibala. Mako obwa kuli omulimo omusiro okwa Nyasaye yatuukha abandu.

¹⁴ Ndabeye okhulola kosi akakholwanga musibala muno ne kosi nakabutswa. Kafwana singa okhuteema okhutiila obusindu.

¹⁵ Sionyala okhukol'losia esindu esiefumba tawe; sionyala okhubasia ebindu ebiraliho tawe.

¹⁶ Ndaboola mumwoyo kwanje mbu, “Ndi omundu omukhongo, khandi omuchesi okhusila okhuyomba yabo bosi abaruka Yerusalemu imbeli wanje. Ise manyile singa obuchesi buli khandi singa obumanyi buli.”

¹⁷ Ndarakhwo omwoyo okhumanya obwabukhani hakari hobuchesi nende obuhingwa khandi hakari hobuchesi nende obulalu. Nebutswa ndamala ninyoola mbu kali singa okhutiila obusindu.

¹⁸ Obuchesi obwinji buleeranga esibeela esinji, ne obumanyi obwinji buleeranga esihenda mwoyo.