OKHURULA 9 - EBAIBO INZIENUKHU

Okhufwa khwemiruko

¹ OMWAMI nabool'la Musa mbu, “Tsia khumuruchi ma omubool'le mbu OMWAMI, Nyasaye wa Baheburania aboolanga mbu, ‘Lakhuula abandu banje batsie okhundekayakaya.

² Noba nosuula khandi okhubalakhuula,

³ nakhuhelesie esinyasio siokhuleera olufu olubi khumiruko chichio chiosi, khutsisululi, khutsipunda, khutsingamia, khutsing'ombe, khumakondi nende khutsimbusi.

⁴ Nambiikhe olwakho hakari wemiruko chia Baisiraeli nende emiruko chia Bamisiri, ne kubulakhwoho omuruko kwosi okwa Baisiraeli kwakhafwa tawe.

⁵ Ise, OMWAMI, mal'le okhurechekha litukhu liamukamba khulwo okhukhola akene yaka.’ ”

⁶ Litukhu elialondakhwo OMWAMI yakhola singa obwa yali nabooye, ma emiruko chiosi chia Bamisiri nichifwa, nebutswa kubulakhwoho okwa Baisiraeli okwafwa.

⁷ Omuruchi yareeba akali nikekholekhele ne nabool'lwa kubulakhwoho omuruko kwa Baisiraeli okufwiye. Nebutswa yatinyia omwoyokwe ma siyalakhuula Abaisiraeli okhutsia tawe.

Likhupako liamabondo

⁸ Ma OMWAMI nabool'la Musa nende Haruni mbu, “Mufumbare likokhe okhurula mumayika; Musa aliohe khwikulu imbeli womuruchi.

⁹ Lilasalaana singa olukuukhi olunyukhe khusibala siosi sie Misiri, ne siahabundu hosi nalisimbie amabondo khubandu nende khumiruko ma nakanyalukhe nikakwa amakhwaku.”

¹⁰ Kho bafumbara likokhe ma nibasinjila imbeli womuruchi: Musa niyoha likokhe ikulu, nilisimbia amabondo khubandu nende khumiruko ma nikanyalukha nikakwa amakhwaku.

¹¹ Abafumu sibali abanyala okhwitsa imbeli wa Musa tawe sichila emibili chiabwe chiali nitsitsuyekhwo amabondo singa Abaamisiri bandi bosi.

¹² Nebutswa OMWAMI yatinyia omwoyo kwomuruchi, ne singa obwo MWAMI yali nabooye, omuruchi siyahul'la Musa nende Haruni tawe.

Likhupako liamachina Keifula

¹³ Ma OMWAMI nabool'la Musa mbu, “Nibusieye mukamba tsuli nobukaane nende omuruchi ma nomubool'le mbu OMWAMI Nyasaye wa Baheburania aboolanga mbu, ‘Lakhuula abandu banje batsie okhundekayakaya.

¹⁴ Luno sinzia okhuhaana esinyasio khubemelibo nende abandu baabo bonyene tawe, nebutswa nzia okhuhaana esinyasio khuibe khandi, kho omanye mbu saliho omundu undi wosi musibala siosi oli singa ise tawe.

¹⁵ Ndaba nindamuheye esinyasio siolufu ibe halala nabandu baabo khane luno mwesi mwafwa.

¹⁶ Nebutswa khulwa okhukhumanyia obunyali bwanje khulekhele obe mwoyo kho oluyali lwanje lube olunyala okhumanyikha musibala siosi.

¹⁷ Nebutswa osili nomwekhonyo ne osuulanga okhulakhuula abandu banje batsie.

¹⁸ Esaa singa yino mukamba nangwisie ifula yolucheka netsokan'nemwo namachina, aka Bamisiri basili okhulolakhwo mumatukhu kabwe kosi.

¹⁹ Luno haana lilako mbu emiruko chichio nende siesindu siosi esili esioba sirebwe munyumba. Ifula yamachina yitsa okhukwa khubandu nende emiruko echili esioba sila obwikamilo ne tsiosi tsilafwa.’ ”

²⁰ Abalala khubemeli bomuruchi bali noburi khuko MWAMI yali nabooye, ne baleera abasumba babwe nende emiruko chiabwe munyumba okhwikamamwo.

²¹ Kata mbwo abandi sibabukulakhwo oluchendo mumang'ana ako MWAMI yali nabooye tawe. Balekha abasumba babwe nende emiruko esioba.

²² Ma OMWAMI nabool'la Musa, “Chinga omukhonokwo mwikulu ne ifula yamachina yitsa okhukwa khusibala siosi sie Misiri; khubandu, khumiruko, nende khubiraakwa biosi ebili m'mikunda.”

²³ Kho Musa nachinga indabusi yiye mwikulu, ne OMWAMI naruma ikhupa nende ifula yamachina ne olweni nilwanukhu khwiloba. OMWAMI yaruma

²⁴ amachina keifula amasiro ne tsimbeni nitsianukhanga tsimbeka tsiosi. Yali ikhumaatsi ingali esili okhubakhwoho musibala sie Misiri mumatukhu kasio kosi.

²⁵ Amachina keifula kakoka ebindu siahabundu hosi mu Misiri ebiali nibili esioba halala nende abandu bosi nende emiruko chiosi. Kakoka ebiraakwa biosi m'mikunda nikafunaka emisaala chiosi.

²⁶ Musibala sia Gosheni, aha Baisiraeli bamenyanga, nisio sionyene esiamachina karakwamwo tawe.

²⁷ Omuruchi yalanga Musa nende Haruni nababoola mbu, “Luno mal'le okhwona; OMWAMI ali mubwatooto, nase nabandu banje khukhol'le obubi.

²⁸ Musaaye khu MWAMI! Ikhupa nende amachina akakhukwiliye kakhuhel'le! Ndesuhanga mbu namulekhe mutsie; sinamumenye hano khandi tawe.”

²⁹ Musa nabool'la omuruchi mbu, “Olwa nzia okhuba nirul'le mwitookho, nzia okhuchinguula amakhono kanje okhusaaya OMWAMI. Ikhupa elalekha ne amachina keifula kalakhalisia kho omanye mbu esibala siosi nesia Nyasaye.

³⁰ Nebutswa manyile mbu ibe halala nabemelibo okhwola luno simuritsanga OMWAMI Nyasaye tawe.”

³¹ Epamba yom'mukunda nende emimela chiobuswache biosi biakhuywa sichila obuswache bwali nibulabile ne epamba yali nehinisie esimuli.

³² Nebutswa ingano yosi siyakhuyilwa hasi tawe sichila elabanga olunyuma.

³³ Musa yarula khumuruchi natsia esioba welitookho nachinga amakhono kaake ikulu nasaaya OMWAMI. Ikhupa, amachina keifula nende ifula biosi biakhalisia.

³⁴ Olwomuruchi yalola akali nikekholekhele, yamala nakhola obwoni khandi. Ye omwene nende abemeli baabe batsilil'la okhutinyia a emioyo chabwe,

³⁵ ne singa obwo MWAMI yali nabooye okhubir'ra mu Musa, omuruchi siyalakhuula Abaisiraeli okhutsia tawe.