OKHURULA 6 - EBAIBO INZIENUKHU

¹ Ma OMWAMI nabool'la Musa, “Luno witsa khulola akanzia okhukhol'la omuruchi. Nzia okhumuhakia alakhuule abandu banje batsie. Khandi nzia khumuhakia abakhunge okhurula musibala sisie.”

Nyasaye yalanga Musa

² Nyasaye yal'loma khu Musa naboola mbu, “Ise nise OMWAMI.

³ Ndebisukhila Aburahamu, Isaka nende Yakobo singa Nyasaye Wokhunyala Biosi, nebutswa sindayemanyiakhwo khubo muliira lianje litsienukhu, mbu OMWAMI tawe.

⁴ Khandi ndalomba indakano yanje ninabo nindesuha okhubahelesia esibala sia Kanaani esiabamenyamwo singa abali ebucheni.

⁵ Luno mal'le okhuhul'la okhubinda khwa Abaisiraeli, aba Bamisiri bara mubuhambe, ma nzitsuliye indakano yanje.

⁶ Kho bool'la Abaisiraeli mbu mboolanga khubo mbu, ‘Ise nise OMWAMI; namununule ma namukhole abaluukhe okhurula mubuhambe bwenywe khu Bamisiri. Nanginge omukhono kwanje kwobunyali okhuhaana esinyasio esikali khu Bamisiri ma nenywe namusoole.

⁷ Namukhole abandu banje, nase nambe Nyasaye wenywe. Namumanye mbu ise nise OMWAMI Nyasaye wenywe olwa namununule okhurula mubuhambe Emisiri.

⁸ Namuleere musibala esiandesuha okhuhelesia Aburahamu, Isaka nende Yakobo ne nasihaane khu inywe sibe omukabwa kwenywe. Ise nise OMWAMI!’ ”

⁹ Musa yabool'la Abaisiraeli amang'ana yaka nebutswa sibamuhulila tawe, sichila emioyo chiabwe chiali nichisaaliye khulwo okhusandibwa khwabwe mubuhambe.

¹⁰ Ma OMWAMI nabool'la Musa mbu,

¹¹ “Tsia obool'le omuruchi we Misiri mbu okhwola alakhuule Abaisiraeli barule musibala sisie.”

¹² Nebutswa Musa nakalusia mbu, “Kata Abaisiraeli sibeetsa khumbul'la tawe, khe omuruchi we Misiri naye nayambul'le mbwena? Ise sindamanya okhul'loma tawe.”

¹³ OMWAMI, yabool'la Musa nende Haruni mbu, “Bool'la Abaisiraeli nende omuruchi we Emisiri mbu mal'le okhumuha obunyali okhuhiinia Abaisiraeli Emisiri.”

Obwibulani bwa Musa nende Haruni

¹⁴ Bano nibo abali abemeli betsinyumba tsiabwe. Abasiani ba Rubeni omusiani wa Yakobo omukhulundu bali; Hanolei, Palu, Hesironi, nende Karimi: Bino nibio ebilibwa bia Rubeni.

¹⁵ Abasiani ba Simioni bali Yemweli, Yamini Ohadi, Yakini, Sohari, nende Shauli omusiani womukhasi Mukanaani. Yibi nibio ebilibwa bia Simioni.

¹⁶ Kano niko amera kabasiani ba Lawi singa kaloosibwa: Gerishoni, Kohatsi nende Merari. Lawi yamenya musibala emihika emia ndala namakhumi kataru nachine nachitaru.

¹⁷ Gerishoni yali nabasiani babili: Libini nende Shimei bebula abandu abenji.

¹⁸ Kohatsi yali nabasiani bane: Amuramu, Isare, Heburoni nende Usieli. Kohatsi yamenya emihika emia ndala namakhumi kataru nachitaru.

¹⁹ Merari yali nabasiani babili: Mahili nende Musi. Ibi nebilibwa bia Lawi nende tsinzibulo tsiabwe.

²⁰ Amuramu yateesia omukhaana wanga samwana olangwanga Yakobedi owamwibul'la Haruni nende Musa. Amuramu yamenya emihika emia ndala namakhumi kataru nachine nachitaru.

²¹ Isare yali nabasiani bataru: Kora, Nefeki, nende Sikiri.

²² Usieli yali nabasiani bataru: Mishaeli, Ekisafani, nende Sitiri.

²³ Haruni yateesia Elisheba omukhaana wa Aminadabu mbotso nyene Nahashoni. Elisheba yebul'la Haruni Nadabu, Abihu, Eliasa, nende Itsamari.

²⁴ Kora yali nabasiani bataru: Asiri, Elikana, nende Abiasafu, nibo abali abakuka bebilibwa bia Kora.

²⁵ Eliasa omusiani wa Haruni yateesia omukhaana wa Putieli naye namwibul'la Fenihasi. Bano nabemeli betsinyumba nende olwibulo lwa Lawi.

²⁶ Haruni nende Musa nibo abo MWAMI yabool'la mbu, “Hinie tsinzibulo tsia Isiraeli Emisiri.”

²⁷ Nibo abasaatsa ababool'la omuruchi we Misiri alakhuule Abaisiraeli

OMWAMI yaruma Musa nende Haruni okhutsia Khumuruchi we Misiri.

²⁸ Olwo MWAMI yal'loma nende Musa nali musibala sie Misiri,

²⁹ yamubool'la mbu, “Ise nise OMWAMI. Obool'le omuruchi we Misiri kosi akakhubool'la.”

³⁰ Nebutswa Musa yakalusia mbu, “Umanyile obulahi mbu ise sin'nomanga bulahi tawe, nisina esiakhachila omuruchi yambul'le?”