OKHURULA 5 - EBAIBO INZIENUKHU

Musa nende Haruni batsia khumuruchi we Misiri

¹ Kho Musa nende Haruni batsia Emisiri ma nibaboola mbu, “OMWAMI Nyasaye wa Isiraeli aboolanga mbu, ‘Lakhuula abandu banje batsie okhukhola lisabo musitsiimi okhumbelesia oluyali.’ ”

² Omuruchi nareeba mbu, “OMWAMI niwina? Nisina esichila muhul'le ma ndakhuule Abaisiraeli batsie? Ise sindamanya OMWAMI uyo tawe, ne sinzia okhulakhuula Abaisiraeli okhutsia tawe.”

³ Musa nende Haruni nibakalusia, “Nyasaye wa Baheburania webisuuye khu ifwe. Okhuhuchil'le okhutsia oluchendo lwamatukhu kataru okhuhaana omusango khu MWAMI Nyasaye wefwe. Nikhurakhola mbwo yakhakhwira nolufu nohomba nende lihe.”

⁴ Omuruchi nabool'la Musa nende Haruni mbu, “Nisina esichilanga nimukhola abandu okhulekha emilimo chiabwe? Kalusie abasumba khumilimo chiabwe!

⁵ Abandu inywe mwahinjihan'ne okhusila okhuyomba Abaamisiri. Ne luno mwenya okhulekha okhukhola emilimo!”

⁶ Litukhu liene yilio omuruchi yalaka abandu bokhuhachia abasumba okhukhola emilimo nende abasinjil'langa Abaisiraeli okhukhola emilimo mbu,

⁷ “Mulekhe okhuha abandu obunyasi bwokhusamba amatifwali. Mulekhe abene batsie okhuburuna.

⁸ Nebutswa mubahachie okhulomba amatifwali akahelan'ne nende akabalombanga khasotso, nilirakhalemakhwo kata elala tawe. Sibali nende ekasi inyinji eyokhukhola tawe, ne nisio esichilanga nibatsilil'la okhureeba mbu mbalakhuule batsie okhuhaana omusango khu Nyasaye wabwe!

⁹ Mutiyie abandu yabo butinyu ne barahulukhakhwo tawe, kho babule obweyangu bwokhuhia amang'ana kobubehi.”

¹⁰ Abandu bokhuhachia abasumba okhukhola emilimo nende abasinjil'li ba Baisiraeli okhukhola emilimo batsia khu Baisiraeli nibababool'la mbu, “Omuruchi yali okhuboola mbu sinatsilil'la okhumuleer'ra obunyasi tawe.

¹¹ Aboolanga okhwola abene mutsie okhuburuna hosi aha munyala okhubunyoola. Nebutswa mutsilil'le okhulomba amatifwali akahelana nende akamulombanga khasotso.”

¹² Kho abandu batsia mu Misiri habundu hosi nibakhabanga obunyasi.

¹³ Abandu bokhuhachia abasumba okhukhola emilimo batsilil'la okhuhachia abandu okhulomba amatifwali akahelana nende akabalombanga sielitukhu nyinga bahebwanga obunyasi.

¹⁴ Abokhuhachia abasumba okhukhola emilimo be Misiri batiabanga abasinjil'li bemilimo Abaisiraeli aba bali nibareeye okhusinjil'la emilimo. Babareeba mbu, “Nisina esichilanga nimuralomba amatifwali akahelana nende akamwalombelenje?”

¹⁵ Ma abanyapala Baisiraeli yabo batsia okhwekaana khumuruchi, nibaboola mbu, “Omwami! Nisina esichilanga nokhukhol'la kano?

¹⁶ Sikhuhebwanga obunyasi tawe, nebutswa khusilakwanga butswa okhulomba amatifwali! Ne luno ifwe khutiabwanga ne niwe ochilanga.”

¹⁷ Omuruchi nakalusia mbu, “Inywe muli abakara, ne simwenyanga okhutiya tawe, ne nisio esichilanga nimureeba mulakhuule mutsie okhuhaana omusango khu MWAMI.

¹⁸ Luno kalukhe khumilimo! Sinamuhebwekhwo obunyasi tawe, nebutswa okhwola mulombe amatifwali akahelana butswa nende aka mwalombelenje.”

¹⁹ Abanyapala yabo bamanya mbu bali mumunyakhano olwa babool'lwa balombe amatifwali akahelana nende akabalombelenje sielitukhu.

²⁰ Olwa bali nibarulanga khumuruchi, babukaana nende Musa nali nende Haruni abali nibabalindil'langa.

²¹ Abanyapala nibabool'la Musa nende Haruni mbu, “OMWAMI uluutsi aka mwakhol'le ne namuhe esinyasio khulwokhuchila omuruchi nende abakhongobe okhukhubihil'lwa. Mubaheye injila yokhukhwira.”

Musa yekaana khu MWAMI

²² Kho Musa khandi nakalukha khu MWAMI namubool'la mbu, “OMWAMI, nisina esichilanga nokhupia abandubo esibi? Nisina esiachila niuruma hano?

²³ Okhurula olwa ndatsia khumuruchi okhumubool'la aka waaruma, abasandianga okhusila. Nawe sibulakhwoho esiokhol'le okhubakhonya!”