OKHURULA 39 - EBAIBO INZIENUKHU

Okhunabila Abesaalisi tsingubo

¹ Barumikhila obuusi obutsokan'nemwo buluu, nobusembe nende obwakhanyu okhunaba tsingubo tsieng'ono etsia abesaalisi bakhoya okhwebikha olwa baba nibenjilanga habundu hatsienukhu. Banabila Haruni tsingubo tsiobwesaalisi singa OMWAMI yali nalachile Musa.

² Balomba ingubo ya efoti okhurula khungubo yekatani isiyikhu; nende okhurula khubuusi bwabuluu, obusembe nende obwakhanyu; ma nende khuluusi lwetsahabu.

³ Balomba amasiti ketsahabu ma nibakakhalaka mutsinyaali tsinyelele okhulombelwa mungubo yekatani isiyikhu nende mubuusi bwabuluu, nobusembe nende obwakhanyu.

⁴ Balomba emikoye chiomumabeka khungubo ya efoti ma nibachinabila khumabeka kabili okhuchihandiakhwo.

⁵ Omukhoba okwasirwa bulahi, okwalombwa khubuusi singa obweingubo yomukari lwanabilwa khungubo tsana kho bibe esindu silala neingubo, singa OMWAMI yali nalachile Musa.

⁶ Balomba amachina keshohamu nibakahomakhwo netsahabu. Kanabwa munjila yobusitsa ma nikahandikwakhwo amera kabasiani ba Yakobo.

⁷ Bakara khumabeka keingubo ya efoti okhukobokhela tsinzibulo tsia Isiraeli likhumi natsibili, singa butswa obwo MWAMI yali nalachile Musa.

Okhulomba esilaka siokhusilifu

⁸ Balomba esichengwa siokhusilifu okhurula khubuusi obutelwa obwabalombelakhwo ingubo ya efoti nende omunabo omufwanani.

⁹ Esichengwa tsana siali esihelanu tsimbeka tsine ma nisifumbwamwo khabili, mbu oburambi etsisentimita amakhumi kabili nachibili ne obuchiikha etsisentimita amakhumi kabili nachibili.

¹⁰ Banabilakhwo tsinyaali tsine tsiamachina keshohamu. Mulunyaali lwokhuranga banabilamwo amachina ka etsilulu, topasi, nende eparaketo;

¹¹ mulunyaali lwakhabili banabilamwo amachina ka emikoche, esafira nende alumasi;

¹² mulunyaali lwakhatari lwanabilwakhwo amachina ka yakinitso, ametsusto nende ikhalama;

¹³ mulunyaali lwakhane lwali namachina ka tarishishi, amachina keshohamu nende yasipa. Yaka kosi kanabilwa mubifuuli bietsahabu.

¹⁴ Sielala khumachina likhumi nakabili yako liahandiikwakhwo eliira elala khumera kabasiani ba Yakobo, mbu kakobokhele tsinzibulo tsia Isiraeli likhumi nachibili.

¹⁵ Balombela esichengwa siokhusilifu yisio eminyololo chietsahabu isiyikhu, echibasilwe singa tsimbuno.

¹⁶ Balomba ebitiili bietsahabu bibili khandi tsingaka tsietsahabu tsibili ma nibanabila tsingaka tsana khutsikona tsieikulu wesichengwa sieingubo iyo.

¹⁷ Baboha emikoye chibili chietsahabu mutsingaka tsibili

¹⁸ khandi nibaboha elubeka undi wemikoye yitsio khubitili bietsahabu ma munjila yiyi nibabinabila khumabeka keingubo ya efoti.

¹⁹ Balomba tsingaka tsibili tsietsahabu ma nibachinabila mutsikona tsie hasi etsiesichengwa tsana, mukari mwasio khundulo ahembi nende ingubo ya efoti.

²⁰ Balomba khandi tsingaka tsindi tsibili ma nibachinabila isi weimbeli wamabeka keingubo ya efoti, ahembi nende obwongano bwayo ikulu wolukhoba olwasirwa bulahi.

²¹ Singa butswa obwo MWAMI yalaka Musa, baboha tsingaka tsiesichengwa siokhusilifu khutsingaka tsieingubo ya efoti nibarumikhilanga emikoye chiabuluu, kho esilaka siomukari sielele ikulu wolukhoba ne siraronya tawe.

Okhunaba tsingubo tsindi tsiobwesaalisi

²² Ekanzo eyebikhilwanga ikulu weingubo ya efoti yanabilwa obuusi bwa buluu bwonyene.

²³ Omuluhu kwokhwinjisiamwo omurwe kwatilwa khundulo khwakwo nobusi mbu kurarandukha tawe.

²⁴ Khulusiche lwosi okhubotokhana barakhwo amakomolu akanabwa nekatani isiyikhu nende obuusi bwabuluu, obusembe nende obwakhanyu.

²⁵ Khandi hakari wamakomolu tsana baraho etsikengele tsietsahabu okhubotokhana olusiche lwosi olwekanzo.

²⁶ Buli ekengele yetsahabu yalondwanga nende likonolu okhubotokhana olusiche lwosi olwekanzo, singa OMWAMI yali nalachile Musa.

²⁷ Banabila Haruni nende abasianibe amasati,

²⁸ nende ebilemba, etsikofia, ebilwali biekatani,

²⁹ nende evesti yekatani isiyikhu khandi eyanabilwa obuusi bwabuluu, obusembe nende obwakhanyu ma neng'onibwa singa OMWAMI yali nalachile Musa.

³⁰ Balomba omukonze khutsahabu isiyikhu, efwali olusimbi olutsienukhu lwobwehani, ma nibahandikakhwo mbu, “Okwahanwa khu MWAMI.”

³¹ Bakuboha imbeli wesilemba nende omukoye kwabuluu, singa OMWAMI yali nalachile Musa.

Okhumalila omulimo

³² Emilimo chiosi khu Liheema liokhubaho khwo MWAMI chiamala nichihwa. Abaisiraeli bakhola ebindu biosi singa OMWAMI yali nalachile Musa.

³³ Baleer'ra Musa Liheema nende ebindu biamwo biosi, nebifuuli bialio, tsimbao tsialio, tsisimbo tsialio, ebikhongo bialio nende ebikuru bialio;

³⁴ nende esifuunikho esialombwa khwiseelo liesimeme elienikhwa murangi inzakhanyu; nende esifuunikho sieliseelo lisiyikhu; etsipasia tsiokhulisinga;

³⁵ nende Lisanduku lia Indakano elilimwo nende oruchina orupapale rubili, nebilenje bialio nende esifuunikho sialio;

³⁶ emesa nende ebirumikhilo biakhwo, nende emikaati echiahanwa khu Nyasaye;

³⁷ esihani sietsitaya esietsahabu netsitaya tsiakhwo, nebikuru biasio amafura ketsitaya;

³⁸ olusambwa lwetsahabu, amafura kokhubakha esielwa sia Nyasaye, obwali obuhunyanga bulahi; epasia yomubwinjil'lo bwe Liheema;

³⁹ olusambwa lwomukasa nende esing'enge sialwo siomukasa, nebikhongo bialwo, nende ebirumikhilo bialwo biosi; ebeseni yokhwesaabilakhwo nende esierenjekhwangakhwo;

⁴⁰ etsipasia tsiokhusinga Liheema nende ebikhongo biatsio nende ebikuru biatsio; epasia yomubwinjil'lo bwomulukaka lwe Liheema nende emikoye chiayo; ebibambo bie Liheema; ebirumikhilo biosi ebiokhurumikhilwa Mwiheema;

⁴¹ nende tsingubo etsieing'ono indahi etsia abesaalisi bakhoya okhwebiikha nibali Habundu Hatsienukhu – tsingubo tsinzienukhu etsia Haruni nende etsiabasianibe.

⁴² Abaisiraeli bali nibakhol'le emilimo chiosi singa OMWAMI yali nalachile Musa.

⁴³ Musa yahenjelesia siesindu siosi ma nalola mbu bali nibabikhol'le singa OMWAMI yali nalachile Musa. Kho Musa nabalaamila tsikhabi.