OKHURULA 36 - EBAIBO INZIENUKHU

¹ “Besaleli, Oholiabu, nende abasitsa bandi bosi abemilimo chiamakhono abo MWAMI yali naheye obuchesi nende okhumanyilisia, abamanyile obwokhulomba ebindu biosi ebienyekhanga mukhwombokha khwe Liheema litsienukhu, bakhoya bombokhe okhulondokhana nende lilako elio MWAMI yali nahan'ne.”

Abandu baleera ebihanwa ebinji

² Musa yalanga Besaleli, Oholiabu nende abasitsa bandi bosi abo MWAMI yali naheye obuchesi khandi abali nesinani sikhukhonyel'la omulimo, ma Musa nababool'la bachiake okhukhola omulimo.

³ Babukula ebihanwa biosi ebia Abaisiraeli bali nibaleer're khulwokhwombokha Liheema litsineukhu. Nebutswa abandu ba Isiraeli batsilil'la okhuleer'ranga Musa ebihanwa biemisango buli mukamba.

⁴ Ma abasitsa yabo abali nibambokhanga nibatsia

⁵ khu Musa nibamubool'la mbu, “Abandu baleeranga ebindu ebiyomba esichelo khulwomulimo kwo MWAMI alachile mbu kukholwe.”

⁶ Kho Musa yaruma lilako mubandu bosi mukambi mbu omundu wosi aratsilil'la okhuhaana ebihanwa khulwe Liheema litsienukhu tawe; kho abandi sibaleera ebihanwa khandi tawe.

⁷ Ebiali nibimal'le okhuleerwa biali ebinji okhubira esichelo khumulimo kwosi okwenyekhanga kukholwe.

Okhulomba Liheema liokhubaho khwo MWAMI

⁸ Abandu bobusitsa obwinji mubakholi bemilimo yabo nibo abombokha Liheema liokhubaho khwo MWAMI. Balilomba okhurula mubitonye likhumi biekatani isiyikhu etsokan'nemwo obuusi bwabuluu, obusembe nende obwakhanyu ma enabiywekhwo ebilombe bietsimbaha.

⁹ Ebitonye biosi biali ebihelanu, mbu tsimita likhumi natsibili oburambi ne obuchiikha etsimiita tsibili.

¹⁰ Banaba birano khubio halala okhuba esitonye silala khandi nibanaba ebindi birano halala.

¹¹ Balombe ebifuuli biemiluhu tsie ingubo yabuluu khundulo khwesitonye silala khubuli birano nibili halala.

¹² Babikha ebifuuli amakhumi karano khungubo inzelesia eyokhuranga khandi nibalomba ebindi amakhumi karano khungubo yakhabili.

¹³ Balomba ebifuuli biefetsa amakhumi karano ebiokhurumikhila okhuhongania halala tsingubo tsibili yitsio okhuba ingubo ndala.

¹⁴ Ma nibalomba esifuunikho sie Liheema okhurula khubitonye likhumi nasilala ebieingubo eyanabwa khubwoya bweimbusi.

¹⁵ Babihelania biosi okhuba noburambi bwetsimita likhumi natsitaru ne obuchiikha etsimiita tsibili.

¹⁶ Banaba ebitonye birano bietsingubo khubwabio ne ebindi bisasaba khubwabio.

¹⁷ Balomba ebifuuli biemiluhu amakhumi karano khundulo khwesitonye siekhumal'likha khubitonye biokhuranga birano ne ebifuuli bindi amakhumi karano khundulo khwesitonye siokhumal'likha mubitonye bindi bisasaba.

¹⁸ Balomba ebifuuli biemiluhu amakhumi karano chiomukasa okhuhongania ebitonye bibili yibio okhubikhola esifuunikho silala.

¹⁹ Khandi balomba ebifuunikho bindi bibili, silala okhurula khwiselo liesimeme elienikhwa murangi inzakhanyu ne esindi okhurula khwiselo litubukhu, okhurumikha singa esifunikho sie ikulu.

²⁰ Balomba ebikhongo bie Liheema okhurula khumusaala kwomusisia.

²¹ Esikhongo silala siali noburambi okhutsia ikulu obuhela etsimiita tsine ne obuchiikha bwali etsisentimita amakhumi kasasaba nachisasaba;

²² ne chibe netsinzika tsibili etsimbelani kho ebikhongo yibio bionganibwe halala. Ebikhongo bie Liheema biosi biali netsinzika yitsi.

²³ Balomba ebikhongo amakhumi kabili biokhusinjisia Liheema elubeka lwenandete,

²⁴ nende ebikuru bietsahabu amakhumi kane khulwokhurebwa isi wesikhongo biosi, ebikuru bibili isi wabuli esikhongo okhuletel'la tsinzika.

²⁵ Balomba ebikhongo amakhumi kabili biokhusinjisia Liheema elubeka lwesinyolu

²⁶ nende ebikuru bietsahabu amakhumi kane, bibili isi wa buli esikhongo silala.

²⁷ Emukongo we Liheema khulubeka lwe Emasaba balombayo ebikhongo bisasaba

²⁸ nende ebikhongo bibili mutsikona.

²⁹ Ebikhongo biomutsikona yibi biahonganibwa okhurula hasi okhwola ikulu. Ebikhongo bibili ebialombanga etsikona tsibili bialondanibwa munjila yiyi.

³⁰ Kho khwaliho nebikhongo munane nende ebikuru bietsahabu likhumi nabisasaba, buli bibili ise wabuli esikhongo.

³¹ Balomba chisimbo likhumi nende chirano okhurula khumisaala chiemisisia, chirano khubikhongo ebiali elubeka l'lala lwe Liheema,

³² ne chirano khulubeka lundi, khandi chirano khulubeka lwemasaba, emukongo we Liheema.

³³ Olusimbo lwahakari, lwabukhania hakari webikhongo okhurula elubeka l'lala lwe Liheema okhwola khulubeka lundi.

³⁴ Bafuunikha ebikhongo yibio netsahabu ma nibatsiongania nende tsingaka tsietsahabu okhutiila tsisimbo, etsiali nitsifuunikhilwekhwo etsahabu.

³⁵ Balomba epasia yekatani isiyikhu, eyanabilwa obuusi bwabuluu, obusembe nende obwakhanyu ma niyanabilwakhwo ebilombe bietsimbaha.

³⁶ Balomba ebikhongo bibili okhurula khumusisia okhubohakhwo epasia, nibatsifunikhakhwo efetsa ma nibachiongania halala nebifuli biefetsa. Ma nibalomba ebikuru bine bietsahabu okhusinjisiamwo ebikhongo yibio.

³⁷ Mubwinjil'lo bwe Liheema baramwo epasia eyanabilwa obuusi bwabuluu, nobusembe nende obwakhanyu, eyang'oonibwa khulwokhunabilwakhwo amahwa.

³⁸ Khupasia tsana batsilombela ebikhongo birano ebilikhwo ebifuuli biemiluhu, echiafuunikhwa netsahabu ikulu nende hasi, ma nibalomba ebikuru biomukasa khulwe ebikhongo yibio: