OKHURULA 31 - EBAIBO INZIENUKHU

Abombokhi be Liheema liokhubaho khwanje

¹ OMWAMI nabool'la Musa mbu,

² “Mal'le okhwahula Besaleli omusiani wa Uri, omwitsukhulu wa Huri okhurula mulwibulo lwa Yuda,

³ ma mwitsusisiemwo nende obunyali bwanje. Mwelesisie okhumanyilisia, obusitsa, nende obuchesi bwokhukhola omulimo kwamakhono.

⁴ Khulwo okhulomba amang'oole kobusitsa ma okhukarumikhila okhulombamwo ebindu biefetsa, tsietsahabu nende ebiomuka;

⁵ Khulwo okhubaatsa amachina kokhwombokhwa; khulwo okhubaatsa tsimbao; nende omulimo kundi kwosi okwobusitsa bwamakhono.

⁶ Khandi mal'le okhwahula Oholiabu omusiani wa Ahisamaki okhurula mulwibulo lwa Dani khulwokhutiya halala n'naye. Khandi mbelesisie abandu bandi bobusitsa obuchesi obukali kho babe abanyala okhulomba ebindu biosi ebiamal'le okhulaka bilombwe:

⁷ Liheema liokhubaho khwanje, Lisanduku lie Indakano nende esifuunikho sialio, ebindu biosi ebili Mwiheema,

⁸ emesa nende biosi ebilikhwo, esihani sietsahabu siefetsa isiyikhu nende biosi ebilikhwo, olusambwa lwokhusambilakhwo obwali,

⁹ olusambwa lwemisango emisambe nende ebindu biosi ebilikhwo, ebeseni nende ebiokhutsirenjekhakhwo,

¹⁰ tsingubo tsioluyali tsiobwesaalisi khulwa Haruni nende abasiani baabe okhurumikhila olwa baba nibakholanga omulimo kwobwesaalisi,

¹¹ amafura kokhutsienula, nende obwali obuhunyanga obulahi khulwa Habundu Hatsienukhu. Olwa baba nibalombanga ebindu yibi biosi okhwola bakhole singa obwa ndali okhukhumanyia.”

Esabato, litukhu liokhuhuluukha

¹² OMWAMI yalaka Musa

¹³ okhubool'la abandu ba Isiraeli mbu, “Mwitsul'le okhulinda Esabato litukhu lianje liokhuhuluukha, sichila nesimanyilo hakari wanje n'nenywe mumatukhu kosi aketsanga, okhumanyia Ise OMWAMI ndamukhola abandu banje.

¹⁴ Okhwola mulinde litukhu liokhuhuluukha sichila nelitsienukhu. Omundu wosi oralindanga, nebutswa nakhola emilimo mwitukhu yilio okhwola yerwe.

¹⁵ Muli namatukhu kasasaba okhukhola emilimo chienywe, nebutswa litukhu liakhane nakhataru nelitukhu lioluyali eliokhuhuluukha eliahanwa khu ise. Omundu wosi owakhakhola emilimo khwitukhu yilio yerwe.

¹⁶ Abandu ba Isiraeli okhwola abalindi litukhu yili singa esimanyilo sie Indakano.

¹⁷ Nesimanyilo siamatukhu kosi hakari wanje nende abandu ba Isiraeli, sichila Ise OMWAMI ndalomba likulu nende esibala mumatukhu kasasaba, ne khwitukhu liakhane nakhataru ndalekha okhukhola emilimo ma nimbuluukha.”

¹⁸ Olwa Nyasaye yali namal'le okhul'loma khu Musa nali khusikulu sia Sinai, yamuha oruchina orupapale rubili, orwa Nyasaye mwene yali nahandichilekhwo amalako.