OKHURULA 30 - EBAIBO INZIENUKHU

Olusambwa lwo okhusambilakhwo obwali

¹ “Lomba olusambwa okhurula khumusala kwomusisia khulwo okhusambilakhwo obwali.

² Olusambwa yilwo lube oluhelanu tsimbeka tsiosi, oburambi bube etsisentimita amakhumi kane nachirano khandi obuchiikha etsisentimita amakhumi kane nachirano; ma lube etsisentimita amakhumi karano nakane okhutsia ikulu. Tsinzika tsialwo tsiomutsikona tsine tsibe esitonye silala nende olusambwa lwene.

³ Ikulu wolusambwa nende tsimbeka tsialwo tsine halala netsinzika tsialwo tsihomwekhwo etsahabu isiyikhu; ma ore khundulo wasio omusinji khwetsahabu okhulubotokhana,

⁴ Olombe tsingaka tsibili kwetsahabu etsiokhuluchinga ma otsire yisi wetsimbeka tsibili tsiomusinji kwetsahabu khulwokhuleeta emisaala chiokhuchinga olusambwa.

⁵ Emisaala chiokhuchinga olusambwa tsilombwe okhurula khumisaala chiomusisia, ma tsihomwekhwo etsahabu.

⁶ Olusambwa yilu lurebwe esioba wepasia eyasungwa imbeli we Lisanduku lie Indakano; yaho niho habundu ha nambukaane n'nawe.

⁷ Buli mukamba tsuli olwa Haruni nayetsenge okhurechekha etsitaya, nasambilenje obwali obuhunyanga bulahi khulusambwa yilu.

⁸ Khandi akhole mbwo olwaba nahambianga etsitaya mukolooba. Okhuhaana omusango kwobwali yikhu, kutsilil'le sila okhukoyanibwa mumatukhu kosi aketsanga.

⁹ Orakhahaanakhwo omusango kwosi khulusambwa yilu okwomusilo, omusango okwomuruko nohomba omusango kwobuswache khandi orakhasundulakhwo omusango kwewaini tawe.

¹⁰ Khumuhika mulala Haruni nahaanenje omusango kwokhutsienula olusambwa khulwo khutsukhakhwo amatsahi komuruko okwahanwa khulwe tsimbi khutsinzika tsine tsiolusambwa. Kano kakholwe buli muhika khumihika tsiosi etsitsanga. Olusambwa yilu lube olutsienukhu kupu, niluhanwanga khu ise oli OMWAMI.”

Obusuru bwe Liheema Liokhubaho khwo MWAMI

¹¹ OMWAMI yabool'la Musa mbu,

¹² “Olwoba nobukula amabalo kabandu ba Isiraeli, buli mundu arunge obukusi bwobulamu bubwe, kho amanyakhano kalekhe okhwitsa khuye olwabandu basibalwa.

¹³ Buli mundu wosi obal'lwe okhwola arunge amapesa kenyekhanga khandi akali nobusiro obwahuchilwa. Buli mundu arunge kano singa omusango okuhan'nwe khu ise.

¹⁴ Buli mundu wosi abalwe, yako nokhuboola omusaatsa wosi oli nemihika amakhumi kabili, nohomba okhuyomba emihika amakhumi kabili, arunge amapesa yaka.

¹⁵ Omusaatsa omuhinda ararunga okhuyomba yaka tawe, kata omusaatsa omutakha ararunga mati okhuyomba yaka olwa baba nibarunganga amapesa yaka khulwobulamu bwabwe tawe.

¹⁶ Mubunjelesie amapesa yaka khubandu bosi Abaisiraeli ma mukarumikhile khulwokhulinda Liheema liokhubaho khwanje. Obusuru buno nabube omurungo kwobulamu bwabwe, ma nase nanzitsul'lenje okhubasinga khubasuku babwe.”

Ebeseni yo Mukasa

¹⁷ OMWAMI nabool'la Musa mbu,

¹⁸ “Lomba ebeseni yomukasa elikhwo ebikuru biayo biomukasa khulwokhwesaabilakhwo. Ochire hakari we Liheema nende olusambwa, ma orekhwo amaatsi.

¹⁹ Haruni nende abasiani baabe babukule amaatsi kalikhwo khulwokhwesaaba amakhono nende ebilenje

²⁰ nibasili okhwinjila Mwiheema nohomba okhwesunda ahembi khulusambwa okhuhaana omusango kwebiakhulia.

²¹ Okhwola besaabe amakhono nende ebilenje, babe abaranyala okhufwa tawe. Lino nelilako liabwe nende abetsinzibulo tsiabwe okhulonda khulwe inziayo.”

Amafura kokhutsukhil'lwa khumwelwa wa Nyasaye

²² OMWAMI nabool'la Musa mbu,

²³ “Obukule ebihunyanga bulahi; mbu etsikilo tsisasaba tsiamafura kamanemane, etsikilo tsitaru tsiomutalasini okuhunyanga bulahi, etsikilo tsitaru tsiamaatsi kemikhonye akahunyanga bulahi,

²⁴ nende etsikilo tsisasaba etsiomusubili (tsiosi etsili nende obusiro obwahuchil'lwa). Otsokaniemwo etsiliita tsine tsiamafura komuseituni,

²⁵ ma olombe amafura amatsienukhu akokhutsukhil'lwa khumwelwa wa Nyasaye nikatsokanisibwe singa amafura kokhwebakha.

²⁶ Okarumikhile okhutsienulwa Liheema liokhubaho khwanje, Lisanduku lie Indakano,

²⁷ emesa nende ebindu biosi ebiakhwo, esihani sietsitaya, nende biosi ebilikhwo, olusambwa lwokhusambilakhwo obwali,

²⁸ olusambwa lwokhusambilakhwo emisango nende biosi ebili khulusambwa tsana nende ebeseni yokhwesaabilakwo nende esiokhurenjekhwakhwo.

²⁹ Ohaane ebindu yibi munjila yiyi nabio nabibe ebitsienukhu okhusila, ne omundu wosi owakhahambakhwo nohomba esindu siosi esiakhahambakhwo silasaalisibwa nobunyali bwobutsienukhu bwalwo.

³⁰ Ma otsukhil'le amafura khu Haruni nende abasiani baabe ma obahule okhuba abesaalisi bomulimo kwanje.

³¹ Bool'la abandu ba Isiraeli mbu, ‘Amafura amatsienukhu kokhwahula yaka okhwola karumikhilwe mumulimo kwanje amatukhu kosi aketsanga.

³² Karakhatsukhil'lwa khubandu bosi tawe, khandi muralombakhwo amafura akatsokanibwa singa mbu tawe. Namatsienukhu, nenywe okhwola mukabukule okhuba amatsienukhu.

³³ Omundu wosi owakhalombakhwo amafura singa yaka nohomba owakhakarumikhilakhwo khumundu wosi orali omwesaalisi salabalwa singa omundu wanje tawe.’ ”

Obwali

³⁴ OMWAMI nabool'la Musa mbu, “Bukule esichelo esihelanu khubuli silala khubindu ebihunyanga bulahi yibi: Sitakite, Onicha, galibanumu nende obane.

³⁵ Obirumikhile okhulomba obwali obutsokanemwo amafura kokhwebakha; omeetekhwo echumbi okhubusiiya nende okhubutsienula.

³⁶ Osekhwo bilala khubio bibe obusie obunyukhe, obuhile Mwiheema liokhubaho khwanje ma obunyul'lusie imbeli we Lisanduku lie Indakano. Amang'ana kobwali yaka mukakhole okhuba amatsienukhu okhusila.

³⁷ Muralombakhwo obwali bundi obufwana singa yibu khubwenywe tawe. Mubukule obwali yibu singa esindu esitsienukhu esiahanwa khu ise.

³⁸ Omundu wosi niyakhalombakhwo obwali obufwana yibu khulwo okhwebakha, salabalwa okhuba mulala khubandu banje tawe.”