OKHURULA 3 - EBAIBO INZIENUKHU

Nyasaye yalanga Musa

¹ Litukhu elala Musa yali niyayanga esiayo sia kukanyene Yetsero, omwesaalisi wa Midiani. Yakhoma esiayo nakhalania musitsiimi ma niyoola khusikulu esitsienukhu sia Sinai.

² Habwene yaho om'malaika wo MWAMI yamulolekhela singa omul'lo okwatukhanga musitsakha. Musa yalola esitsakha nisihambile omul'lo nebutswa sisiakhakha tawe.

³ Naboola mumwoyo kukwe mbu, “Yaka nakokhuchenya! Nisina esichilanga esitsakha yisi nisirakhakha? Ndesunde ahembi ma ndole.”

⁴ Olwo MWAMI yalola Musa niyesundanga ahembi, yamulanga nali hakari wesitsakha naboola mbu, “Musa! Musa!” Musa nakalusia mbu, “Yee, nise uno.”

⁵ Nyasaye namubool'la mbu, “Oreetsa ahembi hano tawe. Hinia ebilaaro sichila ahosinjiye hano nihabundu hatsienukhu.

⁶ Ise nise Nyasaye wabakuka baabo, Nyasaye wa Aburahamu, Isaka, nende Yakobo.” Kho Musa yefuuma m'moni mumwe sichila yali nariiye okhuhenga Nyasaye m'moni.

⁷ Ma OMWAMI naboola, “Mal'le okhulola obwabandu banje basandibwanga Emisiri; mbuliye okhulakaya khwabwe nibenyanga bahabinwe okhurula khubaami babwe ababahachianga okhukhola emilimo. Ndamanya singa bakhupanga esibi,

⁸ kho nase nzikhile okhurula mwikulu okhubahabina okhurula khu Bamisiri nende okhubahiinia Emisiri ma mbahile musibala esilahi esiobweyangu, esietsulamwo obuhinda nende ebiamo, khandi nimwo omwa Abakanaani, Abahiti, Abaamori, Abaperisi, Abahiwi, nende Abayebusi bamenyele lunondi.

⁹ Siahene mbuliye okhulakaya khwabandu banje, khandi nduutsi obwa Abaamisiri babasandianga.

¹⁰ Luno khurumanga otsie khumuruchi we Misiri kho ohinie abandu banje musibala sisie.”

¹¹ Nebutswa Musa nabool'la Nyasaye mbu, “Ise sindi nobunyali tawe. Kho ndakhatsia mbwena khumuruchi ma mbinie Abaisiraeli mu Misiri?”

¹² Nyasaye namukalusia mbu, “Nambe halala n'nawe, ne olwa nobe nohinisie abandu banje okhurula Emisiri naundekayakaye hasikulu sino. Yisio siakhabe esimanyilo mbu nise okhurumile.”

¹³ Nebutswa Musa nakalusia, “Olwa nanzie khu Baisiraeli ma mbabool'le, ‘Nyasaye wabakuka benywe urumile khwinywe,’ nabareeba mbu, ‘Alangwanga mbwena?’ Kho ndakhabakalusia mbwena?”

¹⁴ Nyasaye naboola mbu, “Ise nise Nyasaye. Otsie okhubabool'la mbu, ‘Uyo olangwanga Nyasaye niye ourumile khwinywe.’

¹⁵ Obool'le Abaisiraeli mbu ‘OMWAMI Nyasaye wabakuka benywe, Nyasaye wa Aburahamu, Isaka nende Yakobo urumile khwinywe.’ Yili nilio eliira lianje inziayo; nimbwo tsinzibulo tsiosi etsiamatukhu aketsanga natsinangenge.

¹⁶ Otsie okhubunjikha abemeli ba Isiraeli halala ma obabool'le mbu Ise, OMWAMI, Nyasaye wabakuka babwe, Nyasaye wa Aburahamu, Isaka nende Yakobo yali okhukhulolekhela. Obabool'le mbu nzitsile khubo, khandi nduutsi aka Bamisiri bakholanga khubo.

¹⁷ Mal'le okhukhalaka mbu nambahinie Emisiri aha bakhupibwanga esibi, ma nambahile esibala esietsulamwo obuhinda nende ebiamo, omwa Abakanaani, Abahiti, Abaamori, Abaperisi, Abahiwi nende Abayebusi bamenyele.

¹⁸ “Abandu banje nabahulile aka nobabool'le kho okhwola otsie nende abemeli ba Isiraeli khumuruchi we Misiri ma omubool'le mbu, ‘OMWAMI, Nyasaye wa Baheburania ukhwebisuliye, ne luno yanza okhuhuchil'le khutsie oluchendo lwamatukhu kataru musitsiimi khulwokhuhaana omusango khu MWAMI Nyasaye wefwe.’

¹⁹ Manyile mbu omuruchi we Misiri sinamuhuchil'le okhutsia tawe, fwana nahachibubwe okhukhola mbwo.

²⁰ Nebutswa narumikhile obunyali bwanje ne nandeere esinyasio khu Misiri khulwo okhukhola ebindu biokhurisia musibala yimwo. Olunyuma omuruchi namulakhuule mutsie.

²¹ “Nakhole Abaamisiri okhumuhelesia oluyali, kho olwabandu banje nababe nibarulanga Emisiri, barakhatsia amakhono amakhaya tawe.

²² Siomukhasi Omuisiraeli natsie khubarendebe Abaamisiri nende khumukhasi wosi Omumisiri omenyanga munyumba yiye okhusaba tsingubo nende efetsa nende ebimili bietsahabu. Abaisiraeli bakhare ebindu khubaana babwe abasiani nende abakhaana, ma babukule obuhinda bwa Bamisiri.”