OKHURULA 2 - EBAIBO INZIENUKHU

Okhwibulwa khwa Musa

¹ Munyinga yitsio omusiani mulala okhurula mulwibulo lwa Lawi yateesia omukhaana womulwibulo lwabwe.

² Omukhasi uyo yabelekha ma niyebula omwana omusiani. Olwa nyina yalola nali omwana welikondo lilahi yamubisa khulwemiesi chitaru.

³ Nebutswa olwa aranyala okhutsilil'la okhumubisa, yabukula esikapo esialombwa khutsisala tsiebimwelo ma nabukula elamu nachihomela musikapo tsana okhwikal'la amaatsi okhwinjilamwo. Yara omwana musikapo tsana ma nasira mwitookho khundulo khwomuchela.

⁴ Mbotso nyene omwana uyo yasinjil'la ehale okhulola akeetsa okhwekholekha khuye.

⁵ Omukhaana womuruchi yeetsa hamuchela okhwesinga, olwa abarumikhilibe bali nibachendanga khundulo khwomuchela. Yalola esikapo mwitookho hamuchela ma naruma omurumikhili uwe omukhaana okhusibukula.

⁶ Olwa yasifuunula yalola omwana omusiani. Omwana tsana yali nalakayanga ma omukhaana womuruchi namubelel'la. Yaboola mbu, “Uno nimulala khubaana ba Baheburania.”

⁷ Kho mbotso nyene omwana tsana namureeba mbu, “Nzie khulanjile omukhasi Muheburania akhulel'le omwana uyu?”

⁸ Omukhaana womuruchi nakalusia “Yanza otsie.” Kho omukhaana uyo natsia okhuleera nyina mwana mwene.

⁹ Omukhaana womuruchi namubool'la “Obukule omwana uyo ma undel'le, nase nakhurunje.” Kho yabukula omwana namukhusia.

¹⁰ Olunyuma, omwana niyamal'le okhukhula yamuhila khumukhaana womuruchi owamubukula singa omusiani uwe. Naboola mumwoyo kukwe mbu, “Ndamuhinia okhurula m'maatsi kho nzia okhumulanga Musa.”

Musa yelukhila musibala sia Midiani

¹¹ Olwa Musa yali niyakhul'le, yatsia okhukonya abandu babwe, Abaheburania ma nalola obwa bahachibwa okhukhola emilimo emitinyu. Khandi yalola Omumisiri niyeeranga Omuheburania mulala khubandu babwe.

¹² Nahenga yiyi ne yiyi ne olwa aralola omundu, yeera Omumisiri ma namubisa mumuyekhe.

¹³ Litukhu lialondakhwo khandi yatsia okhubakonya ma nalola abasaatsa Abaheburania babili nibakhupananga. Nabool'la owali nesikha mbu, “Busina ibe okhupakanga Omuheburania wasio?”

¹⁴ Omundu uyo namukalusia mbu, “Niwina owakhukhola okhuba omuruchi nende omukhalachi wefwe? Wenyanga okhunzira singa wayir're Omumisiri?” Ma Musa naria ma nabool'la m'mwoyo kukwe mbu, “Siahene abandu bamanyile akandakhol'le.”

¹⁵ Olwomruchi yakahul'la, yenya okhwira Musa, nebutswa Musa yelukha ma natsia okhumenya musibala sia Midiani. Litukhu elala olwa Musa yali niyekhaye hasitaho,

¹⁶ abakhaana ba Yetsero omwesaalisi wa Midiani bane nabataru betsa okhutaha amaatsi nibaketsusia mumataramu akokhunywesisiamwo amakondi ka samwana nende tsimbusitsie.

¹⁷ Nebutswa abaayi bandi bakhungania abakhaana ba Yetsero. Kho Musa yatsia okhubahabina ma nabanywesisia amakondi kabwe nende tsimbusi.

¹⁸ Olwa bakalukha khusamwana wabwe Yetsero, yabareeba mbu, “Busina mucheleye bwangu olwaleelo.”

¹⁹ Abakhaana yabo nibamukalusia mbu, “Omumisiri yali okhukhuhabina okhurula khubaayi khandi yali okhukhutayila amaatsi khandi nanywesia esiayo siefwe.”

²⁰ Yetsero nabareeba mbu, “Omumisiri tsana ali hena? Busina m'mulekhele esioba? Tsie mumulange yetse khulie n'naye.”

²¹ Kho Musa yahuchil'la okhumenya nende Yetsero ne Yetsero yamuhelesia omukhaanawe Sipora mbu amuteesie.

²² Sipora niyebula omwana omusiani, ma Musa namukulikha Gerishoni; okhuba yaboola mumwoyo kukwe mbu “Ndi omucheni musibala sino.”

²³ Emihika eminji nichiahweye omuruchi we Misiri yamala afwe, nebutswa Abaisiraeli batsilil'la okhubinda mukhusalisibwa khwabwe ma nibalakaya mbu bakhonywe. Nyasaye yahulila okhulakaya khwabwe,

²⁴ khandi nahul'la okhubinda khwabwe ma niyetsul'la indakano yiye nende Aburahamu, Isaka, nende Yakobo.

²⁵ Yalola obwa Abaisiraeli bali mubutinyu bwobusumba ma nababelel'la.