OKHURULA 12 - EBAIBO INZIENUKHU

Lisabo lie Pasaka

¹ OMWAMI yal'loma khu Musa nende Haruni nibali musibala sie Misiri naboola mbu,

² “Omwesi kuno nakubetsenje okwokhuranga khumuhika kwenywe.

³ Muhaane amalako yaka khubandu ba Isiraeli bosi: Khwitukhu lielikhumi khumwesi kuno siomundu abukule esimeme sielikondi nohomba esieimbusi khulwa abeinyumbaye.

⁴ Abeinyumbaye nibarali abenji abaranyala okhumala inyama yosi, ye nende omurendewe barumikhile esimeme silala, okhuhelana nende obwinji bwabandu nende esichelo esia bulimundu anyala okhulia.

⁵ Munyala okhubukula likondi nohomba imbusi nebutswa libe likhole elimal'le omuhika mulala okhurula nilibulwa eliralikhwo nobulema bwosi.

⁶ Ma khubwile bwelitukhu lielikhumi nakhane khumwesi kuno abandu ba Isiraeli bosi nabeere emiruko.

⁷ Abandu babukulekhwo amatsahi kemiruko yitswo ma bakabakhe khumatilwa kemiliango tsietsinyumba tsieinyama elilwamwo.

⁸ Obutukhu bwene yibwo inyama esianikhilwe ma elibwe nende emiro emilulu ma nende emikaati echiralimwo amamela.

⁹ Muraliakhwo inyama imbisi nohomba etekheywe mumaatsi tawe, nebutswa muchilie nesambilwe yosi halala nomurwe, nebilenje nende ebiomunda.

¹⁰ Muralekhakhwo esitonye siosi sisikale okhwola mukamba tawe. Siosi esiakhaba nisisikala, musisambe mumul'lo.

¹¹ Ne muchilie bwangu nimwebikhile okhwerechekhela oluchendo, nimuli nebilaaro mubilenje nende indabusi mumukhono. Ne Lisabo lie Pasaka eliokhumbelesia oluyali, ise OMWAMI.

¹² “Mubutukhu bwene yibwo nambir're musibala sie Misiri ninziranga abasiani bambeli nende emiruko chiambeli, nimbananga esinyasio khubanyasaye be Misiri. Ise nise OMWAMI.

¹³ Amatsahi akabakhilwe khumatilwa nakabe esimanyilo khutsinyumba etsiamumenyelemwo. Olwa nandole amatsahi, nambire khutsinyumba tsienywe sila okhumusaalisia inywe olwa nambe nimbananga esinyasio khu Bamisiri.

¹⁴ Okhwola mwitsul'lenje litukhu yili singa esitsusio sie Lisabo lio MWAMI khulwo okhumwitsusia ako MWAMI yamukhol'la. Mulistul'lenje singa lisabo mumatukhu kosi aketsanga.”

Lisabo liomukaati okuralimwo amamela

¹⁵ OMWAMI naboola mbu, “Khulwa amatukhu kane nakataru, muraliakhwo omukaati okulimwo amamela tawe; mulie butswa omukaati okuralimwo amamela kwonyene. Khwitukhu liokhuranga, okhwola mufuube amamela okhurula mutsinyumba tsienywe, okhuba mulala khwinywe naba nalia omukaati okulimwo amamela khumatukhu kane nakataru yako, siyakhabalwa singa mulala khubandu banje tawe.

¹⁶ Khwitukhu liokhuranga nende khwitukhu liakhane nakhataru, namwakanenje khulwo okhundekayakaya. Omulimo kwosi kurakholwakhwo khumatukhu kabili yako tawe, nikhurali okhutekha ebiokhulia khwonyene.

¹⁷ Mwitsul'lenje lisabo yili sichila nilio litukhu elia ndahinia tsinzibulo tsienywe okhurula Emisiri. Mumatukhu kosi aketsanga okhwola mwitsul'le litukhu yili singa litukhu lie Lisabo.

¹⁸ Okhurula khumukolooba kwelitukhu lielikhumi nakhane khumwesi kwokhuranga okhwola khumukolooba kwelitukhu liamakhumi kabili nal'lala, murakhaliakhwo omukaati okulimwo amamela tawe.

¹⁹ Khumatukhu kane nakataru amamela kosi karanyolekhakhwo mutsinyumba tsienywe tawe, okhuba omundu wosi omwibule nohomba omucheni naba naliakhwo omukaati kwamamela, salabalwakhwo singa mulala khubandu banje khandi tawe.

²⁰ Muraliakhwo esindu siosi esilimwo amamela tawe. Habundu hosi ahanamumenyenje, namulitsenje omukaati okuralimwo amamela.”

Lisabo lie Pasaka eliokhuranga

²¹ Musa yalanga abemeli bosi aba Baisiraeli ma nababool'la mbu, “Siomusaatsa weinyumba yiye abukule esimeme sielikondi nohomba esieimbusi ma asiire, kho abetsinyumba tsiabwe bosi balie Lisabo lie Pasaka.

²² Ma babukule amasafu kolubinu mwine mulutaabo olutsukhilwekhwo amatsahi komuruko, ma mukabakhe khumatilwa. Omundu wosi khwinywe arakharulakhwo esioba okhwola olwa busia tawe.

²³ Olwa OMWAMI nabe nabir'ranga mu Misiri okhwira Abaamisiri, nalole amatsahi khumatilwa, ne sinahuchil'le Om'malaika wo Lufu okhwinjila mutsinyumba tsienywe ma amwire tawe.

²⁴ Inywe nende abaana benywe okhwola mulonde amalako yako inziayo.

²⁵ Olwa namwole musibala esio MWAMI yamulaamila, okhwola mwitsul'le Lisabo lie Pasaka yili nimulikhola.

²⁶ Olwa abaana benywe bakhamureeba, ‘Esifune siomulukha yiku nisina?’

²⁷ Mubabool'le mbu, ‘Nomusangokwe Pasaka yo MWAMI, sichila yabira khutsinyumba tsia Baisiraeli mu Misiri, sila okhubasaalisia. Yeera Abaamisiri nebutswa nakhubelel'la ifwe.’ ” Abaisiraeli basikama hasi ma nibekayakaya Nyasaye.

²⁸ Bamala nibatsia ma nibakhola ako MWAMI yali nalachile Musa nende Haruni.

OMWAMI yeera abasiani bakhulundu ba Bamisiri

²⁹ Mubutukhu hakari OMWAMI yeera abasiani bakhulundu bosi mu Misiri, okhurula khumusiani womuruchi owalaamilwa oburuchi, okhwola khumusiani womusumba oli mubuhambe; emiruko chiambeli okhwibulwa nachio khandi chierwa.

³⁰ Obutukhu yibwo, omuruchi nende abemeli baabe halala na Bamisiri bandi bosi babuukha. Khwaliho nokhwekhuula okhukali musibala sie Misiri siosi, sichila siyalikhwo inyumba yosi ya Bamisiri eyomwana omusiani arafwakhwomwo tawe.

³¹ Obutukhu bwene yibwo omuruchi yarumania mbu Musa nende Haruni balangwe ma nababool'la mbu, “Rule bwangu mutsie, inywe nende Abaisiraeli bosi! Rule musibala sianje; tsie mwekayakaye OMWAMI singa mwabeye okhureeba.

³² Mubukule amakondi kenywe, tsimbusi nende tsing'ombe ma mutsie. Khandi musaaye nimureebela tsikhabi.”

³³ Abaamisiri bayungia abandu barule bwangu musibala siabwe; ma nibaboola mbu, “Ifwe khulafwa nimuba nimurarula hano.”

³⁴ Kho abandu betsusia ebifuria biabwe biokhutekha nende obusie bweingano obutubuliywe m'maatsi sila okhureebwamwo amamela, ma nibabiboha mumachoola ma nibachinjila khumabeka.

³⁵ Abaisiraeli bali nibakhol'le singa Musa yali nababooleye, khandi bali nibareebele Abaamisiri okhubahelesia efetsa nende ebimili bietsahabu nende tsingubo.

³⁶ OMWAMI yakhola Abaamisiri okhuhaana oluyali khu Baisiraeli ma nibabahelesia ebia bali nibabareebele. Nimbwo Abaisiraeli babukula obuhinda bwa Bamisiri.

Abaisiraeli barula Emisiri

³⁷ Abaisiraeli basimukha nibachendanga khubilenje okhurula Ramase nibahengele Sukotsi. Bali abasaatsa ahembi etsielefu tsimia tsisasaba abakhasi nende abaana nibaralimwo.

³⁸ Omukanda omukali okwabandu bandi abarali Abaisiraeli kwatsia n'nabo halala nende amakondi, tsimbusi nende tsing'ombe.

³⁹ Batekha emikaati echiralimwo amamela okhurula khubusie obwabatubula nibasili Emisiri, sichila bali nibakhungilwe okhurula Emisiri matetekhana. Kho sibalikhwo neinyinga eyokhutekhelamwo ebiokhulia nohomba omukaati okuralimwo amamela.

⁴⁰ Abaisiraeli bali nibamenya Emisiri khulwemihika tsimia tsine namakhumi kataru.

⁴¹ Khwitukhu eliokhumalila emihika tsimia tsine namakhumi kataru, tsinzibulo tsiosi tsiabandu bo MWAMI tsiarula Emisiri.

⁴² Bwali obutukhu obwo MWAMI yabalinda butinyu nabahinia Emisiri; obutukhu bwene yibu bwahanwa singa esitsusio khu MWAMI mumatukhu kosi aketsanga, ne nobutukhu obwa Abaisiraeli balindil'langa khu MWAMI sila okhukona.

Amalako ke Pasaka

⁴³ OMWAMI yabool'la Musa nende Haruni mbu, “Kano niko amalako ke Pasaka: Omundu wosi orali Omuisiraeli aralia lisabo lie pasaka tawe.

⁴⁴ Nebutswa omusumba wosi owamuba nimwakula, anyala okhulilia nimuba nimumuseba mbelio.

⁴⁵ Omundu owamwamenyia singa omucheni nohomba omukholi wokhurungwa baraliakhwo tawe.

⁴⁶ Lisabo liosi lilil'lwe munyumba eya lilombeywemwo; lirahilwakhwo esioba weinzu yiyo tawe. Murafunakakhwo likumba liosi eliomuruko yikwo tawe.

⁴⁷ Abandu ba Isiraeli bosi okhwola bakhole omulukha yiku,

⁴⁸ nebutswa omundu wosi orasebwa arakhaliakhwo tawe. Omundu omucheni naba namenya mwinywe ma niyakhenya okhulia lisabo lie Pasaka khulwokhuhaana oluyali khu MWAMI, okhwola musebe abandu bosi abes'saatsa munyumba yiye. Kho alabalwa singa Omuisiraeli omwibule ma asange mwisabo yilio.

⁴⁹ Amalako amatelwa yaka khandi kalarumikha khu Baisiraeli abebule nende khubacheni abamenyanga mwinywe.”

⁵⁰ Abaisiraeli bosi bahuchil'la ma nibakhola ako MWAMI yali nalachile Musa nende Haruni.

⁵¹ Khwitukhu yilio OMWAMI yahinia tsinzibulo tsia Baisiraeli okhurula mu Misiri.