OKHUCHIAKA 50 - EBAIBO INZIENUKHU

¹ Yosefu yakwa khusamwana, nalakaya ne natsunzuuna obweni bubwe.

² Ma Yosefu nalaka mbu om'bili kwa samwana kubakhwe emisaala kulekhe okhuboola.

³ Kwabukula amatukhu amakhumi kane okhubakhwa emisaala. Niko amatukhu kom'bili kwamalanga nikurebwangakhwo omusaala. Abaamisiri bamwekhuula amatukhu amakhumi kane nakataru.

⁴ Olwa amatukhu kamasika kali nikahweye, Yosefu nabool'la abomunyumba yomuruchi mbu, “Nimuyanza muhile oburume buno khu mwami.

⁵ ‘Olwa papa wanje yali nali ahembi okhufwa, yareeba nimwesuhila mbu ndakhamuyabile musilindwa esiayayaba musibala sia Kanaani. Khe noyanza undekhe nzie okhuyabila papa ma nangalukhe.’ ”

⁶ Omuruchi nakalusia mbu, “Tsia oyabile papawo, singa walaka.”

⁷ Ma Yosefu natsia okhuyabila samwana. Abemeli bomuruchi bosi nende abakhongo nende abakali bandi abe Misiri batsia nende Yosefu.

⁸ Abomunyumba ya Yosefu, abasiani babwe, nende abandi bosi abeinyumba yasamwana batsia n'naye. Abaana batititi nende amakondi, tsimbusi netsing'ombe nibio ebiasikala musibala sia Kosheni.

⁹ Abasaatsa balala batsila mumakaari, abandi khutsisululi, ma nikuba omukanda omukali okhusila.

¹⁰ Olwaboola habundu holutse lwa Atadi lwali, ebukwe womuchela kwa Yorodani, bekhuula, nibakhupa etsikhwisi khulwoluhono. Yosefu yakhola amasika kasamwana khulwamatukhu kane nakataru.

¹¹ Olwabandu ba Kanaani balola abandu yabo nibekhuul'langa halutse lwa Atadi, baboola mbu, “Amasika ka Bamisiri kano namakali okhusila.” Niko akachila habundu yaho nihalangwa Abeli Misiraimu.

¹² Abaana ba Yakobo bakhola singa yali niyabalaka.

¹³ Bachinga om'bilikwe nibahila Kanaani ma nibakuyabila mulwangaywa olwomukunda kwa Makapela okuli ebukwe wa Mamure, okwa Aburahamu yakula okhurula khu Efuroni Omuhiti okhuba singa okwebilindwa.

¹⁴ Olwa Yosefu yali namal'le okhuyabila samwana, yakalukha Emisiri nende abaana babwe nende bosi abayali okhutsia n'nabo khumasika kasamwana.

Yosefu yasubisia abaana babwe

¹⁵ Abaana banga Yosefu olwa balola samwana ufwiye, nibaboola mbu, “Haundi Yosefu asikhusinyikhiiye ma akanakananga okhurunga es'sialia khumabi kakhwamukhol'la.”

¹⁶ Ma nibaruma oburume khu Yosefu nibaboola mbu, “Papa nasili okhufwa,

¹⁷ yakhubool'la khukhureebe mbu, ‘Noyanza obeele abaana benywe khububi bwabakhukhol'la.’ Luno khukhureebanga okhubeele khububi bwefwe abasumba ba Nyasaye wa papawo khwakhola.” Olwa Yosefu yanyoola oburume buno yalakaya amasika.

¹⁸ Ma abaana babwe abene nibeetsa nibenama imbeliwe nibaboola mbu, “Nifwe bano khuli imbeliwo, singa abasumba baabo.”

¹⁹ Nebutswa Yosefu nababool'la mbu, “Muraria tawe, ise sinyala okhwera musilenje sia Nyasaye tawe.

²⁰ Mwachooma okhukhol'la amabi, Nyasaye yakakalukhania okhuba amalahi, khe abe onyala okhuhonia obulamu bwabandu abenji abali mwoyo lunondi khulwa akali okhwekhola.

²¹ Muraria tawe. Namulinde bulahi halala nende abaana benywe.” Ma nabalemia emioyo nende amang'ana amalahi akabatiila khumioyo chiabwe.

Okhufwa khwa Yosefu

²² Yosefu yatsilil'la okhumenya Emisiri nende abeinyumba ya samwana, ma nafwa nali nende emihika emia ndala nende likhumi.

²³ Yamenya okhwola olwa yalola abaana ba Efuraimu nende abetsukhulube. Khandi yali mwoyo okhwola olwa yaleer'rwa abaana ba Makiri omwana wa Manase.

²⁴ Yosefu yabool'la abaana babwe mbu, “Ndi ahembi okhufwa, ne manyile Nyasaye namulinde, ma yakhamwemel'le okhurula musibala sino okhutsia musibala siayalaka Aburahamu, Isaka, nende Yakobo.”

²⁵ Ma Yosefu nareeba abandube okhulomba esiesuho. Yaboola mbu, “Musubisie mbu olwa Nyasaye yakhamwemel'le okhutsia musibala yisio, mwakhabukule om'bili kwanje mulatsie n'nakwo.”

²⁶ Ma Yosefu nafwiila Emisiri nali nemihika emia ndala nende likhumi. Nibabakha om'bilikwe emisaala khe kubule okhuboola ma nibakura mwisanduku.