OKHUBISULA 5 - EBAIBO INZIENUKHU

Esitapu esifumba nende Esimeme esie Likondi

¹ Ma nindola esitapu esifumba mumukhono omusaatsa okwe uyo owikhaye khuluruba; nasio siali nisiahandikwa tsimbeka tsiombi ne siabohwa nebimanyilo bine nabitaru.

² Khandi nindola om'malaika omukufu nalandianga nomwoyo omukali, “Niwina okwan'ne okhuboholola ebimanyilo yibio, nokhufunula esitapu yisio?”

³ Nebutswa siyaliho omundu wosi mwikulu kata khusibala nohomba isi wesibala owanyala okhusifunula esitapu kata okhusihengamwo tawe.

⁴ Kho, nase nindakaya buuli, sichila siyanyoolekhakhwo omundu mulala okwan'ne okhusifunula kata okhusihengamwo tawe.

⁵ Ne mulala khubakhulundu niyambool'la, “Oralakaya tawe! Lolako, esimba yoluyia lwa Yuda, es'soni sia Daudi esikufu, umal'le okhuleka obulwani. Omwene uyo anyala okhuboholola ebimanyilo biasio bine nabitaru khandi anyala okhufunula esitapu esifumba yisio.”

⁶ Khandi nindola hakari woluruba Esimeme Sielikondi, nisibotokhan'nwe tsimbeka tsiosi nende ebili mwoyo bine, nende abakhulundu. Esimeme Sielikondi yisio siafwana singa esir'rwe. Siali netsinjika tsine natsitaru netsimoni tsine natsitaru etsili emioyo chine nachitaru tsia Nyasaye etsiali nitsiarumwa mutsimbeka tsiosi etsiesibala.

⁷ Esimeme Sielikondi nisitsa ma nisibukula esitapu tsana, nisihinia mumukhono omusaatsa okwe uyo owikhaye khuluruba.

⁸ Ne olwa siali nisibukuuye esitapu tsana, ebili mwoyo bine halala nende abakhulundu amakhumi kabili nabane nibakwa mafungama imbeli we Simeme Sielikondi. Simulala khubo yali nende inongoli nende tsisalilo tsietsahabu nzitsuuyekhwo obwali, obuli amasaayo kabandu ba Nyasaye.

⁹ Ma nibemba olwembo olwibulo yilu: “Ibe niwe okwan'ne okhubukula esitapu yisio nokhuboholola ebimanyilo biasio. Okhuba ibe werwa, ne khulwa okhufwakhwo Wakul'la Nyasaye abandu okhurula mubuli oluyia, nende olulolomo nende olubamba nende olwibulo.

¹⁰ Ibe wabakhola okhwamiha n'nawe singa abesaalisi, abamurumikhilanga Nyasaye wefwe, nabo balaamiha esibala.”

¹¹ Khandi ndahenga nimbul'la omwoyo kwabamalaika abenji abaranyala okhubalwa, etsielefu netsielefu. Bali nibekhaye okhubotokhana oluruba nende ebili mwoyo bine nende abakhulundu.

¹² Nibaboola nomwoyo omukali: “Esimeme Sielikondi esiali okhwirwa sikwan'ne okhunyoola obunyali, nobuhinda, nobuchesi, netsingufu, nobukhongo nende oluyali.”

¹³ Nimbulila buli esilombe mwikulu, nokhusibala, nomuusi mwesibala, nokhunyanza nende biosi ebili mwo nibwembanga: “Olukoosi, noluyali, nobukhongo nobunyali bibe khu owikhaye khuluruba nende khu Esimeme Sielikondi inziayo.”

¹⁴ Ebili mwoyo bine tsana nibiboola, “Amina!” Ne abakhulundu nibakwa hasi nibekayakaya.