OKHUBISULA 3 - EBAIBO INZIENUKHU

Ebarwa khulikanisa lia Saride

¹ “Khum'malaika welikanisa elili Saride handika: “Kano namang'ana okhurula khu uyo oli ne Mioyo chine nachitaru echia Nyasaye nende etsiyasulwe tsine natsitaru. Ndamanya emilimo chichio; ndamanya ololekhanga singa omulamu nebutswa wafwa.

² Obe meso, ma oralisie amang'ana akooli n'nako nikasili okhufwa kupu. Sichila, okhwola leelo, sili okhulola emilimochio nichihesikhile imbeli wa Nyasaye wanje.

³ Kho witsul'le akawebaal'lwa nende akawahul'la; okafumile ma orule mutsimbi tsitsio. Noba norabba meso, ndetsa khuibe singa omwibi, nawe siolamanya esaa eya ndekhetsela mwo khuibe tawe.

⁴ Nebutswa batititi mwinywe abali Esaride basili okhukwa mutsimbi. Balachenda n'nase nibebikhile tsingubo tsindafu.

⁵ Yabo abalekanga balabiikhwa tsingubo tsindafu singa yaba. Sindasimia amera kabwe okhurula musitapu siobulamu tawe ne ndakhabeyame imbeli wa Papa wanje nende owa abamalaika baabe mbu nabandu banje.

⁶ “Oli nesirwi ahul'le ako Mwoyo abool'langa amakanisa!

Ebarwa khulikanisa lia Filadelifia

⁷ “Khum'malaika welikanisa elili Filadelifia handika: “Kano namang'ana okhurula khu uyo oli omutsienukhu khandi owatooto. Ali nolufungo lwa Daudi ne olwa yekulanga abulaho owakhekala ne olwa yekalanga abulaho owakheekula.

⁸ Ndamanya emilimo chichio; ndamanya mbu oli nobunyali buti; wafumila amebaalo kanje ma obetsanga omusubilwa khwise. Mal'le okhwikula omuliango imbeliwo, okwo omundu aranyala okhwikala.

⁹ Lolako, khumukanda okwelubeka wa Setani, ababehi yabo ababoolanga mbu na Bayahudi mbarali mbwo tawe; ndabakhola beetsa bekayakaye habilenje bibio. Bosi bamanye mbu ndakhuyanza.

¹⁰ Khulwa mbu wafumila lilako lianje eliobwetinyilisi, nase khandi ndakhusoola khunyinga yesibi eyitsanga khusibala okhutema abandu bosi khusibala.

¹¹ Nzitsanga bwangu. Fumila butinyu esioli n'nasio, omundu arabukula olusimbi lulwo lwobulechi tawe.

¹² Uyo olekanga ndamukhola esiilo mu Hekalu ya Nyasaye wanje, naye sialachilekha tawe. Ndahandika khuye eliira lia Nyasaye wanje, nende eliiralielitookho likhongo elia Nyasaye wanje, Yerusalemu imbia, eliikhanga okhurula mwikulu khu Nyasaye wanje, nende eliira lianje lihia.

¹³ “Oli nesirwi ahulile ako Mwoyo abool'langa amakanisa!

Ebarwa khulikanisa lia Laodikia

¹⁴ “Khum'malaika welikanisa elili Laodikia handika: “Kano namang'ana okhurula khu Amina omukobokheli omusubilwa khandi owatooto, oli obuchiachilo bwebindu biosi ebia Nyasaye yalonga.

¹⁵ Ndamanya emilimo chichio; ndamanya mbu sioli omunyifu tsitsitsi nohomba omuhie papap'pa tawe: makano olabakhwo omunyifu tsi nohomba omuhie p'pa.

¹⁶ Nebutswa sichila oli omuyu, norabba omuhie p'pa nohomba omunyifu tsi, nakhufuutse okhurula m'munwa kwanje.

¹⁷ Oboolanga ‘Ndi omuhinda ndanyoola emiandu ne sindakhanga esindu tawe.’ Nebutswa siomanyile obwoli owamasila, khandi omboki! Oli omubisandu, omubofu khandi oli esihechenye.

¹⁸ Khuchetsiyianga, okhukula etsahabu okhurula khwise; etsahabu esiyilwe m'mul'lo kho ohindihale. Khandi okule ingubo indafu, ofunikhe tsisoni tsiesihechenyesio. Khandi okule omusaala kwetsimoni obakhe khutsimoni tsitsio, mbu olole.

¹⁹ Ngondokhelanga ninzechiyia yabo bosi aba ise nyanzanga. Obe nesinani ma orule mutsimbi tsitsio.

²⁰ Lolako, sinjiye hamuliango khong'ondanga. Omundu naba nahulila omwoyo kwanje ma yeekule omuliango, ndenjila munyumbaye ma ndie n'naye, naye alalia n'nase.

²¹ Khu yabo abalekanga, nambahe obunyali okhwikhala hasibafu sianje muluruba lwanje, singa nase ndali okhuleka ma luno nzikhalanga halala na Papa wanje muluruba lulwe.

²² “Oli nesirwi ahulile ako Mwoyo abool'langa amakanisa.”