OKHUBISULA 21 - EBAIBO INZIENUKHU

Likulu liyia nende esibala esiyia

¹ Ndalola likulu liyia, khandi nesibala esiyia. Likulu liokhuranga nende esibala siokhuranga biali nibihweye, khandi inyanza siyaliho tawe.

² Ma nindola Litookho Litsienukhu, elili litookho liyia lia Yerusalemu, niliikhanga okhurula khu Nyasaye mwikulu ndierechekhele singa omweha owesiahile okhutsia khumusatsa uwe.

³ Ndahulila omwoyo omukali okhurula khuluruba nikuboola: “Luno Nyasaye alamenya halala nabandu: Alamenya n'nabo, nabo balaba abandu baabe. Nyasaye mwene alaba ninabo, khandi alaba Nyasaye wabwe.

⁴ Aleya amasika kabwe kosi mutsimoni tsiabwe. Okhufwa sikhulabaho khandi tawe, kata esibeela nohomba okhulakaya kata okhutsuunwa sikhulabaho tawe. Ebindu biokhuranga bihweye.”

⁵ Naye owikhaye khuluruba naboola, “Lola, nomba ebindu biosi ebiyia!” Khandi niyambool'la, “Handika kano, sichila amang'ana yaka nakatooto khandi akanyala okhusubilwa.”

⁶ Niyambool'la, “Kahesikhile! Ise ndi, Owokhuranga nende Owokhumal'likha, Obuchiachilo nende Obumal'likhi. Khumundu wosi oli nobuluho ndamuhelesia amaatsi akarulanga musitaho siamaatsi kobulamu sila omurungo.

⁷ Omundu wosi olekanga alanyoola yaka okhurula khwise: Ndaba Nyasaye uwe, naye alaba omwana wanje.

⁸ Nebutswa yaba abali abari, nabasiemani, nabes'sinyo, nabeeri, nabasambale, nabafumu, nabekayakayi bemisambwa, nende ababehi bosi, esitonye siabwe sili munyanza eyatukhanga omul'lo nobunora. Yikhwo nikhwo okhufwa okhwakhabili.”

Yerusalemu Imbia

⁹ Mulala khubamalaika bane nabataru abali netsindaabo tsine natsitaru nitsitsuye khwo amakhupako kokhumal'likha kane nakataru niyetsa khu ise niyambool'la, “Yitsa, nase ndakhumanyia Omweha, omukhasiwe Simeme Sielikondi.”

¹⁰ Obunyali bwo Mwoyo nibwitsula mwise, ma om'malaika niyambila khusikulu esikali esirambi. Yamanyia Yerusalemu, Litookho Litsienukhu, ndikhanga okhurula khu Nyasaye mwikulu

¹¹ niliakhanga nobukhongo bwa Nyasaye. Litookho tsana liakha singa lichina liobukusi obutinyu, singa lichina lia Jasipi, eliang'ang'u singa esilang'i.

¹² Liali noluhinga olukali, olurambi nende ebilibwa likhumi nabibili nabamalaika likhumi nababili siamulala khubuli esilibwa. Amera ketsinzibulo likhumi natsibili tsiabandu ba Isiraeli kali nikahandikwa khubilibwa tsana.

¹³ Khulubeka lwebukwe bialikhwo ebilibwa bitaru, elubeka lwenandete ebilibwa bitaru, elubeka lwemasaba ebilibwa bitaru, ne elubeka lwesinyolu ebilibwa bitaru.

¹⁴ Ne oluhinga lwelitookho tsana lwombokhwa khumusinji kwamachina likhumi nakabili. Ne amera aka abarumwa likhumi nababili abe Simeme Sielikondi kahandikwa khumachina tsana.

¹⁵ Om'malaika owal'loma n'nase yali nesichelo siolusaala lwetsahabu mbu achele litookho, nebilibwa bialio, noluhinga lwalio.

¹⁶ Litookho liali netsimbeka tsimbelani tsine, oburambi bwalio buhelana nobubambukhu bwalio. Om'malaika yachela litookho nolusaala lulwe olwokhuchela; liali noburambi obuhela etsikilomita etsielefu tsibili netsimia tsine, khandi obubambukhu bwalio noburambi bwokhutsia ikulu bwahelana noburambi.

¹⁷ Om'malaika khandi yachela oluhinga lwalio. Lwali etsimiita tsisasaba okhutsia ikulu, okhulondokhana nesichelo esiom'malaika yarumikhila.

¹⁸ Oluhinga lwombokhwa nende amachina ka jasipi, ne litookho liene liombokhwa netsahabu isiyikhu singa esilang'i esisiyikhu.

¹⁹ Amachina kemisinji echioluhinga lwelitookho kang'onihibwa namachina akobukusi obutinyu tsimbila tsiosi. Omusinji kwokhuranga ni jasipi, okwakhabili ni safira, okwakhataru ikhalama, okwakhane emaragidosi,

²⁰ okwakharano saridonikisi, okwakhasasaba amachina keshohamu, okwakhane nakhataru krusolito, okwa munane emikoche isiyikhu, okwa kharano nakhane topasi, okwe likhumi krusopraso, okwelikhumi nal'lala, yakinitso, okwe likhumi nakhabili ametsusto.

²¹ Ebilibwa likhumi nabibili tsana biali alumasi likhumi na tsibili; siesilibwa silala siali elulu ndala. Injila yelitookho yalombwa khutsahabu isiyikhu singa esilang'i esiang'ang'u.

²² Sindalola Ehekalu mwitookho tsana tawe, sichila Ehekalu yamwo no Mwami Nyasaye Owokhunyala Biosi nende Esimeme Sielikondi.

²³ Litookho siliakharuna eliuba kata omwesi okhubalamwo tawe, sichila obukhongo bwa Nyasaye bubalanga mwo, ne Esimeme Sielikondi nisio etaya yalio.

²⁴ Tsimbia tsiomusibala tsilachenda mubulafu bwalio, ne abaruchi besibala balaleeramwo obuhinda bwabwe.

²⁵ Ebilibwa bielitookho bilamenya nibiekukha om'basu nobutukhu; sibilekalwa tawe, sichila obutukhu sibulabaho tawe.

²⁶ Obukhongo nende emiandu etsie tsimbia bulaleerwa mwitookho.

²⁷ Nebutswa esindu siesifwabwi sisilenjilakhwo mwitookho kata nahati, nohomba omundu okholanga akes'sinyo nohomba oboolanga obubehi salenjilamwo tawe. Yaba abamera kabwe kahandikwa musitapu siobulamu esie Simeme Sielikondi bonyene nibo abakhenjile mwitookho.