OKHUBISULA 20 - EBAIBO INZIENUKHU

Setani wabohwa emihika elefu ndala

¹ Khandi ndalola om'malaika niyekhanga okhurula mwikulu. Yali nolufungo lwe ing'ani nende omunyol'lo omukali m'mukhono kukwe.

² Yafumila ebaka inzokha ikhulu nayo niyo Es'sieno nohomba Setani namuboha emihika elefu ndala.

³ Om'malaika yamufuuba mung'ani, niyekala narakhwo esimanyilo mbu abule okhukaata tsimbia khandi tawe okhwola emihika elefu ndala olwa chihwa. Inyuma we yako alabohololwa hatututu.

⁴ Ma nindola tsiiruba, ne yabo abekhaye khwo bahebwa obunyali okhukhalaka esiina. Khandi ndalola emioyo echie yabo abali okhwirwa sichila bakobokhela obwatooto obwa Yesu yabisula nende ling'ana lia Nyasaye. Sibali okhwekayakaya esolo nohomba esiniini siayo, kata khandi sibanyoola olung'ole olwe esolo khubweni bwabwe kata khumakhono kabwe tawe. Banyoola okhuba mwoyo, nibamiha halala na Kristo emihika elefu ndala.

⁵ (Abandi bosi abali nibafwa sibanyoola okhuba mwoyo okhwola olwe emihika elefu ndala yichi chiliba nichihweye.) Yikhu nikhwo okhusimukukha khwokhuranga.

⁶ Nabeikhabi okhusila, khandi nabatsienukhu abali mukhusimukusibwa khwokhuranga. Okhufwa khwa khabili sikhulabasalisia tawe; balaba abesaalisi ba Nyasaye nende aba Kristo, ne balamiha halala n'naye emihika elefu ndala.

Okhulekwa khwa Setani

⁷ Olwe emihika elefu ndala chiba nichihweye, Setani alabohololwa okhurula mubuhambe bubwe,

⁸ ne alatsia okhukaata tsimbia etsili mumbeka tsine etsiesibala, tsimbia tsana ni Gogu nende Magogu. Setani alachibunjelesia halala khubulwani, obwinji bwatsio bufwana tsinzalu tsiomuyekhe okwe inyanza.

⁹ Basalaana khusibala siosi nibafumbila olukaka olwabandu ba Nyasaye nende litaala elia Nyasaye yayanza. Nebutswa omul'lo kwarula mwikulu nikubasamba.

¹⁰ Kho Setani owali okhubakaata, yafubwa munyanza yomul'lo nende obunora, aha esolo nomuroobi owobubehi bali okhufuubwa; balakhondokhondibwa om'basu nobutukhu inziaiyo.

Esiina siokhumal'likha

¹¹ Ma khandi nindola oluruba olukhongo olulafu nende uyo owikhaye khulwo. Esibala nende likulu bielukha okhurula mumoni mwe ne sibianyoolekha khandi tawe.

¹² Khandi ndalola abafwa, abakhongo nende abatu, nibasinjiye imbeli woluruba. Ebitapu biafunulwa, ma esitapu sindi esili esitapu siobulamu nisifunulwa. Abafwa bakhalachilwa esiina singa obwemilimo chiabwe chiali singa kahandiikwa mubitapu.

¹³ Ma inyanza nehinia esioba abafwa abali nibali muyo. Olufu nende esibala siabafu nibihinia abafwa abali nibali mwo. Ne bosi bakhalachilwa esiina singa emilimo chiabwe chiali.

¹⁴ Olufu nende esibala siabafu nibifuubwa munyanza yomul'lo. (Inyanza yomul'lo tsana nikhwo okhufwa okhwakhabili.)

¹⁵ Omundu owe eliira lilie lirahandikwa musitapu siobulamu yafuubwa munyanza yomul'lo.