OKHUBISULA 2 - EBAIBO INZIENUKHU

Ebarwa khulikanisa lia Efeso

¹ “Khum'malaika welikanisa elili Efeso handika: “Kano namang'ana okhurula khu uyo oli netsiyasulwe tsine natsitaru mumukhono kukwe omusaatsa, niye ochendanga hakari mubihani ebietsahabu bine nabitaru.

² Ndamanya emilimo chichio; ndamanya obwa watiiya butinyu khandi obwa obetsanga nokhwetinyilisia. Ndamanya obwa oranyala okhwefwila abandu ababi khandi wabateema yabo ababoolanga mbu nabarumwa ne mbarali mbwo, ma wabalola obwa bali ababehi.

³ Oli omwetinyilisi. Khandi wasalila khulwanje, ne siwachonya tawe.

⁴ Nebutswa ndi neling'ana khuibe: Siunyanzanga singa olwokhuranga tawe.

⁵ Witsul'le aha warula nokwa. Orule mutsimbi tsitsio ma okhole emilimo chiokhuranga. Norarula mutsimbitsio tawe, nanzitse khuibe, okhusimula esihani sisio esietaya okhurula mung'ono mwasio.

⁶ Oli neling'ana elala lilahi: osinyikhilanga emilimo echia Banikolai, echia nase sinyikhilanga.

⁷ “Oli nesirwi, ahulile akomwoyo obool'langa amakanisa! “Khu yabo abalekanga, ndakhabahe omunwa okhulia litunde liomusaala kwobulamu okukhulanga M'mukunda kwa Nyasaye.

Ebarwa khulikanisa lia Simurina

⁸ “Khum'malaika welikanisa elili Simurina handika: “Kano namang'ana okhurula khu uyo oli owokhuranga khandi owokhumal'likha, owali okhufwa nalamukha.

⁹ Ndamanya amanyakhano kaako; ndamanya obutakha bubwo – habula mubwatooto oli omuhinda! Ndamanya amanyeko amabi akaboolwanga khwiwe neyabo ababoolanga mbu na Bayahudi nebutswa mbarali mbwo tawe; bo nomukanda kwa Setani!

¹⁰ Oraria esindu siosi esitsa okhukhukwila tawe. Lola, Setani yenya okhumuteema nafuba abalala mwinywe mubuhambe, nenywe mulakhupa esibi khumatukhu likhumi. Mube abasubilwa khwise okhwola khulufu, nase ndakhamuhe olusimbi lwobulamu.

¹¹ “Oli nesirwi, ahulile akomwoyo abool'langa amakanisa! “Khu yabo abalekanga, sibakhasalisibwe nolufu olwakhabili tawe.

Ebarwa khulikanisa lia Perigamo

¹² “Khum'malaika welikanisa elili Perigamo handika: “Kano namang'ana okhurula khu uyo oli nolukanga olwochi tsimbeka tsibili.

¹³ Ndamanya ahomenyanga, aha Setani ali noluruba lulwe. Nebutswa osihambachil'langa okhufumila eliira lianje, ne siwayambakhana obusubili bubwo mwise kata mumatukhu ka Antipa, omukobokheli wanje omusubilwa olwa yer'rwa aha Setani amenyanga.

¹⁴ Nebutswa ndi namang'ana matututu khwiwe: baliho balala mu inywe abalondanga obwibaali bwa Balaamu, owebaalila Balaka obwokhwemel'la abandu Baisiraeli mutsimbi khulwa okhulia ebiokhulia ebiriiywe khumisambwa nokhuheya.

¹⁵ Khandi mbwo oli nabandu abalondanga obwibaali obwa Banikolai.

¹⁶ Orule mutsimbitsio luno! Norakhola mbwo, ndakhetsa khwiwe bwangu ninwana nabandu yabo nolukanga olurulanga m'munwa kwanje.

¹⁷ “Oli nesirwi, ahulile ako Mwoyo abool'langa amakanisa! “Khu yabo abalekanga, ndibahakhwo emana eyabiswa. Khandi ndihelesia simulala khubo lichina lilafu eliahandikwa khwo eliira lihia, abulaho olimanyile narali olibukulanga yenyene.

Ebarwa khulikanisa lia Tsuatira

¹⁸ “Khum'malaika welikanisa elili Tsuatira handika: “Kano namang'ana okhurula khu Omwana wa Nyasaye oli netsimoni singa olumemo lwomul'lo, ne ebilenje bibie bifwana singa omukasa omusiyikhu.

¹⁹ Ndamanya emilimo chichio. Ndamanya obuyanzi bubwo, nobusubilwa bubwo, noburumikhi bubwo nende obwetinyilisi bubwo. Ndamanya obwa oli nesinani luno okhuyomba olwokhuranga.

²⁰ Nebutswa ndi neling'ana lino khwiwe: Ohuchil'langa omukhasi Yesebeli, owelanganga omuroobi wa Nyasaye. Mubwibaali bubwe akosianga abarumikhili banje mukhukhola obuheyi nokhulia ebiokhulia ebihan'nwe khumisambwa.

²¹ Ndamuha obweyangu okhurula mutsimbi tsitsie, naye siyenya okhulekha obuheyi bubwe tawe.

²² Lolako, ndamukhuya nobulwaye aha ye neyabo abaheyanga n'naye balaba musiloli esikali, mbaba mbaralekha emilimo chiabwe emibi.

²³ Khandi nanzire abalondi baabe, ma amakanisa kosi kalamanya Nise omanyanga amakani nemioyo chia abandu ne ndihana esinyasio khu siomundu khwinywe okhulondokhana nemilimo chichie.

²⁴ “Nebutswa abandi bosi mu Tsuatira basili okhulondakhwo amebaalo amabi yaka; musili okhumanya khwo aka abandi balanganga ‘amabiso ameyinikhu aka Setani.’ Mboolanga khu inywe mbu sindamutukha es'siro sindi tawe.

²⁵ Nebutswa esia muli n'nasio, musifumile okhwola olwa ndakhetse.

²⁶ Khu yabo abalekanga nibatsilil'la okhukhola aka nyenyanga okhwola khusihesi, ndibaha obunyali khutsimbia,

²⁷ balamiha khubo neindabusi yesibia nokhukamiina singa ebilonge biomulonji singa obwa ndahebwa khu Papa wanje.

²⁸ Khandi ndibaha eyasulwe eya mukamba tsuli.

²⁹ “Oli nesirwi ahulile ako Mwoyo abool'langa amakanisa.