OKHUBISULA 16 - EBAIBO INZIENUKHU

Tsindaabo tsioburima bwa Nyasaye

¹ Khandi ndahulila omwoyo omukali okhurula mu Hekalu nikubool'langa abamalaika bane nabataru, “Tsie mutsukhe tsindaabo tsine natsitaru etsie lirima lia Nyasaye khusibala!”

² Om'malaika wokhuranga yatsia, natsukha olutaabo lulwe khusibala. Likhwaku libi eliokhutsuna butinyu nilihamba abandu abali nolung'oole olwesolo nende khuyabo abali nibekayakayanga esiniini siayo.

³ Ma om'malaika wakhabili natsukha olutaabo lulwe khunyanza. Amaatsi nikakwa singa amatsahi komundu omufu, ne siesindu esili mwoyo esimenyanga munyanza siafwa.

⁴ Om'malaika wakhataru natsukha olutaabo lulwe mumichela nende mubitaho biamaatsi, nabio biakwa amatsahi.

⁵ Nimbul'la Om'malaika osinjiliye amaatsi naboola, “Obukhalachi bwosi bwesina obwa wakhalaka nobwa habwene, Ibe Omutsienukhu, ibe obetsanga niwe khandi owalinji niwe!

⁶ Abandu ababi bayira abandu baabo nende abaroobi baabo, nawe ubaheye amatsahi banywe. Banyoolanga esia bakwan'ne okhunyoola!”

⁷ Ma nimbul'la omwoyo okhurula khulusambwa nikuboola, “Omwami Nyasaye Owokhunyala Biosi! Okhukhola khukhwo nokhwatooto khandi nokhwahabwene!”

⁸ Om'malaika wakhane natsukha olutaabo lulwe khuliiba, nalio nilihebwa obunyali okhusamba abandu nomul'lo kwalio.

⁹ Abandu bahia okhuhia okhukali, ma nibanyeka eliira lia Nyasaye, oli nobunyali khumakhupako tsana. Nebutswa sibarula mutsimbi tsiabwe nokhwitsoomia obukhongo bubwe tawe.

¹⁰ Om'malaika wakharano natsukha olutaabo lulwe khuluruba lwesolo. Esiilima nisiitsula khubwami bwayo, abandu nibenyanya tsinimi tsiabwe khulwa obusalili bwabwe,

¹¹ khandi nibanyeka Nyasaye womwikulu khulwo obusalili bwabwe nende amakhwaku kabwe. Nebutswa sibalekha tsinjila tsiabwe tsimbi tawe.

¹² Ma om'malaika wakhasasaba natsukha olutaabo lulwe khumuchela omukali okwa Efurate. Amaatsi kakwo kakhama okhukasia injila khubaruchi abokhurula ebukwe.

¹³ Ma nindola emioyo chitaru echiesifwabwi echifwana singa amasele. Chiarula mumunwa kwebaka nende mumunwa kwesolo nende mumunwa kwomuroobi wobubehi.

¹⁴ Yichi nemioyo chiebisieno ebikholanga akokhuchenya. Emioyo chitaru yichi chirulanga nichitsia khubami besibala bosi, okhubabunjelesia halala khwihe khu Litukhu likhongo lia Nyasaye Owokhunyala Biosi.

¹⁵ Omwami aboolanga, “Lola, nzitsanga singa omwibi. Noweikhabi omenyanga nali meso nahengelesia tsingubo tsitsie, mbu arachenda esihechenye nasimba omurwe imbeli wabandu!”

¹⁶ Kho emioyo tsana chiabunjelesia abaruchi yabo halala habundu ahalangungwa mu Luheburania Harmagedoni.

¹⁷ Om'malaika wakhane nakhataru natsukha olutaabo lulwe mumiiya ikulu. Omwoyo omukali nikurula muluruba oluli mu Hekalu nikuboola, “Kahweye!”

¹⁸ Ne tsialiho tsimbeni, nemioyo, netsikhupa nende okhutechela okhukali okhwesibala. Khusili okhubakhwo nokhutechela khwesibala singa yikhwo okhurula Nyasaye nalomba omundu khusibala. Okhutechela khwesibala yikhwo khwali okhubi okhwamakana okhubira esichelo.

¹⁹ Litookho likali liakabukhanibwa mwo ebitonye bitaru ne amatookho ketsimbia tsiosi kakwa. Nyasaye yetsul'la Babuloni litaala likhongo nalihachia okhunywa ewaini musikombe siobululu bwelirima lia Nyasaye.

²⁰ Ebikhalachinga biosi biakora, khandi ebikulu biakhamulukha.

²¹ Amachina keifula amakali, buli elala obusiro bwalio singa etsikilo amakhumi karano, kakwa okhurula mwikulu khubandu, abanyeka Nyasaye khulwa likhupako liamachina, sichila likhupako liako liali likali muno.