OKHUBISULA 14 - EBAIBO INZIENUKHU

Olwembo lwabandu abanunulwa

¹ Khandi ndahenga nindola Esimeme Sielikondi nisisinjiiye khusikulu sia Sayuni; ne halala n'naye yali nabandu etsielefu emia ndala namakhumi kane natsine abali neliira lilie nende eliira lia Papa uwe ndihandichilwe khubweni bwabwe.

² Ma nimbulila omwoyo okhurula mwikulu okwali singa omwoyo kwokhuhola khwamaatsi amenji, khandi singa omwoyokwe ikhupa ingali. Omwoyo kwandahulila kwali singa abakhupi betsinongoli nibakhupanga tsinongoli tsiabwe.

³ Abandu etsielefu emia ndala, namakhumi kane natsine basinjila imbeli woluruba, nende imbeli webili mwoyo bine, nende imbeli wabakhulundu; bali nibembanga olwembo olwibulo. Abulaho omundu wosi owakhekelekhwo olwembo tsana nibarali bo bonyene abali okhununulwa okhurula musibala.

⁴ Yaba nabandu abarayefwabia nabakhasi tawe, okhuba nabachima. Balondanga Esimeme Sielikondi hosi aha sitsitsanga. Bamala okhununulwa okhurula mubandu bandi ne nibo abokhuranga okhuhanwa khu Nyasaye nende khu Esimeme Sielikondi.

⁵ Ne obubehi sibwanyolekha muminwa chiabwe tawe; sibali nesikha tawe.

Abamalaika bataru

⁶ Khandi ndalola om'malaika undi napulukhanga ikulu m'miya, nali na Amang'ana Amalahi ake inziaiyo okhukambila abandu bomusibala, khu sioluyia nende olwibulo nolulolomo nelihanga.

⁷ Naboola nomwoyo omukali, “Helesie Nyasaye oluyali nimwitsoomia obukhongo bubwe! Okhuba esaa yiye yokhukhalachila abandu esiina yol'le. Mwekayakaye uyo owalomba likulu, nesibala, neinyanza nende ebitaho biamaatsi!”

⁸ Om'malaika wakhabili nalonda owokhuranga, naboola, “Likwiye! Babuloni litookho likhongo likwiye! Liachila abandu bosi nibanywa ewaini yalio – ewaini indulu yobusambale bwalio!”

⁹ Om'malaika wakhataru nalonda abokhuranga babili naboola nomwoyo omukali “Omundu naba niyekayakaya esolo nende esiniini siayo ma natola olung'ole khubweni bubwe nohomba mumukhono kukwe,

¹⁰ alanywa khuwaini yelirima lia Nyasaye, eya yatsukha musikombe sioburima bubwe sila okhutsoka mwo amaatsi! Yabo abakholanga yaka balakhondokhondibwa nomul'lo, nobunoro imbeli wa bamalaika ba Nyasaye, nende imbeli we Simeme Sielikondi.

¹¹ Omwosi kwomul'lo okubakhondokhondianga kutumanga inziaiyo. Okhuhuluukha sikhuliho obutukhu nom'basu khu yabo abekayakayanga esolo nende esiniini siayo tawe, nende yabo abali nolung'oole olweliira liayo.”

¹² Yaka kamanyianga mbu abandu ba Nyasaye okhwola betinyilisie, yabo abaritsanga amalako ka Nyasaye ma nabasubilwa khu Yesu.

¹³ Khandi ndahulila omwoyo okhurula mwikulu nikuboola, “Handika kano: Nabeikhabi abafwilanga mumilimo chio Mwami okhuchiaka olwaleelo!” Omwoyo nakalusia, “Nabeikhabi siahene. Balahulukha okhurula khumilimo chiabwe emitinyu, sichila ebiamo biemilimo chiabwe bibalondanga!”

Obusukhi bwobukhalachi bwokhumal'likha

¹⁴ Khandi ndahenga nindola lilumbesi lilafu, ne owikhaye khwilumbesi tsana yafwana singa omundu, nali nolusimbi lwetsahabu khumurwe kukwe nende injeso inzochi mumukhono kukwe.

¹⁵ Ma om'malaika undi yarula mu Hekalu nalanjisia nomwoyo omukali khu owikhaye khwilumbesi; “Chiaka okhuchesa nende injeso yiyo sichila esaa yokhuchesa yol'le, lichesa liesibala lilabile okhusila.”

¹⁶ Kho owali niyekhaye khwilumbesi yachesa neinjeso yiye, ne esibala siacheswa.

¹⁷ Khandi ndalola om'malaika undi narula mu Hekalu eli mwikulu, naye khandi yali neinjeso inzochi.

¹⁸ Khandi om'malaika undi osinjiliye omul'lo niyetsa okhurula khulusambwa. Yahanzuukha nomwoyo omukali khu om'malaika owali neinjeso, “Chiaka okhuchesa neinjeso yiyo. Noka amangala akomusabibu kwesibala sichila emisabibu chikhomeye!”

¹⁹ Kho om'malaika yachesa esibala neinjeso yiye, nanoka emisabibu okhurula khumusabibu, nachifuuba musinu siokhusen'nwa mwo esikali sielirima lia Nyasaye.

²⁰ Emisabibu chiasen'nwa musinu esili esioba welitookho, amatsahi nikarula musinu mumichel'la nikatsia oburambi okhuhela etsikilomita tsimia tsitaru nende okhutsia hasi emita ndala nende enusu.